                  |
| 1/2/2002 (五) |
| 平時成日都會收到阿媽既投訴, 唔係話矇豬咬爛野就係通到疴屎, 不過今日居讚佢喎, 佢話呢幾日同矇豬執屎時, 佢都會自動自覺跳上二樓, 唔係阻住晒, 直到執完先跳番落黎喎, 又會咁乖豬都有既, 不過其實可能係佢覺得阿媽好煩, 所以先跳上去避左佢呢~~ |
| 2/2/2002 (六) |
| 今日矇豬幾衰呀, 阿媽同佢執屎就乖乖咁跳上二樓, 我夜晚同佢執時, 佢居然佢我噴尿呀, 真係激死我, 擺到明 '合' 我者!! |
| 3/2/2002 (日) |
| 今日放晒三個女出黎, 諗住同佢地聯絡下感情丫麻, 開頭都好好地既, 點知突然間沙律走去攬住矇豬, 嚇死佢, 不過佢個size岩岩好可以哩係沙律四隻腳中間, 所以佢都冇比沙律踩親, 跟住就以極速逃走左, 而沙律就當然係比我仲住左囉, 鬼叫佢嚇家姐咩~~ |
| 4/2/2002 (一) |
| 今日一開琴房門, 居然見到矇豬一臉怨氣咁望住我, 唔關我事架, 係佢自己偷走入去, 之後頂埋左對門之麻, 又唔係我困佢既, 哼~ 睇下佢下次仲敢唔敢偷走入去丫拿~ |
| 5/2/2002 (二) |
| 今日一大清早比阿媽嘈醒, 佢話矇豬走左出黎呀~~ 叫我捉番佢入去, 因為個陣沙律都放左出黎, 我望一望佢個籠, 兩對門冇開到丫, 仲有d 夾夾實左添, 我又明明訓之前困左佢格, 搵到我好似睇緊金田一咁, 一個密室之謎, 不過係我困番矇豬入個籠之後, 呢個迷就解開左喇, 原來佢係跳左上三樓, 然後頂開個籠頂跳出黎呀, 個籠頂都放左番膠板紮住左架麻, 都比佢頂得起既, 唔怪得之cc 個籠頂有兩塊啦, 真係唔可以睇小呢隻矇豬呀, 真聰明~ |
| 7/2/2002 (四) |
| 今日開始大掃除, 而倆隻兔兔對碧麗珠就好感興趣喇, 成日走埋去聞, 係到搞搞震, 搞到又比阿媽鬧喇~~ |
| 8/2/2002 (五) |
| 沙律佢...佢又mm 喇, 乜狗狗唔係一年得兩次架渣咩, 點解佢得九個月大, 己經黎第二次架, 真麻煩呀, 佢周圍滴我就要周圍抹, 想抱下佢都要就住就住, 唉... |
| 9/2/2002 (六) |
| 今日去買左d 零食比沙律, 順便都買d 比兔兔啦, 公平d 丫麻, 左'簡'右'簡'之下, 買左包野菜餅餅, 都係第一次買餅乾比佢地食渣, 番到去即刻開左比佢地試, 矇豬就一d 興趣都冇, 而cc呢, 就鍾意到不得了, 係同我搶添呀, 幾鬼狼死呀, 後尾放左佢地出黎, 再比佢地食, 今次矇豬都唔執輸, 食左兩啖, 不過可能都係覺得唔好食, 所以都冇同cc爭lu... |
| 10/2/2002 (日) |
| 今晚收到媽媽電話, 話矇豬個籠又有d 血啦, 番黎一睇, 應該係佢成日係度 'wear' 籠想出黎時整親個舊患啦, 不過見佢都好似冇再流血,
個傷口都冇乜野, 都放心d, 希望佢d 指甲快d 生番出黎啦~ 丫, 仲有呀, 今日買左個厠所比矇豬, 諗住放係佢個籠到, 因為佢d 係底盤d尿積實在太難清洗, 次次都洗到我一隻野咁, 聽日同佢大掃除之後就會比佢用, 希望佢會比面啦, 之前買個一個呢就放左係cc 個籠到, 佢都好乖咁係上面屎尿呀, 不過就攪到佢休息既地方細左lu, 不過冇計啦, 鬼叫佢d 尿積咁難洗咩~~ |
| 11/2/2002 (一) |
| 聽日就係大年初一, 所以今日特登去百佳買左個大生菜同兩個富士蘋果比佢地食, 今次呢個生菜我唔會搶佢地食架喇, 次次買親都係我食得最多 =P, 今次唔會架喇~~ |
| 12/2/2002 (二) |
| 恭喜發財, 祝所有兔兔都健健康康, 快快樂樂~~ |
| 13/2/2002 (三) |
| 今日同沙律著左件紅色棉'立'仔上左樓上𢭃利是, 結果計埋媽媽個封有4封利是呀, 有百多元買野食lu, 不過要分d 比家姐呀, 因為二個家姐都淨係識得食, 訓, 拉, 所以𢭃唔到利是哦... |
14/2/2002 (四) 矇豬一歲生日呀!!
 |
| 今日係矇豬生日呀 (我定既日子), 不過因為出左街, 所以夜晚番黎先同佢開生日會, 有香蕉, 蘋果, 菜菜同蘿蔔仔呀, 不過當沙律想參加埋一份時cc就走左lu, 真係細膽呀, 而矇豬就唔理咁多係咁食, 緊係啦, 佢係主角黎架麻~~ |
| 15/2/2002 (五) |
| 唔知係咪矇豬唔想整污漕個新既厠所呢, 所以死都唔去個度尿尿, 佢個籠呢, 有兩個角落頭用左黎放糧兜同草兜, 只淨番個左上同左下兩個角落頭, 平時佢會係左下上角方便方便既, 不過當我放左個厠所係個度之後, 佢就走左去左下角方便, 好喇, 我放係左下角呢, 佢又走番去左上角喎, 真係激死我啦~~~ |
| 17/2/2002 (日) |
| 今日坐係 sofa 到食柑, 食食下唔見左一半, 周圍望下, 就見到矇豬係地下到食得津津有味, 佢偷我個柑食呀~~~ 個柑又甜又多水, 咁就冇左一半啦, 真係激死我呀~~ |
| 18/2/2002 (一) |
| 個新厠所放左係矇豬個籠都有一段小時間啦, 不過佢都仍然係唔用, 所以今日同佢做左一個小訓練, 就係將佢個patpat放係厠所上面, 之後要佢 keep 住呢個姿勢, 跟住就係咁比野佢食, 希望佢會鍾意企下上去啦, 唔好白費我 d 心機丫麻~ |
| 19/2/2002 (二) |
| 經過 ytd 既小訓練之後, 今日矇豬用厠所終於有小小進步喇, 都叫做有幾粒屎同小小尿係個厠所咁咁啦, 不過另一邊既角落依然係有好多好多屎屎尿尿呀, 不過都叫做好過冇啦~ |
| 20/2/2002 (三) |
| 好耐都冇同過矇豬剪指甲喇, 其實我都好怕同兔兔剪指甲架, 尤其是矇豬整親隻手, 成隻指甲扯甩左之後, 我最驚同佢剪個下佢掙扎一縮, 就會扯甩左, 不過冇辦法啦, 實在太長啦, 所以我又將佢最鍾意食既日文貴糧洒到成地係, 襯佢係咁食係咁食時手快快同佢剪, 好彩都叫幾順利, 不過發現佢有一隻腳指甲崩左呀, 好彩未到血管冇事者~ |
| 21/2/2002 (四) |
| 先兩日先讚完矇豬開始用厠, 點知細路仔真係唔讚得架, 會小氣架, 佢而家又唔用喇, 可能因為矇豬泊唔到個 patpat去個厠所到屎屎尿尿啦, 不過其實應該係佢唔肯泊既, 所以今日決定左同佢地換厠所喇, 將矇豬新個一個size 較細既比CC, 而CC 個一個大d既就放係矇豬到, 希望矇豬唔泊個patpat 埋去, 就直頭企上去方便啦~ |
| 22/2/2002 (五) |
| ytd 換左厠所之後, 好似好左d 喎, 兩個都有用到個厠所, 真係好喇, 不過矇豬唔知係咪嬲個厠所好 '呀咋' 呢, 將個厠所個隔網咬左出黎,
我己經夾實左架啦麻, 都咬得甩既...仲有呀, 今日拎番個蘋果咬咬樹幹出黎, 因為之前成日放沙律收起左, 一直都懶得拎番出黎, 佢地一見到咬咬樹幹之後就好似同佢有十怨九仇咁,
係咁咬係咁咬, 非要咬死佢不可, 不過呢個係咬咬樹幹既識責黎, 冇辦法啦, 好過佢地咬張sofa 麻, 雖則都咬到爛晒.. !_! 今日仲同左沙律睇醫生, 因為皮膚又有d 事, 結果矇豬同CC就成為左罪人囉, 阿媽話佢地係地下疴d尿整到阿沙律喎...我晚晚放完佢地都有拖地架...所以我都有幫佢地辯護下, 夜晚, 沙律食飽飽再食完葯之後嘔呀, 第一次嘔左係飯廳到, 即時嚇到佢哩係餐檯下面唔敢出黎, 驚會好似係籠外面屎尿咁比我地鬧, 第二次仲衰, 嘔係我房到, 我舖左地毯架麻, 好彩之前買左支去動物血,尿,嘔積既野番屋企, 可以洗下者, 唔係就慘lu~~ 丫, 仲有呀, 沙律好驚去獸醫到呀, 睇之前唔肯入去, 之後走時去左一間寵物店閒逛, 番轉頭時經過獸醫門口, 佢即刻由行人路行落馬路到, 兜一個半圓, 過左獸醫到先行番上行人路, 驚死我地同佢再入去咁, 笑死我~~ |
| 23/2/2002 (六) |
| 今日去買左個新籠比兔兔, 係仿意大利個一隻, 一層高, 不過個面積就大過佢地而家個一個, 本來諗住比矇豬既, 因為佢個籠放左個大厠所之後就好細, 放個細厠所佢又唔用, 不過困左佢入去之後, 佢就好似好唔開心咁, 企係身又企唔直, 所以決定由佢地自己choose, 我將三個籠擺到一個三角形咁, 由佢地自己跳黎跳去, CC好似好鍾意個新籠, 而矇豬就周圍跳下, 不過最終都係扒番係自己個籠到, 保衛家園, 不過原來兔兔都好現實架, 三個籠圍埋一齊時, 佢地己經唔會跳番去最細 (CC個一個) 籠到 lu, 到夜晚諗住困佢地個陣, 試左困矇豬係新籠到, 不過佢就搏晒命咁係咁咬個籠, 所以, 最後都係比左CC住 lu , 都好既, CC本身個籠都住過 Noki 同矇豬, 都三手屋囉, 而家有新屋住, 真開心呢~~~ |
| 24/2/2002 (日) |
| 尋日買左個籠有個好大既紙盒, 當然唔好浪費啦, 開左一個窿之後, 放左個蘋果咬咬樹幹入去, 就比左佢地玩喇, 佢地真係開心到不得了, 放左咁耐就咬足咁耐, 唔知係咪全副精神放晒係個紙皮盒到, 冇心情霸地盤, 所以都冇乜係籠出面屎屎尿尿, 不過個紙盒就慘囉, 一陣間就開多左兩個窿, 唔知佢可以挨到幾耐呢?? |
|
25/2/2002 (一) |
| 今日將CC個吊吊鹽磗掛左係矇豬個籠, 近住對門個到, 點知佢就好唔鍾意個鹽磗, 覺得係佢鎖實左對門, 係咁頂係咁咬, 即時個鹽磚冇左一小塊呀, 真係惡死~~ |
| 26/2/2002 (二) |
| 平時當我放兔兔時就會將沙律放入我房訓覺, 今日都唔例外, 不過當我出左房同矇C執屎籠時, 發覺沙律企左係口門 (我用膠板欄住門口唔比兔兔入去既), 所以我咪走埋去睇下囉, 原來矇豬又衝破障礙走左入我房, 係書枱底係咁挖啦, 搞到沙律好無奈, 明明訓得好好地架麻, 矇豬又係既, 都唔知死既, 話晒沙律都係隻大佢幾多下既狗黎架麻, 都唔忌佢三分, 二分都好丫~~尸 |
| 27/2/2002 (六) |
| 今日嚇死我呀, CC個籠頂有隻識飛既小强, 不過最驚既就係當阿媽打死左隻小強之後, 佢跌左落CC個籠到呀~~~!!! 同CC距離只有數 cm, 嚇得我即刻開左佢度門用野食引佢出黎, 幾驚佢會踩落去 or 走去咬呀, 好彩佢反應遲鈍都唔知有隻野從天而降渣~~~嚇死.... |