                  |
| 1/12/2001 (六) |
| 以前, 矇豬好唔鍾意人地搞佢個下巴仔, 一掂親就會成隻兔彈起, 好搞笑, 而CC呢, 就話知你既, 總之有野比佢食就ok, 不過今日我發覺原來佢仲大反應呀, 事緣我見佢係到咬左d報紙食, 咁我咪搞下佢下巴囉, (平時咁搞矇豬佢會即刻吐番出黎), 點知佢就成隻彈起, 成尺高呀, 嚇得我丫, 之後我再搞, 佢又彈起, 今次加埋手勢添呀, 邊彈起邊係到挖挖挖 (注意, 係係空中做呢個動作既), 哈哈~佢咁樣, 反而搞到我想整多佢幾次添呀~~~ |
| 2/12/2001 (日) 草兜下有寶?
|
| 今日見到CC係咁挖個草兜下面, 又將個頭攝入去個一個好窄既住到, 仲要再將個頭反轉喎, 所以就走埋去睇下個草兜下面有乜咁巴閉, 原來有一粒咁多既日本糧係度, 都傻傻地既, 為左一粒糧搞到自己咁辛苦, 明明個頭係圓既就變左個長方形, 真係為食呀~~ |
| 3/12/2001 (一) |
| CC越黎越惡啦, 成日同佢執個籠d 屎時就就埋黎頂開你, 再唔係就一啖咬落黎, 今日又係, 同矇豬執屎時又走埋黎, 咩都關佢事咁, 仲要我都冇阻住佢就一啖咬落我大肶到, 痛到我丫! |
| 4/12/2001 (三) |
| 今日同阿媽一齊帶沙律行街, 因為仲滴緊血血, 所以都吸左d 狗公呀, 明明隻金毛同佢有段距離, 仲要中間有欄杆, 都要兜個圈走地撲沙律, 好彩我抱住左佢渣, 隻金毛幾狼死呀, 我抱住左仲撲, 仲要聞下佢個度添呀, 之後又見到三隻大狗, 一見沙律又停左唔行眼定定咁, 所以我都快快趣抱佢番屋企囉, 因為有一隻係拳師黎, 撲埋黎真係嚇死我都有份... |
| 5/12/2001 (三) |
| 今日終於去左寵物城買有味鹽磚比佢地囉, 每隻味都買左一粒, 都唔知點解會突然間鍾意舔既, 之前買比佢地時show 都唔show 下, 之後冇幾耐就狂舔, 買到番去, 第一時間將4粒掛晒係CC個籠到, 而佢都第一時間就去舔, 仲4粒舔晒試味添, 不過好似最鍾意蘿蔔味喎, 定係因為掛得最低方便呢? 而矇豬一見到就冇即刻舔, 但就係咁用個下巴磨, 磨完呢邊到個邊, 仲要4粒一齊添, 真係比佢激死, 咩都係佢既... |
| 6/12/2001 (四) |
| 今日開包新日本糧比矇C食, 小心既我, 為左唔好比矇C偷黎食, 所以我加比佢地時就放左係籠頂而唔放係地下, 結果...唉...倒瀉晒呀, 好似落雨咁洒晒係CC個頭到, 不過唔知係咪突然間有太多糧係個地下到, 所以都冇好瘋狂咁食呀, 好小心咁慢慢聞下聞下先食一粒, 又左左聞右聞咁食一粒, 好彩者, 唔係都唔洗執番佢LU... |
| 7/12/2001 (五) |
| 沙律鍾意左望窗呀, 因為屋企後面養左隻金毛仔仔(叫阿Mark, 都幾有型架!), 佢就成日企係我張床到望, 人地一出去行街呢, 就即刻係到奀奀聲, 成個頭伸出去個窗外面, 發晒姣咁, 真係頂佢唔順呀~~ 仲有呀, 呢幾日佢都唔係幾肯食野呀, 都唔知佢搞乜鬼既~ |
| 8/12/2001 (六) |
| 今日諗住同沙律帶條頸巾影相, 點知佢就伸長條頸係到"ouu~~~", 本來以為佢唔舒or 大緊唔鍾意啦, 後尾先發覺佢係唱歌, 因為個陣有人係到試電話d 歌, 哈哈~~ 不過佢唱得好難聽架, 走晒音, 笑死我~~ 仲有呀, 今日既零晨時份, 執到隻北京狗呀~~ 好鬼惡死架! |
| 9/12/2001 (日) |
| 矇豬平時好鍾意走去㕑房都八八掛掛, 不過今日呢, 佢就失察左dd喇, 因為佢入完去之後走去門後面挖挖挖, 跟住咪自己close 左對門囉, 之後就係黑媽媽咁困住左自己, 直到我入去先知囉, 都唔係第一次架啦, 真係蠢砵砵呀! |
| 11/12/2001 (二) |
| 今日又係要講下矇豬d 蠢砵砵野呀, 佢呀, 幾白痴呀, 平時都成日癲下癲下咁橫衝直撞, 今次佢就係toliet 個到直衝入CC個籠, 不過呢, 佢衝埋去時就將個頭攝左係對門下面, 跟住發生咩事? 咪頂埋左對門囉, 嘭一聲撞埋去呀, 真係笑死我, 之後傻下傻下咁走開左LU |
| 12/12/2001 (三) |
| 今日同沙律出街, 見到金毛仔仔阿Mark 呀, 佢當然係發晒姣咁唔肯走啦, 玩左一陣, 不過我就比阿Mark 鍚左兩啖呀~~ |
| 14/12/2001 (五) |
| 唉...一下唔小心, 唔記得推過小小沙律個籠, 就比矇豬跳上左CC個籠到, 食左沙律個水樽個粒用黎控制水既流量粒膠喇, 真係激死我啦~~~~睇少陣都唔得既, 咁就令個水樽冇左個分唇喇, 真係激死... |
| 16/12/2001 (日) |
| 今日開雪櫃時唔覺意比矇豬偷食左一啖蘋果呀, 因為佢太矮喇, 都睇唔到佢, 到我想close 雪櫃門時發覺佢爬左上去最底個隔時, 己經太遲啦, 個蘋果...己經多左一個窿喇~ |
| 17/12/2001 (一) |
| 今日見到沙律又發晒癲咁係到奀奀奀, 原來阿Mark去完街街番黎, 又有另一隻金毛出街街, 仲有隻金毛bb添呀, 搞到呀沙沙鬼死咁開心, 就黎成隻狗跳左出去, 女仔之家一d 矜持都冇, 唉.... 成日係到發金毛姣.... |
| 18/12/2001 (二) |
| CC今日偷 cookie食呀, 真係一隻為食兔黎, 咩放得落個口, 只要唔係肉既就岩, 仲有呀, 今日矇豬幾衰呀, 跳上sofa 頂尿尿呀, 我望住D 尿流落黎, 好似瀑布咁, 真係豈有此佢, 之後困佢時, 又將D 草搬晒落個盤到先食, 都唔知佢做乜既~ |
| 19/12/2001 (三) |
| 唔知係咪因為矇C成日去沙律放床個位屎尿, 所以沙律要霸過第二個地盤, 所以佢今日死都要將自己張床拉去第二個位到訓, 幫佢放番去原先個住, 佢又再搬過, 真係冇佢符呀, 仲有呀, 矇豬今日偷橙呀, 成個橙比佢係雪櫃到挖左出黎, 乜佢唔覺得個雪櫃好凍架咩, 成日扒係個雪櫃到, 有金執咩~~~ |
| 20/12/2001 (四) |
| 今日去洗白白時唔覺意, 比兩隻衰豬入左房我都唔知, 不過好彩, d 電線都完整無缺, 不過呢, 就好似有d 尿印囉, 唉...我房舖地毯架麻, 點洗者, 真係麻煩呀, 又要去買個d 唔知咩黎清潔喇~ |
| 21/12/2001 (五) |
| 今日CC又走去Un 矇豬啦, 不過矇豬個Pat 實在太大喇, 所以CC都Un 得好辛苦, 腳尖掂地, 之後矇豬一 '吉' 起個pat, CC就連腳尖都掂唔到地下, 但都堅持要Un多幾下, 結果? 咪比矇豬由屋頭追到去屋尾, 屋尾又追番去屋頭lu.... |
| 22/12/2001 (六) |
| 今日屋企搞大食會, 我個小表妹一見到沙律就開心到不得了呀, 成日抱住佢唔肯放, 搞到沙律到驚左去呀, 成日就去㕑房哩係阿媽隻腳到, 有時仲扮死訓係度肚向天唔郁添, 哈哈~ 真係慘呀佢!!! |
| 23/12/2001 (六) |
| 今日當我洗完白白出黎既時候, 又知道出左事啦, 就係我房塊膠版比佢地推開左呀, 結果我間房就變左佢地個遊樂場, 而佢地就比左一督尿尿我做入場費, 唉....激死我啦, 都唔知佢個D 咩牙黎既, 已經用野頂住塊版架啦, 都推得開走入去既.... |
| 24/12/2001 (一) |
| 今日又同矇C沙影左好多相呀, 不過最識擺甫士都係沙律啦, 仲要係扮可憐個一隻添喎, 而矇C呢, 就只要有野食就任你影, 唔係就啋你都傻, 不過我都影得好開心呀~~ |
| 25/12/2001 (二) |
| 呢幾日都買唔到矇C最鍾意食既日本貴糧呀, 行左幾間都冇得買, 全線斷左貨, 唔通d 人買野黎送比兔兔做聖誕禮物? 唉...唔知幾時番貨呢? |
| 26/12/2001 (三) |
| 今日零晨時份困左矇豬, 掃完地之後, 見到佢成個籠都係毛毛呀, 佢又係到拔胸毛啦, 都唔知做乜鬼, 天氣咁凍仲要抆走d 暖笠笠既毛毛, 成日係到扮生仔, 都唔知佢做乜鬼既... |
| 27/12/2001 (四) |
| 今日叫做係考完試後最得閒既一日, 冇街去冇野做, 所以就黎同矇豬個籠大掃除喇, 因為實在太臭啦, d 尿積有成1mm厚呀, 一路洗一路剷, 手都痺埋呀, 不過總算比我洗到乾乾淨淨啦, 矇豬都好似好開心呀, 自己係個籠到打圈跳, 好似發左癲咁...... |
| 28/12/2001 (五) |
| 今日同沙律出左去美容呀, 番黎之後成個靚女晒呀, 又香噴噴喎, 不過 d毛毛都仲係有d 死結係度解唔開呀, 不過見而家咁凍, 所以都冇同佢剷左去, 不過佢今日好爹呀, 仲要唔係爹我, 而係爹第二個喎~~ |
| 29/12/2001 (六) |
| 平時CC成日都係到扯沙律屎盤d 報紙出黎, 所以, 今日沙律就以牙還牙, 扯番用黎同CC個籠保下暖既報紙出黎, 仲要撕到成地都係添喎~ 丫~仲有呀, 今日終於有矇C 最鍾意食既日本貴糧食喇 ^_^ |