|
|
| 1/1/2002 (二) |
| 今日, 我整親矇豬呀, 話說佢又將個草兜搬左出黎, 咁我諗住將佢放番好啦, 仲要整實d 喎, 點知見到矇豬係到狂跳, 先知原來夾住左佢個耳仔尖呀, 嚇得我呀, 好彩都冇乜事, 我都即刻比左d 佢最鍾意既野佢食, 等佢掛住食時唔記得左隻耳仔痛, 都好似行得通喎~ |
| 2/1/2002 (三) |
| 今日我又好似整親矇豬呀, 因為去洗白白時閂門好似夾到d 野, 但之前明明見到地係老遠架麻... 無啦啦一支箭咁衝埋黎, 好彩都冇乜事... |
| 4/1/2002 (五) |
| 今日想同CC剪指甲, 發覺佢腳板底有個傷口呀, 己經結左'蕉', 都唔知幾時陣緊既, 又唔覺佢有留過血...不過今日同佢剪指甲失敗左, 因佢反抗得好勁, 所以剪左幾隻都冇再剪囉, 聽日再努力過~ |
| 5/1/2002 (六) |
| 今日到同矇豬剪喇, 方法又係用食物黎分散佢注意力, 所以都好成功, 係差一隻佢成日收埋左我剪唔到者, 都係個句, 下次努力過~ |
| 6/1/2002 (日) |
| 聽日就要去台灣啦, 真係好唔捨得矇C沙呀, 所以今日特登去買左d 蘿蔔咬咬棒個d 比佢地, 同好詳細咁話比媽咪聽點照顧佢地, 希望佢地乖乖地啦, 矇豬唔好成日追住CC要 UnUn啦, 你知啦, CC好細膽架麻, 嚇死佢呀~~ |
| 7-10/1/2002 (一 ~ 四) |
| 雖然身處台灣, 不過我都會打番屋企報下平安同睇下個三隻衰豬咩情況, 不過9/10 個日打番去, 媽咪話 8/1 個日上完樓上食飯之後, 一落到黎就見到成地血, sofa前有幾滴, 我房門前又有幾滴, 最勁係廳中間, 有一大灘血印, 嚇到我死死下, 仲要有好多爛便便喎... 應該係踩扁左既葡萄串, 不過好彩話佢既食慾個d 都好正常, 之後d 爛便便都少番, 真係嚇得我丫~~~ 講番係台灣, 好開心呀, 比我見到好多超可愛迷你兔呀, 粉可愛耶! 仲有買到橘子既兔兔書, 不過三本當中買到一本渣, 都好過冇啦~~ 今日一番到去, 沙律第一時間好興奮咁撲埋黎, 不過係撲埋去d 食物度, 真係激死, 應該撲去我到好歡迎我先係架麻... 而矇豬CC呢, 都好正常, 係度食食食, d 屎屎都圓圓大大, 咁都放心d~ |
| 11/1/2002 (五) |
| 今日抱起CC睇下係咪佢收傷, 發覺腳板底有d 血漬, 不過又搵唔到exactly 個傷口係邊, 摸過佢個身都冇, 我諗都係隻腳仔整親囉, 而矇豬呢, 都係腳板底有d 血漬, 不過應該係啋到地下d 血染番黎既, 唔知係佢地大打出手定係點整到, 不過安全起見, 我都好指細咁檢查過屋企, 將d 比較尖既東東包好佢, 牆邊以前用黎固定電總既東東拔走佢 (最大嫌疑犯), 希望唔會有咁既情況再出現啦~~ |
| 12/1/2002 (六) |
| 今日係到玩係台灣左買番黎, 吹得嚮既陶笛, 點知...沙律又跟住係度唱歌啦, 粉難聽的~~~ 超低音加走音, 笑死我, 佢今次表演唱左三次呀, 之後再吹佢走唔啋我lu, 不過真係好好笑~~ 仲有呀, 矇豬成日都發癲咁追住CC呀, 都唔知做乜鬼, 成日都蝦佢, 不過跟住又好似糖痴豆咁, 都唔知佢想點既~~ |
| 13/1/2002 (五) |
| 養左矇C咁耐, CC既身型一直都冇矇豬咁大, 不過今日我突然之間發覺CC佢...居然有肉垂呀!! 佢變左一隻圍巾兔呀~~~ 再睇下矇豬, 原來都有小小喎, 不過就冇CC咁勁囉, 好鬼搞笑呀佢個樣, 個頭托左係條頸巾到, 不過我再走埋去摸下, 全部都係毛黎既~ 不過CC d 毛又真係比矇豬多喎, 總之佢個樣好搞鬼啦~ 哈哈~~ |
| 16/1/2002 (五) |
| 沙律唔知係咪悶得滯, 夜晚個整自己咬住隻 BearBear熊係到狂跑, 屋頭跑去屋尾, 再跑番轉頭, 好似發左癲咁, 唔知係咪成日都比我搶到佢隻 BearBear熊, 所以係到練習定呢? |
| 17/1/2002 (五) |
| 夜晚諗住同兔兔執屎籠時, 見到一個兔窩呀~~ 成個地下都係矇豬 d毛毛, 有成三個乒乓波咁大呀, 呢排睇到 d 資料講拔毛, 話原來兔兔有假妊娠架, 唔成功既交配之後會以為自己有左BB, 所以要做個兔窩, 唔通矇豬以為自己同CC 結左婚, 有左BB ?? |
| 19/1/2002 (六) 矇豬傷左呀!! |
| 今朝諗住困番矇豬入籠時發生左意外呀, 我扣完佢個籠冇幾耐時見佢係咁係個籠到跳, 係到掙扎, 原來佢抓籠時張隻指甲 '食' 左係個扣到, 結果掙扎時成隻指甲扯甩左, 當堂流左好多血, 望住佢一滴滴咁滴落黎, 仲要一直都唔係幾止血, 佢又係個籠到跳黎跳去, 為免佢再整親個傷口, 所以我都冇困佢, 又得佢係個廳到靜靜地, 等到朝早獸醫一開門, 就帶佢去睇醫生啦, 個陣都成地血印啦... 去到醫生到, 佢都好緊張呀, 心跳加速, 又努力掙扎, 結果就比醫生用條大毛巾包住佢喇, 醫生話個指甲係分左兩層, 而家得番𥚃面層膜包住條血管, 所以好容易就會再整傷, 所以就同佢紮住左, 因為怕佢會舔同咬個傷口, 所以要戴住個伊莉莎伯罩罩, 好慘呀, 不過佢個樣又好搞鬼喎~~ |
| 20/1/2002 (日) |
| 因為醫生話要困住矇豬, 唔好比佢周圍走, 所以而家淨係放CC一個出黎, 佢都好似冇咁開心咁, 出左黎周圍勁磨完一輪之後都冇再走黎走去, 不過冇左矇豬, 地下都冇咁多屎呀~~ 夜晚打算去困CC時, 佢都自己番左入籠囉, 唔知係咪冇左矇豬陪佢佢悶呢? 而矇豬就唔知做乜, 好鍾意食草呀變得, d 屎屎都多左好多, 仲有d 軟便便呀, 佢因為戴住個罩所以食唔到, 要我執番黎餵佢呀, 不過有d 就比佢踩扁左冇得食lu... 希望佢快d 好番啦~ |
| 21/1/2002 (一) |
| 今日起身係個籠既一邊見唔到矇豬, 開頭都冇為意既, 後尾發覺有d 唔對路, 走去望下, 發覺佢張個罩整起左呀, 去左個鼻同眼中間, 嚇死我呀, 幾驚佢會箍住自己條頸呀, 因為佢個罩有條繩箍住架, 好彩冇事渣, 嚇得我丫~~ 幫佢整番好之後唔夠10分鍾, 又見到個罩扯左上去, 結果就要同佢扣入一格, 整細d 個圈圈啦, 真係令人擔心呀, 我又要番學冇得係屋企睇住佢喎, 呢隻兔真係曳呀~~ |
| 22/1/2002 (二) |
| CC冇左矇豬陪, 唔知係咪好悶呢, 出度黎都冇乜點走黎走左, 淨係扒係個餐檯底都發呆, 仲比我見到佢打喊露添, 我都係第一次見渣, 不過佢個口就冇矇豬咁大囉, CC 不嬲都好有儀態架~ 講番矇豬, 佢呀, 成日都想出籠玩, 我一同佢執屎就係到猛咁頂我, 真係麻煩, 佢隻手手塊紗布都甩左一半添呀~~ |
| 23/1/2002 (三) |
| 今日起身睇矇豬, 見到佢塊紗布己經甩左出黎啦, 你地話丫, 己經戴住左個罩架啦, 都仲可以自己除左塊紗布既, 可想而知佢有幾奀皮呀, 話晒塊紗布都包得ok緊又有d '痴'力架麻, 真係激死, 之後仲衰, 個罩又係比佢整左上個鼻鼻個到, 都箍左最埋個扣架啦, 都唔明點解可以咁既, 之前都試過咁樣係除唔到架啦, 又令到自己辛苦同唔舒服, 都仲係要咁樣既, 真係冇矇豬符呀~~ |
| 24/1/2002 (四) |
| 今日同左矇豬番獸醫到check, 個傷口都埋得好好丫, 好彩啫, 都放心d, 夜晚放佢出黎時, 唔知係咪困左咁多日又紮住隻手戴住個罩壓力好大呢, 一出到黎就追住CC咬, 又入CC個籠到追佢, 搞到CC成隻兔訓低左肚向天, 我去阻止佢地個時都比矇豬咬左一啖呀~~ 而CC, 咪嚇到傻左囉, 鬼叫佢咩, 襯矇豬唔係度時周圍死磨爛磨, 矇豬困左咁多日己經壓力大架啦, 出到黎發覺D 地盤比CC霸晒喎, 仲唔死, 而CC呢, 一見到矇豬離佢五尺跳緊埋黎就己經以極速跑定先, 我都未見過佢跑得咁快架, 仲要係開頭個4,5步係跑唔郁, 係原地跑架喎, 最搞笑係佢係咩都唔理, 總之知道矇豬黎緊就係咁走, 走完一個圈番黎(佢逃跑路線係...), 結果跑完仲近過唔跑, 因為矇豬跟本都冇追住佢, 真係好鬼好笑架, 哈哈哈~~ |
| 25/1/2002 (五) |
| CC 今日都仲係好驚矇豬呀, 雖然矇豬今日都冇再蝦佢, 追住佢un or 咬, 所以照樣矇豬跑埋去CC就會好快咁逃走, 真係細膽呀, 不過最得意既係有時矇豬扒左係到休息, CC就會以慢動作咁走埋去矇豬到, 戰戰兢兢咁聞下佢, 之後 'CHUM' 一聲逃走, 但係矇豬跟本就冇郁過, 隔一陣又係咁走埋去, 之後又係發神經咁 'CHUM' 一聲走左去, 真係好鬼搞笑架~~ 笑死我~~~ |
| 26/1/2002 (六) |
| 今日CC冇咁驚矇豬啦, 有時兩個都會痴埋一齊訓下覺既, 不過就到矇豬發神驚啦, 唔知係咪困左咁多日有得放出黎仲未開心完呢, 成日係到彈跳衝, 嘈到死呀~~~ |
| 28/1/2002 (一) |
| 今日矇豬又做左賊仔兔啦, 今次偷既唔係papaya呢d 喇, 而係熱浪薯片呀, 比佢搶左包薯片走左去, 好彩淨番少少冇倒到成個地下都係者~~ |
| 30/1/2002 (三) |
| 今日終於同左沙律去剪毛啦, 因為實在太長, 本來想等天氣暖番d 先既, 不過又唔想咁貼新年剪喎, 所以都係決定今日同佢去, 去接佢時差d 唔認得佢呀, 今次去試左第二間舖頭同佢開裝, 個身就好似今次呢度開得靚d , 個頭呢...就...剪得太短囉, 攪到個頭好鬼細, 成個啤梨咁, 好怪雞呀~~~ 如果我係佢, 實唔開心死都似, 下次再試下去第二度剪先得, 都唔明點解史納莎要剪到咁既樣既, 唔知如果d 西施呀, 北京呀個d 都剪到咁既樣會點呢? 哈~~實好好笑者, 咁如果矇C又會點呢?? 哈~~諗到都想笑~~呵呵呵~~~ |
| 31/1/2002 (四) |
| 沙律剪完毛之後皮氣好爆躁呀, 都唔知點解, 不過我發覺佢兩邊面既兩條鬚都剪左呀, 我聽過話動物既鬚係唔剪得, 因為有平衡同探測件用, 唔知對情緒有冇影響呢, 同佢洗耳仔個陣惡到丫~ 又咕我又想咬我喎, 以前都唔會咁樣既, 都唔知做乜鬼... 講番兩隻兔兔, 平時CC做咩都比矇豬慢半拍既, 不過今日同佢地影相先發覺原來唔止半拍呀, 係2,3拍呀, 因為又借左部數碼相機番黎, 諗住同 矇C沙影相, 平時影親兔兔都係佢地扒係到, 所以今次就諗住影動態d, 影下佢地跑步, 點知CC真係慢到不得了, 次次矇豬跑到黎佢先起跑, 仲要係原地跑2,3 下先跑得郁個隻喎, 慢吞吞到死, 攪到影親相佢都係好後面, 都冇可能影到佢同矇豬平頭跑既, 真係比佢激死呀~ |