|
|
| 1/9/2001 (六) |
|
去完三日兩夜camp, 番到黎都冇放佢地, 因為太攰囉, 不過就收到媽咪投訴矇豬同CC走入地主公到咬爛晒d, 又捉唔到佢地拜拜喎, 仲搞到隻手損左添, 仲有呀, 佢靜靜雞同沙律用水沖涼, 因佢未打晒針我驚佢會冷親, 所以我淨係用沖涼粉 & 濕毛巾同佢沖既, 不過我一唔係度阿媽佢就... 佢話沙律太臭喎... 仲有呀, 我今日一番到黎, 沙律就勁搖尾, 搖到成個pat pat 係到擺下擺下呀~~ |
| 2/9 (日) |
| 今日一放個兩隻兔兔出黎, 佢地就發左癲咁係到跑彈跳, 可能我唔係到佢地冇得成日放出黎玩啦, 所以佢地好似好開心囉, 矇豬仲記得我, 因為成日都跟住我行呀, 不過唔知點解我覺得佢地好似瘦左少少呀~~~仲有呀, 我發覺CC換毛啦, 隨手一執都可以'蚊'到好多, 所以我就捉左佢梳毛梳左好耐, 嚇到佢死死下呀, 成個鼻同個咀, 下巴d毛都濕晒呀~~~ |
| 3/9 (一) |
| 開學lu, 好慘呀, 8點半番到6點半, 番到黎又要執屎尿, 慘上加慘呀... 夜晚, 又係捉左CC去梳毛梳左好耐, 比d佢平時鍾意食既野佢, 佢都驚到唔食, 不過papaya就例外囉, 可惜唔可以當零食咁比佢氹下佢啦, 仲有呀, 矇豬比沙律嚇親呀, 因為一個唔覺意比沙律走左去, 跟住就追住矇豬啦, 矇豬都擺出一個戰鬥格架啦, 好彩我及時制止渣, 嚇鬼死我... |
| 4/9 (二) |
| 矇豬而家除左成日跟住我之外, 開始成日都跟住阿媽啦, 可能因為阿媽都成日同佢執屎尿啦, 又成日餵佢食野, 所以矇豬見唔到我既時侯就會跟住阿媽囉, 搞到阿媽話佢好煩喎, 成日日跟夜跟, 鬼死咁有恒心, 搞到要放d 野食係地下先可以打發佢~~ |
| 5/9 (三) |
| 先一兩日我多口咁同阿媽講話矇豬呢排乖左好多, 冇係出面疴屎疴尿, 阿媽就即刻叫我唔好咁講, 話兔仔好小氣架喎, 咁講完佢就會做, 點知原來係真架, 因為我今日又踩尿啦, 成個腳板底濕晒呀陰功, 仲發覺屋企有幾度都有佢既尿尿呀~~ |
| 6/9 (四) |
| 今日佢地兩隻兔成日打交呀, 成日大家追住條尾, 又係咁un, 不過CC都醒目左啦, 知道自己細粒同矇豬pat 大, 所以佢掉轉黎un, un 矇豬個頭, 不過就成日比矇豬用個頭頂走佢囉, 佢又唔知死, 結果搞到矇豬發火追住佢黎咬, 岩岩呢幾日CC又換毛, 所以搞到成地下都係呀, 又難掃喎, 唉... |
| 7/9 (五) |
| 以前通常淨係矇豬會做跟屁兔, 而CC就見矇豬跟佢先會係後面跟住, 睇下咩環境既, 不過今日佢都變身成為跟屁兔the 2rd 啦, 因為佢又係成日跟住晒, 要你比野食佢, 唔比我又驚佢第時唔跟我喎,真係麻麻煩呀~~ |
| 8/9 (六 ) |
| 阿媽越黎越鍾意沙律啦, 又同佢沖涼啦, 餵佢食野啦, 放佢出黎玩咁, 所以沙律都好生性既, 今日終放第一次自己番入籠疴尿, 雖然後尾係出面疴過一次, 不過比我地鬧玩之後再放佢時, 佢都識得自己番去疴啦, 咁以後就可以放多d佢, 不過變相矇豬就冇得放咁多囉, 因為沙律會追住佢地咬, 不過矇豬又左叻左啦, 以前我成日話佢蠢, 想開門時會後扯, 應該向前推架麻, 點知今日佢大力一踩閂左自己個籠對門, 點知過左一陣, 佢又自己開番, 開頭諗住因為佢自己閂得唔實啦, 所以易頂開, 不過後尾我同佢閂對門, 佢一樣照開可也呀!! |
| 9/9 (日) |
| 今日屋企好熱鬧呀, 因為我姨媽帶左佢隻狗狗Bunny黎 (Beagle, 成3,4尺長, 6,70磅呀~), 嚇到花花即刻哩埋左係床下底死唔出黎, 而矇C呢, 就係餐檯底唔出黎, 就算搵野食引佢, 佢都係唔出, 可能聞到好勁既狗味啦, 不過我都冇比Bunny入黎, 話晒都係一隻臘犬麻, 我都有d驚佢呀, 鬼咁大隻...而沙律呢, 就好好奇咁聞佢囉, Bunny一吠, 佢就向後退幾步, 之後又再聞過, 當Bunny帶左口罩時佢就真係咩都唔驚, 周圍聞, 仲夠膽死咬佢條尾添, 真係服左佢呀~~ |
| 10/9 (一) |
| 今日真係有唐生菜比佢地試囉, 矇豬對佢既興趣比椰菜大, 有聞下聞下, 不過最後都係用個下巴磨一磨佢就算鬼數, 而CC就當然係食啦, 仲有哈蜜瓜呀, 佢都幾鍾意, 真係咩都岩呀~ |
| 11/9 (二) |
| 今朝早起身, 將矇豬個籠放回原位後 ( 平時我會將佢地 2 個籠移出D同泊埋佢, 唔係就唔係幾吹到風扇), 又唔記得鎖好對門, 結果當我出門口番學時就見矇豬係出面樓梯喇, 佢又自己開左對門走出黎啦, 其實對門都幾實架, 都唔明點解佢咁大力, 所以夜晚我就閂左佢睇佢開一次, 原來佢係係個邊到咬咬咬, 我諗係整鬆少少對門, 之後咬住門頂向前用力推, 再不停重複呢兩個動作, 大概4,5次到就比佢開到對門lu, 真係睇到我眼都突埋呀, 矇豬, 你係勁喎!! |
| 13/9 (四) |
| CC真係越黎越曳啦, 平時通常都係矇豬走上sofa 玩同屎尿既, 今日就到CC囉, 係度疴左一督超級大尿同好鬼多屎屎, 麻煩到死呀~~ |
| 14/9 (五) |
| CC今日好鬼奀皮呀, 走上去sofa 到咬, 之前己經比矇豬咬左個hole架啦, 佢今日就再係個一個hole 到咬, 扯晒裡面d 棉花同布出黎, 真係比佢激死呀~仲要明知我坐左係 sofa 佢都照跳上黎喎, 仲同我搶芒果乾食添呀, 幾鬼狼死呀, 我咪趕番佢落去囉, 點知佢就同埋矇豬打孖上黎, 一齊搶我d 芒果乾食, 結果我比左少少佢地打發佢地走, 不過之後都係不停咁跳上黎, 煩到死, 有一次CC仲失手, 因為佢跳上黎時我岩岩伸左隻腳出去, 搞到佢個頭同我隻腳撞個正著, 結果佢就垂直咁跌番落去lu... |
| 15/9 (六) |
| 今日帶左沙律去打針呀, 打埋呢支針就可去帶沙律去行街街啦, 今次冇用寵物袋帶佢去獸醫到, 因為佢大隻左好多啦, 所以就咁手抱佢, 唔知佢係咪有d 緊張呢, 'wear'到我實一實, d 指甲又尖喎, 結果搞到我件衫正中穿左個'lone'呀, 去到醫生到磅重, 嘩~~成8磅啦, 上一次都係得4磅渣, 上上次就得2磅幾, 每次都陪數咁上去, 下一次容乜易...架?? |
| 16/9 (日) |
| 而家因為沙律識得番去籠到屎尿, 所以媽咪成日都放佢唔放矇C, 所以我今日就用D板將間屋分左二面, 客廳比兔兔, 飯廳就比沙律, 唔知係咪因為熱, 我房又開左冷氣, 沙律成都走左入黎我房訓, 仲訓到留口水添呀~~ 而矇C, 就好努力咁用盡方法走過黎, 包括推開d用野頂到ok實既板啦, 仲有係好窄既位跳過去啦, 再唔係就跳上sofa, 再跳上sofa頂, 再係好高咁跳落去, 真係比佢地激死, 跳左過黎當然比沙律追啦, 想走又跳唔番過去喎, 結果當然係我去救佢啦, 唉...希望沙律快d可以同矇C做朋友仔啦, 咁就可以大家一齊放丫麻~~ |
| 17/9 (一) |
| 因為試圖將間屋分到一人一半失敗左, 所以又係要輪流放佢地, 好得阿媽歡心既沙律當然係成日比人放啦, 我要番學又唔係屋企放兔兔, 唉, 矇豬同CC 真係慘囉, 以前我一起身到我訓, 都可以放佢地出黎玩成十幾個鍾架麻, 而家?? 個十個鐘都冇, 所以我都好爭取可以放佢地既機會, 一番到屋企就抱沙律入房之後放佢, 因為沙律原來好鍾意係我將床訓覺豬架, 可能訓係D被到軟林林好舒服啦, 仲訓到推佢都唔起身添呀~~ |
| 18/9 (二) |
| 今日表弟落黎, 話CC大隻左, 望真D, 又好似係喎, 不過唔知點解, 就算矇豬大CC一個月都好啦, CC點都係細隻過矇豬一個size 既, 所以就成日比矇豬蝦佢啦, 呢一兩日都唔知做乜鬼, 矇豬成日走去un佢, 平時通常un到之後矇豬都會擺手架啦, 不過呢一兩日佢就不停咁追住阿C un, 搞到CC成日好似走難咁, 又想迫係矇豬側邊訓, 但又怕比佢un, 真係陰功囉... |
| 19/9 (三) |
| 今日有沙田柚食, 我當然又比少少佢地似下啦, CC就好鍾意食啦, 會追住搶黎食, 不過矇豬就...唉...都唔知幾時先會搵到一種生果係佢鍾意食既, 都唔明佢係咩兔仔黎既, 生果咁好食佢都唔食, 見到香蕉乾就發晒癲咁, 但真香蕉呢, 就好似聞到狗屎咁走都走唔切, 真係比佢吹漲~ |
| 20/9 (四) |
| 今日阿公生日, 所以屋企好多人, 沙律當然最開心啦, 有咁多人同佢玩, 搖尾搖到個patpat都左右左右咁郁, 而矇豬同CC呢, 就一於好少理, 扒係餐檯底到訓, 有時就兩隻都迫埋係個籠度唔出黎, 可以驚啦, 鬼咁多人係度belebala, 不過今日矇豬差d入左沙律個籠度呀, 佢兩隻手同成個身都入左去架啦, 得兩隻腳仔係出面, 幾驚佢入去疴屎疴尿呀, 係既實激死沙律都似呀, 平時沙律都唔多歡喜佢地架啦, 尤其是佢地有得食而沙律冇得食, 同我摸佢地既時候, 比佢知度矇豬當佢個籠係私人厠所時, 實發火都似呀, 好彩渣... |
| 21/9 (五) |
| 今日去左寵物城, 安哥拉唔見左啦, 唔知係咪比人買左呢? 不過係個度就見到隻好惡死既唔知咩鼠, 我只不過係伸左隻手指埋個籠到, 都未黎得切縮, 佢就一大啖咬左落黎呀, 好鬼死痛呀, 只後放隻手埋去佢都好狠死咁想咬呀, 真係惡到不得了~~~ |
| 22/9 (六) 沙律第一次行街街 |
| 今日第一次帶沙律去行街, 佢一出門口就唔肯行, 唔知係咪因為好驚呢, 所以我都特登抱佢行一小段路先再放佢落地下, 不過佢都係死都唔行坐係到, 有個小朋友經過問媽咪隻狗狗做咩, 媽咪就話"隻狗狗懶唔肯行囉" , 真係激死我, 之後帶埋沙律同阿媽去左許留山, 佢就發癲咁同我搶d芒果撈野食, 不過之後都係唔肯行呀, 除天帶佢去寵物店到買野比矇C 時佢會走圍聞, 咁岩個到又有隻史納莎仔仔, 佢仲聞沙律個pat pat 添呀, 到我走時, 沙律仲唔肯行出間寵物店, 而一出去時佢又係唔肯行囉, 真係冇佢修呀, 我諗黎緊呢幾日要同佢係門口實習下先得啦, 丫, 仲有呀, 佢唔肯係街到屎尿呀, 寧願死忍, 所以一番到屋企佢就第一時間衝入個籠到方便, 咁到有既... |
| 23/9 (日) |
|
今日又同沙律去左行街, 不過只係係屋企門口既小空地行下, 再慢慢擴大到附近既小巷, 不過佢會第一時間衝番屋企 (直跑之後轉右), 之後我帶佢去個條小巷後一條巷,
結果佢直跑轉右之後就係搵唔到屋企喇, 嚇到佢傻左咁周圍望, 諗番起都好笑, 仲有我表弟又帶埋花花出去, 跟住就係大家細膽鬥細膽, 鬥快跑番番屋企囉,
呵呵呵~~~ 不過都好左啦, 叫做肯行小小先啦, 好過冇~~ |
| 24/9 (一) |
| 今日矇豬終於都肯食少少菜啦, 因為佢見到CC 係咁食, 好似食得好開心咁, 佢就好唔抵得咁走去搶CC口裡面既生菜食, 我只前比佢食先, 佢唔食我先比CC既, 後尾CC都唔同佢爭, 走開左, 之後佢又唔食啦, 總之佢見CC食佢就食, 唔係就唔吼啦~ |
| 25/9 (二) |
| 因為兩隻兔兔實在太臭, 尤其是CC呀, 好鬼'neifei', 比矇豬整到成頭木糠又唔理, 比矇豬疴左d尿落個身到又唔理, 所以我今日就捉左CC上檯到同佢用粉洗個白白, 結果我個大肶又多左幾條血痕啦, 唉...痛死我呀陰功, 洗完之後就同佢剪左patpat附近d毛, 因為實在太污漕啦, 痴住晒d 軟便便佢又唔理, 濕濕臭臭咁, 好彩我反轉佢同佢剪時, 可能佢太驚, 都冇反抗者, 而矇豬呢, 就好鬼乾淨, 係一隻愛整潔既白兔仔 ^_^ |
| 26/9 (三) |
| 今日又帶沙律去練習行街, 佢...仍然係好驚呀, 同埋記住直跑轉右, 帶佢去後一條巷又係咁, 跑跑下突然發覺唔對路番唔到屋企就好鬼驚, 周圍望, 不過之後再帶佢去時, 佢都終於識得直跑轉左先番到去lu, 真係叻叻呀~~ |
| 27/9 (四) |
| 因為先一兩日舅母買左個電腦有好多紙皮箱, 所以我就拎左個大既落黎比兔兔玩喇, 矇豬見到簡直開心到不得了, 發左癲咁係度咬呀咬, 不消5分鍾, 已經將個紙皮箱咬左個窿, 佢仲要將個頭伸出去, 個身就仲係個紙皮箱入面之後扒係到, 搞到我仲以為係佢個頭kick實左入唔番去添呀, 不過CC就慘啦, 都未有機會入去玩, 個紙皮箱就爛左啦, 矇豬咬個陣CC 都唔敢走埋去呀, 淨係企係度望住矇豬發癲渣!! |
| 27/9 (五) |
| 繼ytd 矇豬係個紙皮箱發完癲後, 今日一起身, 發覺個紙皮箱另一邊又穿左個大窿喇, 阿媽就係CC今朝發晒癲咁咬架喎, 仲大過矇豬咬個一個呀~~ 兔兔既破壞力真强!!!! |
| 29/9 (六) |
| 因為就黎中秋, 屋企聽日燒野食, 所以阿媽阿左幾罐雜果黎整沙律 (食沙律呀!!), 我一打開個雪櫃諗住偷小小黎食時, 兩隻兔已經飛快地走左過黎我度, 係度聞下聞, 所以我就拎左一小粒水蜜桃比佢地食啦, 佢地兩個簡直係到搶呀, 不過我都冇再比佢地食lu, 仲有呀, 矇豬佢食椰菜呀居然, 我洗完比佢個陣佢唔食架, 之後CC食唔晒咁我就放係佢個草兜到, 點知隔左一陣矇豬就走去食lu, 唔通佢知到CC鍾意食所以之前讓佢?? |