|
|
| 1/5/2001 (二) |
| 好擔心呀, 今日起身, 見Noki 都冇乜食過野, 水都唔係飲左好多, 不過我要去街, 所以都冇乜理到佢, 都夜晚bb打黎話佢唔郁就真係赫死我呀, 好彩番到佢都見到佢郁, 不過係out左d啦 , 但係都係冇乜食到野, 最驚係連佢最愛既零食同乳酪都唔肯食, 真係擔心死我啦, 唯有聽日一早同佢去夏利維到睇醫生啦, 擔心死…… |
| 2/5 (三) |
| 尋日阿 Nok爸同佢磅左30g糧, 今朝再磅都係冇變過, 即係真係乜都冇食過, 水就飲左d啦叫做, 真叫人擔心, 仔呀仔, 唔好咁小氣啦, 赫死阿媽啦~~~所以教完琴我就即刻帶佢去左夏利維到睇醫生, 不過今次個一個唔係 Dixon, 又唔係Christopher, 而係另一個叫幾靚仔既唔知乜水, 不過佢個feel 就唔係咁professional 囉, 所以睇完都唔係太放心, 夜晚我拎左critical care去Nok爸度餵佢, 因為實在太擔心啦, 加上Noki佢都仲未肯食番野, 只係食左幾條草草, 所以都搞到好夜先走, 擔心死…… |
| 3/5 (四) |
| Noki今日既情況依然冇改善,所以Nok爸就再同佢約左去睇醫生, 今次睇番阿chris啦, 一睇, 要開刀做手術呀,
因為有異物阻塞左d腸&個胃, 好危險, 手術費千四蚊, 可以去台灣玩囉…不過為左NokNok都要既~~~ 我去到醫院時, 手術都做完啦, NokNok亦都醒左, 去睇一睇佢之後就走左, 醫生話要留院到星期六, 真係擔心死…… |
| 4/5 (五) |
今朝十點幾接到夏利維電話, 話Noki己經走左啦, 真係好唔開心, 佢好乖好聽話架,
雖然有時會蝦我, 夜睌同左Nok 爸去見一見佢, 醫生話係因為d野係個胃太耐放左d毒素, 影響左個肝有事, 也有可能是過不了麻醉…NokNok, 我好掛住你呀~~~希望你唔好比其他動物蝦啦!! 因為Noki走左, 所以驚矇豬會有毛球同中暑, 所以今晚就把心一橫同矇豬剪毛啦, 都搞左我好幾個鐘, 為左氹佢開心等佢乖乖比我剪毛, 所以我放左佢入我房玩, 等佢玩到tire時扒係到休息我就動手, 結果玩到得意忙形既佢居然係阿媽張被到尿尿呀, 真係未死過, 好彩呀媽唔知渣, 唔係就有紅燒兔肉食啦~~ |
| 5/5 (六) |
| 今日好熱呀,
因為驚矇豬會中暑, 所以我就同佢搬左去我房到訓, 一齊涼冷氣, 結果訓左2個鐘頭到之後真係嚇死我, 佢郁都唔郁咁, 摸佢耳仔時係冇溫度, 凍冰冰, 以為佢凍死左呀~~~
嚇到我丫, 鼻哥lone都冇肉, 後尾我緊係即刻熄番個冷氣機啦, 好彩冇事者…到夜晚, 我就放左佢係門口度透少少冷氣比佢, 不過唔知點解, 佢都冇乜點郁,
仲冇呵屎屎添~ |
| 6/5 (日) |
| 起身教完琴番黎, 好彩, 有番屎屎啦, 個衰豬丫, 成日都嚇鬼我架~~ 由於今日天氣十分熱, 我又要番學, 所以就叫媽咪放左佢出黎, 結果就係收到媽咪既電話投訴, 話佢好曳喎, 通度屎屎, 跳高跳底, 咬電線…結果點?? 咪比人困番入籠囉~~~ 丫, 仲有呀, 今晚矇豬佢自己跳上sofa呀, d彈跳力真係勁呀~~ |
| 7/5 (一) |
| 今日矇豬都叫乖啦, 冇比媽咪投訴(係以為), 因為到夜晚又發覺佢再咬斷一條電話線, 唉... 再係咁都唔知點算好~~~仲有呀,佢開始鐘意跳上sofa玩囉, 仲要呵幾粒屎屎先肯跳番落黎喎, 真係比佢吹漲!! |
| 8/5 (二) |
| 今日同矇豬玩大包圍, 即係我包實佢唔比佢走, 點知佢就好不近人情咁一啖咬左落去, 好痛呀~~~即時有一粒好似蚊爛咁紅同腫左一個圓點點, 好克人憎架~~~ |
| 9/5 (三) |
| 今日如常地同矇豬玩, 不過有少少意外, 就係又比佢捐左入去書枱, 電視架, 電腦枱同塊牆條好窄, 唔知點解佢可以入到佢既gap到啦, 之前有經驗比佢捐過入去, 我己經做好工夫架啦, 點知到比佢既毅力打破我做既重重障礙, 張d公仔呀, 衫呀扯晒出黎之後捐入去玩個痛快, 搞到我要將所有野搬番出黎, 熄電線總制, 真係比佢激死我呀~~~~ |
| 10/5 (四) |
| 今日終於的起心肝, 做左第一樣玩具比矇豬玩啦, 就係紙皮箱同紙皮箱, 唔好睇少佢呀, 個設計唔差架, 有一條長同一條短既隧道, 另外一個出入口, 不過隧道都有出口既, 丫~~仲有一個window 添, 佢都好比面我咁入去行左幾轉, 總算冇白費我既心機啦!!! 不過夜晚我見佢打左成5,6個<哈痴>呀, 嚇死…好彩冇鼻水者, 仲有呀, 夜晚我放佢出黎個陣佢居然唔第一時間走左去, 而係我側邊徘徊, 又用個鼻鼻頂我同請請, 原來想我比野佢食, 食完之後就唔再show我啦…唉…無良心架~~~不過夜晚我好叻咁用一粒貴價糧夾一粒bunny basic 塞入佢口比佢食, 但有d都失敗左, 比佢成功咁淨係choose 粒貴野食 |
| 11/5 (五) |
| 矇豬越黎越欣賞我整比佢既玩具啦, 成日走入去撕撕撕, 咬咬咬, 見到佢都好笑呀, 今晚如常地比矇豬入左房玩一陣, 出奇地好爹喎~~~佢將個頭扒左係我隻手到比我摸摸佢, 氹到我鬼死咁歡喜 |
| 12/5 (六) |
| 今日番左去學校做野, 好開心呀, 因為有人買左隻兔兔比我黎陪矇豬呀, 仲帶左佢番黎比我睇添, 因為佢係學校既CC留有足跡, 所以佢就叫做CC啦, 以後矇豬唔會一隻兔咁悶lu, 不過因為我唔可以咁早走住, 所以就放係佢度一兩日先啦!! |
| 13/5 (日) |
| 嘩!!!矇豬進註我家一個月喇, 佢叫比啱啱黎個陣時乖左d啦, 叫做肯比人抱下 (最多5,6秒到), 摸佢唔會即刻逃走, 今日仲成日跟住我走, 用個鼻鼻頂我叫我比野佢食添, 得意死呀~~不過同時, 佢今日都好鬼曳呀, 比媽咪發現係sofa 留有屎屎十數粒, 仲要見到有尿積添…你話死唔死丫, 搞到我又要同佢抹, 到夜晚啦, 又係咁, 又屎又尿, 明明教識左佢番個籠到屎屎尿尿架麻, 分明玩野者, 激死我啦~~~ |
| 14/5 (一) |
| 今日下午係屋企, 所以就放左矇豬入黎玩, 今日佢既節目係頂cushion, 同捐被被, 佢玩左好多轉呀, 傻傻地架~~~ 夜晚去左接新兔兔CC番屋企, 好乖架佢, 不過矇豬見到佢個陣unun佢呀, 赫得我丫, 搞到我突然之間對佢既性別起懷疑呀, 想反轉佢睇佢又極力淨扎, 所以…不過我諗係女掛… |
| 15/5 (二) |
| 今日矇豬好似好down咁, 可能驚自己會失寵, 呷醋啦, 不過CC個樣又真係好得意既, 又乖, 又肯比人抱, 又會lamlam, 哈哈, 矇豬面臨危機啦, 等你仲咁曳曳丫拿, 今晚矇豬係我房玩時想跳上張chair 時失手跌番落黎呀, 好彩冇事者~~ |
| 16/5 (三) |
| 今日都冇乜特別事, 係比矇豬咬我腳趾公咁大把啦, 我之不過隻腳趾公阻住左佢之麻, 佢就一啖咬囉黎, 咁鬼惡死都有既… |
| 17/5 (四) |
| CC好似開始識得去厠所喇, 不過就成日走去矇豬個籠度食佢d野, 矇豬又好似報復咁走番佢CC個籠度屎屎尿尿, 仲尿到cc個身都有少少添, 真係比佢地激死, 不過今日阿矇又係sofa 屎屎尿尿啦, 真係想狠狠的打佢屁股呀~~~ |
| 18/5 (五) |
| 而家一放佢地兩隻野出黎, 第一時間佢地就係換左個籠, CC會第一時間去矇豬個籠度食佢d糧, 而矇豬亦唔輸蝕, 走番去CC個籠度屎屎尿尿, 人地屋企臭好過自己屋企臭麻~~仲有呀, 矇豬今日好搞笑, 係度咬書枱底個紙盒想搬走佢時一個失足'咕嚕'咁跌左係度, 又咬住支飲管周圍走喎, 笑死我呀, 同埋我又比CC咬啦, 餵佢食野時佢又咬錯我隻手指, 仲要向後扯添呀, 痛死…… |
| 19/5 (六) |
| 今日佢地2個都好out, 又唔係點郁…赫死我, 以為佢地有事, 好彩夜晚又活躍番, 不過矇豬又係sofa 尿尿啦… |
| 20/5 (日) |
| 矇豬佢…好叻呀, 自己行樓梯上二樓呀, 不過行左半層就比我捉番佢落黎LU, 今日仲比我見到CC打喊路呀, 同埋矇豬係到挖草, 夜晚仲兩隻一齊發癲添, 猛咁係個籠度跑圈圈, 都唔知佢地做乜鬼… |
| 21/5 (一) |
| 今日終於帶左佢地去睇醫生lu, 係CC有d皮膚病, 其他都冇乜野, 幾健康, 不過就嚇死佢地囉…番到黎矇豬嬲我添呀, 我一行埋去佢就走開喎… |
| 22/5 (二) |
| 媽咪今日幫佢地去舖頭整左2個dull dull, 咁佢地個籠d木糠就唔會踢到周圍都係囉~~ |
| 24/5 (四) |
| 今日一番到黎又接到媽咪投訴啦, 就係矇豬曳曳囉, 係到頂個籠放糧個dull dull, 搞到d 糧倒晒出黎, 好麻煩架, 夜晚又唔知做乜走去…個籠度跑圈…傻傻地~~ |
| 25/5 (五) |
| 今日發生矇豬叻事同瘀事各一宗, 叻事就係佢居然可以跳過差唔多到我腰既紙皮入我房呀, 我諗佢都度左好耐, 點坐跑點跳囉, 但係佢又居然失手跳唔到上sofa, 我睇住佢'sin' 左落黎, 好瘀呀, 我都忍唔住要笑佢… |
| 26/5 (六) |
| 矇豬黑星又黎啦, 今次係要同佢洗白白同剪指甲, 經佢一輪掙扎之後都叫做洗左啦, 不過到剪指甲時, 幾經辛苦, 2人合力之下, 結果係剪到3大隻手指, 而我地就係抓痕累累喇, 都唔明點解可以咁惡架~~~~~~~~仲要發皮氣唔食野, 即刻呵爛屎添喎, 激死!!! |
| 27/5 (日) |
| 今日比CC嚇死, 話說我抱佢係sofa時佢突然發癲跳落佢我又黎唔切捉實佢, 見佢落地之後行到'吉'下'吉'下, 應該係話係到爬去茶機底, 嚇死我以為佢整斷手腳, 不過知後又見佢周圍跳先鬆一口氣…夜晚仲學矇豬係自己個籠到跑圈添~~ |
| 28/5 (一) |
| CC好似開始冇咁驚我啦, 今日仲主動走埋黎同我討野食, 平時都唔會既, 仲有呀, 我夜晚溫書溫到係sofa訓著左時, 居然有隻傻兔跳左上我個身到叫醒我呀… |
| 29/5 (二) |
| 今日好成功咁襯矇豬扒係度休息時同佢剪左指甲啦!! |
| 30/5 (三) |
| 今日唔洗考試, 所以我都放左佢地出黎玩, 由我起身玩到我去訓, 而家CC大膽左好多啦, 仲會主動走埋黎同我討野食添~ |
| 31/5 (四) |
| 今日一起身, 兩隻兔己經被放lu, 媽咪話佢地今日乖喎… 不過夜晚呢就開始作反啦, 由其係矇豬, 咬到我舊擦膠唔知似乜, 又帶住CC去探險, 搵路捐入我間房, 佢都好勁呀, 多次突破紙皮障礙入到黎, 我都要向佢寫個"服"字 |