                  |
| 1/11/2001(四) 沙律走甩左呀！ |
| 好耐冇帶過沙律出街囉, 所以今日就犧牲左d 訓覺既時間帶佢出去, 佢好似好開心呀, 周圍騰, 平時出街疴完屎屎就會自己跑番屋企, 今日就冇, 平時都唔肯行去垃圾站到, 今日又肯喎, 總之佢就大膽左, 到到都去下啦, 仲要冇尿疴都死要留低一滴去霸地盤喎, 我見佢咁開心, 咪又得佢囉, 拖住佢周圍行, 直到去到山洞位 (平時又係唔肯去, 因望唔到屋企佢驚驚~), 本來都好地地, 點知有架火車行過好嘈, 嚇到沙律記得原來佢應該係好細膽係驚架! 所以就發左癲咁, 洗出縮骨功, 居然可以將綁住手個一款狗帶甩開左, 之後就發癲咁一直跑, 嚇死我呀, 我就係咁邊叫佢邊追, 好似個癲婆咁, 咁大個女都未試過跑得咁快呀, 我又驚會有車撞親佢, 又驚比佢走甩, 好彩佢跑到去屋企附近定左渣, 唔係我真係唔知點算呀~~~嚇死... |
| 2/11/2001(五) |
| 唔知係咪因為平時沙律成日都係CC個籠到搶佢d草食, 所以CC今日就有樣學樣, 係沙律個籠到咬同扯d 報紙出黎, 都唔明有乜好扯既, 話晒都係墊屎盤既報紙黎架麻, 真係比佢激死呀, 鬧完佢一陣又番去咬過, 有尿都係咁話, 照咬照扯, 真係冇佢修呀~ 仲有呀, 矇豬愛上左食提子呀, 一比佢佢就會成粒搶左去放入個口到, 之後先慢慢𡁻, 哈~原來佢個口咁大架喎, 仲要食到 '雜雜'聲添呀~~ |
| 3/11/2001(六) |
| 今日同佢地清籠時, 矇豬又走去磨CC個屎盤啦, 今次仲要由左上角開始, 順時針圍左一個圈咁磨, 去到左上角先停, 好似人地劃個d 咩驅魔圈咁, 之後又跳上個籠頂度磨, 唉...呢隻兔兔真霸度呀~~ |
| 4/11/2001 (日) |
| 大意既我, 又好唔小心咁將個電話放左係sofa 到唔記得拎走喇, 結果...結果我個霸王兔電話繩...隻霸王兔個頭嗰一個厠所泵, 就比矇豬食左啦, 真係激死我呀, 不過都好彩, 霸王兔d眼耳口鼻都咁係到, 條繩都冇斷到, 都叫做好好彩囉... |
| 5/11/2001 (一) |
| CC做左沙律鄰居一排, 都好似大膽左少少喎, 而家走埋去摸佢都冇即刻走, 又會自己行埋去沙律個籠到聞下聞下, 就算放左沙律出黎, 佢都唔會話走到影都唔見, 不過就會哩係矇豬後面, 都好好架啦, 叫做有進步咁啦!! |
| 6/11/2001 (二) |
| 今日同左沙律去打瘋狗症針同拎狗牌, 佢都好乖丫, 係打晶片時叫左一叫, 又肯行喎, 唔似得以前咁細膽lu, 佢而家呀, 不知幾鍾意行街, 一帶佢出去就周圍走, 又跟住d 三唔識七既人行喎, 八掛到死呀~~ |
| 7/11/2001 (三) |
| 不過其實矇C都好八掛架, 好似掃地咁丫, 佢地都會好似沙律咁八八掛掛咁, 個掃把係邊佢地就走去邊, 搞到比阿媽話佢地好煩, 想安安樂樂掃乾淨個地都唔得, 掃兩野就要 '矇豬打死', '打死你呀CC' 咁, 哈哈, 身為一個旁觀者睇到都幾好笑架~~ |
| 8/11/2001 (四) |
| 今日矇豬佢打我呀, 話說我係到掃佢地d 木糠時, 將個掃把'埃'住張sofa, 諗住同佢執左個籠d 屎時, 佢居然...係到咬走個掃把, 然後個掃把就'POK'一聲咁跌左落我個頭到啦, 跟住仲要若無其事咁望一望我之後走左去喎, 真激死, 夜晚, 佢同CC又大打出手啦, 雖然平時佢地都成日互追住黎'unun', 不過都好快停, 但係今次就唔係喇, 首先大家都追住對方個patpat, 都轉成左7,8個圈, 擒唔到呢, 就扎個馬想打, 我走埋去佢地又走, 之後又追patpat, 跟住就砰鈴嘭蘭打起上黎喇, 我都控制唔到佢地, 跟住呢, 咪成地毛囉, 再望望佢地, 又痴埋一齊訓囉, 真冇佢地符呀!! |
| 9/11/2001 (五) |
| 今日準備出門口番學時, 見到CC傻鬼左咁係個草兜到擔d草出黎, 可能想食係底個一d啦, 個草兜又高佢用唔到隻手挖出黎, 所以都見佢擔得好辛苦下, 不過最搞笑係我大叫'CC'時, 佢一望個黎, 好似d 傻婆咁, 成塊面都係d木糠同草碎, 個頭又有幾條好短既草, 總之好鬼'污wear'好鬼傻啦個樣, 連阿媽都忍唔住要笑佢呀~~ ^O^ |
| 11/11/2001 (日) |
|
今日一起身, 又見到CC個籠舖滿晒草喇, 佢個衰豬, 又將D 草逐條逐條咁擔晒出黎, 雖然d 草草唔係好貴, 但係都唔好咁樣浪費d 食物丫麻, 佢擔完落個盤到又唔食先衰喎, 擺左份報紙係佢個籠頂諗住同沙律換個盤個d , 轉個頭就比佢撕爛左, 係個籠裡面都死要企係身, 抬高個頭撕將報紙落黎既, 而矇豬, 之前磨阿沙律個籠都算數啦, 今日仲霸道到走入厠所, 跳左上沙律洗白白個兜度, 仲要疴左四粒屎喎, 比沙律知道呀, 實嬲死都似呀!! |
| 12/11/2001 (一) |
| 今日CC唔知做乜, 想困住矇豬呀, 猛咁係到頂矇豬個籠對門, 想閂埋去, 不過又唔夠力, 推到對門上個又整唔實, 跌番落黎, 搞到有時仲仆到自己個頭添, 不過佢冇因為咁而放棄, 都係繼續頂, 都唔知佢搞乜鬼, 呢排都神神化化咁... |
| 13/11/2001 (二) |
| 今日同沙律玩氹氹轉呀, 即係捉住佢隻手要佢用腳行, 之後係到轉囉, 轉到我暈就停囉, 不過佢都行得好穩, 一條直線架喎, 之不過...到夜晚佢就嘔喇, 仲要嘔左3次添呀, 嚇死我, 唔知關唔關我事呢, 因為仲有位仁兄好惡咁打佢黎, 唔知佢係轉到嘔定係嚇到嘔呢? |
| 14/11/2001 (三) |
| 今日好凍呀, 夜晚同沙律去行街街時, 見到隻金毛呀, 沙律即刻好八掛咁走埋去, 之後互聞左一野, 隻金毛想同佢玩, 撲埋去, 點知就嚇到沙律係咁要走啦, 所以我都即刻抱起左佢, 真係冇鬼用呀, 又係佢自己走埋去人地隻狗到先既, 之後又要驚喎,唉... 講番呀矇豬, 今日佢好慘呀, 都唔知邊個咁冇陰功, 困左佢係toliet呀, 我一開門就見到佢好不滿既樣同成地屎喇, 我問邊個困佢又冇人認喎, 哈哈, 不過一開門見到佢樣都好好笑呀, 而CC呢, 今日就係到推沙律個籠, 都唔知點解咁重佢都推都郁既, 就本來貼住牆變左有一條罅, 唉...沙律真係慘呀... |
| 15/11/2001 (四) |
| 今日同沙律出去, 又見到金毛啦, 好似叫阿Mark呀, 佢今次離遠見到都走定先, 連屎都唔敢疴呀, 你話死唔死丫, 要行到無雷公咁遠先肯疴, 佢呀, 真係欺善怕惡呀, 係屋企就巴巴閉咁蝦阿花花同矇C, 出到街見到D大狗就驚要我抱抱, 唉...冇鬼用架~~~ |
| 16/11/2001 (五) |
| 今日好眼訓呀, 所以夜晚放左兔兔之後就去左訓一陣, 當我起身個陣, 唉...沙律又比佢地蝦啦, 因為個籠前有一大督尿尿呀, 矇C又向沙律示威喇, 唔怪得之沙律成日想撲佢地啦~ |
| 17/11/2001 (六) |
| 呢排CC真係好麻煩呀, 之前就唔知做乜野成日扮龍貓, 而家就成日續條續條草擔出黎, 每日比一兜草比佢, 每朝起身都見到佢個兜係吉既, 都唔知有乜辦法, 好浪費架麻, 拎d 食物去玩喎, 真係寧願佢扮下龍貓踩實d 草呀, 又污'wear'喎, 成日個pat 痴住d 軟便便都唔理, 跑個陣d 屎屎就 '定'下'定', 真係比佢激壞呀~~ |
| 18/11/2001 (日) |
| 今日矇豬又霸左個新地盤, 侵佔沙律既財產喇, 平時都會係沙律個籠到磨下磨下架啦, 今日仲衰到跳上CC個籠頂到磨埋個上半部添, 仲有個水樽呀, 全部都係佢既, 差左邊籠頂未磨渣, 真係頂佢唔順呀, 幾驚佢跳入去沙律個籠到係, 後果真係...都唔敢諗呀~ |
| 19/11/2001 (一) |
| 今日終於買左張新床比沙律啦, 好靚架, 仲有半個頂添, 佢都好好奇咁聞下聞下, 為左比佢知道張床係佢既, 我就將佢d 玩具放左入去, 點知佢就同我逐件逐件拎番出黎, 好似話我好收埋佢咁...不過到左夜晚,應該係第二日零晨我訓時, 將佢張床放左係我門口到, 我裝到佢都訓左係床到呀, 真開心呀~~ 咁快就認得啦喎! |
| 20/11/2001 (二) |
| 矇豬今日係度練左幾次三級跳, 首先係跳上茶几, 之後跳上自己籠頂, 再跳落CC籠頂, 跟住著地, 好完美架個動作, 中間完全冇停頓過, 如是者都跳左幾次, 傻傻地架... 仲有呀, 我既一時大意, 又令沙律財產受到威脅喇, 因為我放矇C時唔記得收理沙律張床呀, 只係一分鍾唔夠, 矇豬己經發現左呢樣野, 仲走左入去疴左幾粒屎添呀, 趕佢都唔走, 要抱佢出黎, 仲要比沙律望到添, 唉.... |
| 21/11/2001 (三) |
| 因為之前矇豬有翻糧兜既紀錄, 所以佢個兜兜我係用個夾夾住左既, 點之...佢都居然可以將個兜搬出黎, 都唔明點解可以咁大力既, 都夾得ok 實架麻, 搬左出黎之後又要猛咁將佢搬黎搬去, 嘈到死呀, 真係麻鬼煩呀呢隻兔~ |
| 22/11/2001 (四) 沙律佢...咩呀~
|
| 今日, 我發覺左一樣野...就係...沙律己經大個女啦, 因為佢有period 呀, 之前我都覺得奇怪架啦, 無啦啦地下有d印, 我開頭仲以為係矇豬d 尿印, 點知今日見媽咪見衫有幾滴血, 我件衫又有, 先知原來係沙律架, 唉...麻煩呀, 佢周圍滴, 我就要周圍抹, 又唔抱得佢喎, 廢事整污漕件衫麻, 好彩佢既情緒都叫穩定啫~~ |
| 24/11/2001 (六) |
| 矇豬今日又扮大肚喇, 因為佢又係咁'蚊'自己心口d毛啦, 之後又含住佢, 等食野時先吐禾黎, 或者等我同佢'蚊'走去, 成日都係咁神神化化既, 仲有呀, 佢'蚊'自己個d 就算啦, 仲要'蚊'埋cc個d 喎, 又成日'fei' d 尿去cc個身到, 搞到佢幾鬼死臭呀, 真衰~ |
| 27/11/2001 (二) |
| 哈哈~ 因為我既大意, 同矇豬又太矮, 所以...我又唔覺意咁困左佢喇, 不過呢, 今次就係廚房, 真係慘呀佢, 成日比人困, 鬼叫佢咁為食, 成日跟住人行以為有得食咩~ 正一跟尾兔黎架~~ |
| 28/11/2001 (三) |
| 今日賊仔矇又出動啦, 目標係papaya, 可惜就失敗左, 不過呢, 佢就偷左包防腐劑走喎, 咬住佢周圍走, 以為自己執到寶咁, 好彩我追到佢搶番渣, 唔係比佢食左就不得了啦~~ |
| 29/11//2001 (四) |
| 矇豬佢又搞破壞啦, 就係咬左半個無線電話既 9 字走喇, 我己經將佢放係個sofa頂架啦, 點知都逃唔過矇豬個魔口... |
| 30/11/2001 (五) |
| 矇豬又有一個佢自己定既新厠所位喇, 就係平時用黎放沙律張床個度啦, 我放兔兔時就會收起張床, 今日呢, 矇豬就係呢個位疴左19粒屎同一大督尿尿喇, 可能呢度有好勁既狗味, 佢要覇番個地盤啦, 所以就勁疴, 覇唔到都要沙律邊聞佢d屎尿味邊訓, 唉...難怪沙律一見佢就撲埋佢既~~ |