矇C日記

1/3/2002 (五)

兔兔係素食既係人都知啦，之前聽都人地就話出左ｄ雞肉味兔兔零食己覺得好怪，今日屋企有貓屎條（豬肉鬆條）食，我咪拎埋去比矇 C 聞下囉，矇豬好正常咁一聞到就走，不過 CC 佢呢就竟然．．竟然追住黎聞呀，仲想舔添，真係嚇得我丫，都唔知咩兔黎既，咁為食都有既～～

2/3/2002 (六)

平時同沙律出街，一見到其他狗狗佢就會係到 '鶯鶯' 聲咁叫既，發晒姣咁，但人地ｄ狗通常都唔多理佢既，最都都係望佢兩眼，今日，佢竟然吸引到隻鬆毛既大狗狗呀，見到佢時我都抱佢去另一邊行架啦，點知個隻狗狗就跟埋黎喎，我地行到邊，佢都係後面跟住，反而係沙律唔多理佢，吊高黎賣呀～～

4/3/2002 (一)

沙律又嘔啦，都唔知點解，都去醫生到換左葯架啦，腸胃咁唔好都有既，緊係平時襯我地唔為意時偷野食啦，今日先偷左舊我同佢梳出黎既死毛黎食，緊係怪我拎左佢ｄ毛，所以要食番喇～　仲有呀，矇豬同 CC 今日又打交喇，真係激死，好彩打完之後又好姊妹番，大家一齊訓，互舔下者～

5/3/2002 (二)

今日屋企有脆脆豬肉乾食，我又拎左試下 CC 喇，果然不出我所料，佢極之有興趣，又係追住黎聞呀，點解我隻兔兔會咁為食架，冇理由丫，佢主人都唔係咁架～

6/3/2002 (三)

平時一放矇豬，佢就會走去 CC 個籠度屎尿，食佢ｄ野同追住 CC Un ，嚇到 CC傻下傻下咁，今日矇豬都係一出黎就想走去 CC 度，而 CC 竟然大力踏左兩下地下呀，第一次聽到CC 踏地渣，我諗佢都真係好不滿囉～
仲有呀，今日去買狗糧時轉左隻 Sensitive Skin 既，希望沙律ｄ皮膚會好ｄ啦，正擔心佢唔鍾意食之陣，佢個衰豬竟然淨係 choose 晒隻新糧食，舊個隻都唔食喎，真激死！

7/3/2002 (四)

兩隻兔兔越黎越肥喇，所以我成日都拎住ｄ佢鍾意食既野引佢地跑，今日都唔例外，不過矇豬原來都幾鬼醒目架，我來回跑左兩、三次之後，佢就企左係度，好似知我會跑番轉頭咁，而 CC 呢就仲好努力咁慢吞吞跟住我跑喇，不過我當然唔會比矇豬計劃成功啦，所以我冇再跑番去就比野 CC 喇，佢見到之後就好心急咁即刻跑番黎，驚死比 CC 食晒咁呀～～

8/3/2002 (五)

沙律佢呢一兩日都冇乜食狗糧，淨係鍾意食零食同我ｄ野食，唔知係咪試過新糧後唔鍾意舊個隻，要扭野食呢，不過我當要唔會比佢得逞啦，由得佢餓下囉～

9/3/2002 (六)

今日睇完別有動物天，手痕痕同左沙律剪 PatPat 毛呀，哈～都幾好玩喎，而佢都好乖乖咁冇郁黎郁佢，由得我剪，本來想同佢剪埋腳皮底架，不過都係算啦，留番下次先，仲有呀，今朝餵佢ｄ舊糧都冇點食，淨番晒係度，度夜晚都仲係冇食，真係咁認得？？

講番隻衰兔，矇豬成日都好鍾意走去㕑房個樓梯底到玩，所以今日一開㕑房門就一支箭咁衝左入左，當我想趕番佢出黎時，佢竟然一個屁股向住我，然後噴尿呀，係我指尖會滴番落黎個隻，真係激鬼死我！！！不過 CC 又整親隻腳啦，因為我見到個地下又有血啦，不過我又捉唔到佢睇，跑得鬼咁快，我又驚再整親佢，見佢左血都冇再捉佢 lu...

10/3/2002 (日)

沙律己經練左神仙肚啦，為左扭野食，今朝都仲係冇乜點食到野，不過我我地食野時佢都仲好好氣力咁撲埋黎，唔通佢要減肥？不過到夜晚佢都頂唔順啦，差唔多食野ｄ糧，只係淨番少少～

11/3/2002 (一)

今日番左學之後，媽咪話沙律係咁對住空氣吠，同佢講野又唔啋，攪到媽咪都有ｄ唔知點咁，後尾先發覺原來佢係吠矇豬同 CC 既 5R相呀，佢以為矇 C 入左黎同佢爭房呀，　因為張相我呢一兩日先放係度，阿媽拎住張相，佢就跟住張相吠，正一傻狗黎～

12/3/2002 (二)

今日矇豬打翻左個草兜，搞到 '框框'聲死咁嘈，其實都唔知佢係咪好鍾意聽呢ｄ聲，所以先成日咬個兜出黎既，仲有呀，夜晚又走去偷日本貴糧食啦，激死～

13/3/2002 (三)

因為教極沙律都唔識係個地下打轉轉，所以決定教佢 stay，佢都好另丫，學左一陣都識識地啦，不過要捉住佢，等佢冷靜左先，咁佢就會乖乖地 stay 係到喇，都好叻架啦～～

14/3/2002 (四)

今日 CC 生日，所以我都特去買左ｄ野比佢地食呀，有蘋果同小甘荀，佢地都好似好開心咁呀，不過開心就係沙律啦，有狗餅比佢都唔食，一口就咬左舊蘋果啦，仲食得多過矇豬同 CC 呀，不過矇 C 都冇乜點理佢，各有各係到食，不過我今日先發覺，原來佢地兩隻都唔食甘荀架，但係蘿蔔乾就好好好鍾意食，真係奇怪呀～～

16/3/2002 (二)

今日幾經辛苦，終於同左 CC 剪指甲喇，搵到好似我想食左佢咁，嚇到佢傻下傻下，連佢既新歡野菜餅餅都唔食，只係用個下巴磨下佢就算，好鬼有骨氣架真係，不過就難委我喇，好似同佢打交咁～　剪剪下途中，矇豬仲衝破左我房塊膠板入左我房，之後就唔知點出唔番黎，好彩沙律訓到溫溫DunDun，冇撲埋去渣，淨係企係張床到望住，唔係就慘啦，所以我都即刻唔鬼理 CC 走去救番矇豬出黎，不過佢都好似唔知死咁，過一陣又想走入去，真係冇佢乎呀～

17/3/2002 (日)

今日矇豬唔知做乜鬼，係咁企係 Sofa 上面係咁挖，好似下面有寶咁，因為佢有前科（咬爛 Sofa），所以放佢時會舖番膠皮係 Sofa 上面，所以佢就搞到好鬼嘈，不過一見我行埋去時就會跳番落黎，我一走左佢又跳番上去再挖個痛快，就唔知做乜鬼～
沙律佢終於叫做可以自己控制下自己既情緒，望住ｄ食物時 Stay 係度，等我拎開個 Stay 既手勢，先至去食，不過就比我玩左幾次，話說我每一次重覆叫 Stay 時，都會拎高少少隻手再做過個手勢，但係沙律就會以為我係拎走隻手，即係有得食啦，所以會 '吉' 起個 PatPat 準備起身食野，點知又見番我隻手係到，所以又要坐番低，如是者就又 '吉' 又坐，好鬼搞笑架～～～

19/3/2002 (二)

唔知點解，當沙律入左我房訓學之後，後果兔兔走黎抓門塊膠板，沙律就會變得好鬼惡架啦，會吠兔兔同想撲埋去，但係平時一齊係廳都就冇乜野，只係好努力咁做一個兔屎搜尋犬，今晚去沖涼時，無啦啦聽到沙律係咁吠，原來大家姐矇豬又走去抓我房門呀，佢又唔理沙律繼續抓喎，搵到鬼死咁嘈，真係激死我～

20/3/2002 (三)

今日早放學，所以早左同沙律去行行街，見到隻史納莎呀，不過離好遠，只係見到個背影，所以沙筆個反應都唔係好大，沙律佢比我帶左番屋企之後，都好似冇乜見過史納莎啦，成日都係見到金毛呀，雪橇呢ｄ大狗，北京都見過下，同佢行左一陣先後，就帶左佢去許留山喇，因為我想食丫麻，叫左個芒果撈野，都比左一粒西瓜同少少撈野佢食啦，第三次食許留山啦，食完之後成個咀都變左橙黃色，變左個污嘈豬呀～～

21/3/2002 (四) 沙筆又痾又嘔呀～　

零晨時份，沙律佢．．竟然係我行開左時係我間房痾屎屎呀，仲要係有少少濕個隻添喎，真係淚死我，好彩之前買左支專清潔地毯既野番黎者，不過都係比我鬧架啦～～到我訓醒時，原來佢唔舒服呀，肚仔痛痾爛爛，仲嘔添，搞到張床仔都係要拎去洗，所以冇得訓，不過佢就死都要企係放床仔個位到，等張床仔番黎訓咁，有人黎又唔吠，比零食佢佢又唔多食喎，真係嚇死我，所以我放左學之後都去買完張新床仔比佢之後就快快趣咁番左屋企諗住同佢睇醫生喇，點之又鬼咁生猛喎，仲叫我玩BearBear熊添，吠都吠得好大聲，所以都係睇定ｄ先，不過佢都幾鍾意張新床仔，好快就走左上去訓LU～

23/3/2002 (六)

今日竟然比我見到矇豬成隻兔企左係佢個粉紅色厠所到呀，簡直難以置信，佢咁肥，個PatPat 又大喎，不過佢都企得好勉強，隻腳板隻都係踩住個厠所邊，哈～不過都冇諗過呢隻肥兔可以咁樣企上去喎，最衰冇相機係手啦，唔係一定影低佢～～　仲有呀，CC 今日幾勁呀，Un 矇豬呀，腳尖岩岩好掂到地下，企唔係幾穩，所以 Un 左幾下之後就比矇豬反追住佢囉，真係冇鬼用呀～～

24/3/2002 (日)

今日矇豬又追住 CC 蝦佢啦，我見到就緊係幫 CC 啦，所以我咪㩒住矇豬囉，點之比佢咬左我一啖呀，正一衰兔黎！

26/3/2002 (二)

今日比左ｄ青葡萄矇豬食，開頭個陣都係好慬慎咁試下味，不過之後就好大啖咁成粒放左入口到𡁻𡁻𡁻，不過夜晚就發現左幾串葡萄串呀，唔．．下次都係唔比咁大粒喇～

27/3/2002 (三)

今晚屋企得我自己一個訓，所以我就比沙沙上黎阿媽張床同我一齊訓喇，佢呀，成晚痴住晒，爹到死，係都要托個下巴係你隻手到訓，總之就掂住你啦，我訓過ｄ咩，佢又訓過ｄ，搞到本來可以一個人獨霸五尺大床黎訓，結過得番個２尺位，所以最終我就唔鬼理佢拎轉身，用個背脊對住佢，點之佢又用個背脊 '撻' 住我個背脊黎訓，真係吹漲，好彩等到佢訓到好似一隻豬時可以推開佢者，唔係就真係慘囉，迫到死呀～～

28/3/2002 (四)

沙律今日又見到佢個夢中情人阿 Mark 啦，不過係隔住個窗，佢都有走埋黎同沙律打左個招呼呀，不過之後就番左屋企 Lu，鬼咩，人地阿 Mark 而家有 MoMo 陪佢啦，MoMo 都係金毛黎架，不過都仲未好大隻，佢地就好啦，有個伴，唔知沙律幾時先可以搵到個伴呢？唔知雜菜幾時會出現呢？又唔知佢會係史納莎丫，定係八哥黎呢？

30/3/2002 (六)

今日好多同學黎左我屋企燒野食，所以好早就放左兩隻兔兔 Lu，跟住又好早困番佢地，而沙律呢，當然係成日有人同佢玩啦，不停咁 Sit 呀，Hand呀，Down呀，Turn呀，Stay咁，真係慘呀，雖然做完之後都有野食，不過今次都叫好啦，平時有陌生人係到時，佢就唔肯做動作架啦，有時仲會哩埋係餐枱底添，不過唔知係咪今日食左好多小食，所以夜晚都冇食飯，由５點到開始都冇尿尿添呀，可能多人係到佢怕羞呀，直到零晨成６點熄晒燈佢先肯痾呀，又會咁忍得既，而兩隻兔就話知你，係咁放地雷，一於臭死你地ｄ人咁～～

31/3/2002 (日)

唔知係咪矇豬同 CC 成日見我浸淋 d 糧比沙律食，所以有樣學樣呢？兩隻野唔知邊一隻今日就係個糧兜到痾左一督大尿，張 d糧浸到淋晒兼發大左，真係其臭無比呀，仲好鬼浪費添，都唔知搵食艱難既！！
仲有呀，今日我個小表妹又黎左喇，取慘就係沙律啦，係咁比我表妹捉住佢玩，捉住兩隻手係到行，又攬住佢，搞到佢一有機會就會哩去枱底，不過都係難逃比我表妹捉番出黎既呃運，真係慘呀～～