                  |
| 2/5/2002 (四) |
| 今日帶左沙律去林村河到玩呀，第一次放狗帶比佢自己走黎走去，佢都好乖冇走佬，仲好乖冇四圍騰，因為佢都幾驚呀，可能第一次見到咁多狗狗呀，不過佢同Corgi都幾好朋友咁，可能大家差唔多高好溝通啦，哈∼∼ |
| 3/5/2002 (五) |
| 今日又帶左沙律去林村，好多狗呀今晚，自係寵物店比我帶左番黎之後，第一次見到史納莎呀佢，不過佢好似對同種族朋友隻冇咩好感喎，仲驚比佢身型細隻既狗狗添，真係好鬼用，又成日都哩埋玩自閉，唉．． 夜晚放矇C時，唔知邊隻衰豬收埋我隻拖鞋呀，竟然收左係比佢地咬個一個紙皮盒到，搵死人咩！！ |
| 4/5/2002 (六) |
| 今晚準備同沙律出去練大膽時，見到阿mark，佢又好開心喇，唔似得係林村到發呆，仲懶係身手敏捷咁撲黎撲去，又有ｄ驚，又想玩喎，真係冇佢修∼ |
| 6/5/2002 (一) |
| 今朝晨咁早比阿媽叫醒左，話CC出左黎，下？？唔係困左佢架咩，唔通我唔記得Close 好對門咁大慒？唉．．要困番佢真係慘，一知我捉佢就哩係
Sofa後面，搵掃把掃佢出黎，一埋去又哩過，搵左我鬼咁耐，都唔諗下我幾咁眼訓既．．．又要考試喎，想訓好ｄ都唔得，真慘∼∼ 考完試番到黎，唉．．個handfree比沙律咬鬼爛左，真係激死，咩都咬一餐，今晚要夾住個電話黎講喇，不過今晚同佢出去時冇咁驚囉，都有周圍走下∼ |
| 8/5/2002 (三) |
| 今晚困兔兔時，因為CC唔入籠，所以就困左矇豬先啦，點知佢見CC係出面走黎走去發皮氣呀，大大力踏地，我係廚房洗緊菜都聽到，所以就去睇下咩事，淨係見到CC好得戚咁企係矇豬個籠側邊，矇豬就一臉怨氣咁望住佢踏地，我都係第一次聽就矇豬踏地渣，哈哈，真搞笑！！ |
| 9/5/2002 (四) |
| 零晨，諗住去訓時岩岩見沙律醒左，兩雙耳仔向後，仲好似係度震，原來佢係地下痾左屎呀！！！本來都想鬧佢架啦，要痾屎抓門丫麻！！點知發覺ｄ屎有蟲，嚇鬼死我，毛管都棟埋，所以就算數啦，考完試之後就即刻走去同佢買杜蟲葯食，原來都好一陣子冇杜過腸蟲囉∼ 買葯時順便去買菜比矇C食，比百佳呃左呀，佢明明寫住長椰菜，買左番去阿媽話係黃芽白，我買時都有ｄ懷疑架啦，不過佢又冇唐生菜，又冇西生菜，所以就試下，點知．．．佢地又唔食喎，好菜都仲有芥蘭者，唔係就冇菜菜食Lu∼ |
| 10/5/2002 (五) |
| 如果第時有咩兔兔比賽，一定要帶矇豬去參加，佢呀，竟然可以將舊長方形既磨牙石擔上二樓到，雖然係好輕，不過要一隻兔兔咬實佢唔跌，再跳上二樓其間都唔跌，我諗都有ｄ難度掛∼∼ 都唔知呢隻咩兔黎既，舊磨牙石都唔係好阻定姐下麻．． |
| 11/5/2002 (六) |
| 好恐佈呀∼∼今日洗生菜時，竟然有細生歐歐既小蝸牛先生係度，同矇C一齊分享菜菜．．嚇得我呀！！搞到我洗菜時係咁死捽難捽，搞到ｄ菜碎晒，不過乾淨最緊要麻∼ |
| 12/5/2002 (日) |
| 矇豬同CC越黎越身手敏捷啦，今日入媽媽房時，只係推一推開塊膠板入去，之前明明見兩兔扒左係餐檯底，點知無啦啦發覺隻腳有ｄ毛茸茸既野郁郁下，一睇，原來佢地己經神不知鬼不覺咁鼠左入黎，真係快呀∼∼行路冇聲架∼∼ |
| 13/5/2002 (一) |
| 沙律：今日我好威，所以要自己寫日記呀，夜晚媽媽帶我去林村河玩時，有隻好矮既臘腸狗狗，成日跟住人地都唔知做乜既，我．．我咪發惡吠佢囉，點知媽媽竟然冇鬧，仲話我叻叻喎，叫我多ｄ去同狗狗打交，打唔嬴唔好番黎咁話，又會咁得意既？不過後尾隻臘腸走去同哥基玩唔理我ｌｕ，搞到我又比媽媽話細膽，不過我今次好叻架啦！！ |
| 14/5/2002 (二) |
| 今晚同矇C執籠準備困佢地時，矇豬一跳就跳左入去裝住佢地ｄ糧呀，草呀個一個膠兜到，諗住佢隻野實偷野食架啦，點知佢竟然偷沙律盒杜蟲葯喎，係個底到扯左出黎，扯到個兜既邊之後，就跳左出兜外，再係外面扯佢落地，之後咬咬咬，真係奇怪呀，有蘿蔔乾、Papaya 唔偷，走去偷杜蟲葯有既．．． |
| 15/5/2002 (三) |
| 矇豬真係一隻爛訓同冇乜危險意識既兔兔黎，成日訓到好似隻豬咁，仲要比我打開左個籠，影埋相都唔知，繼續佢有佢訓，我有我影，沙律有沙律搞搞震，反而CC就企左係到，驚死我走去搞佢咁∼∼ |
| 16/5/2002 (四)
|
| 矇豬同CC呢兩隻遲鈍兔兔，終於係夏天黎左好耐既今日開始換毛囉，兔毛滿屋飛呀，真麻煩，搞到我鬼咁多工夫做，又要成日同佢地梳毛，不過佢地就開心囉，因為有好多貴價日本糧食麻，比平時多幾陪，ｄ毛梳極都有，希望佢快ｄ換完啦∼ |
| 17/5/2002 (五)
|
| 平時矇豬成日都要係沙律個籠出面係咁磨，然後就係側邊痾ｄ屎屎同尿黎霸地盤，衰格到死，點知今日就過份到走左入個狗籠到磨，之後仲痾左４、５粒屎添，跟住就好快走番出黎，以為冇人見到佢咁，真係激鬼死∼ |
| 18/5/2002 (六)
|
| 今日大清籠張CC個籠推左出黎抹下塊牆時，佢就八八掛掛咁走入黎，因為佢個籠既左上角岩岩貼住沙律個籠既右下角，即係封住左，而我又踎左係個另一邊封住左個窿，再另外兩邊就係牆同矇豬個籠，點知佢就以為自己比我困左籠，係都咬，仲要係咬沙律個籠度，你話死唔死丫，咁鬼蠢都有架，見到冇左ｄ糧兜都知自己唔係個籠入面啦，再唔係跳上個籠頂到咪走到囉，真係丫．．唉．．． |
| 20/5/2002 (一)
|
| CC唔知做咩，呢排好鍾意舔矇豬，仲要係隻眼喎，舔完呢隻就舔另一隻，唔通矇豬隻眼有眼屎好污漕？望過又唔係丫，有流眼水都冇眼屎，不過CC就係咁舔喎，都唔知搞乜鬼∼ |
| 22/5/2002 (三)
|
| 矇豬今日唔知做乜鬼，成日跳左上個sofa頂到，仲要好似好威咁，我跑出去大大聲叫佢佢都唔落番黎，要拍佢個屁屁先肯走，跟住仲要襯我係到執屎時偷偷地跳上去，好似當我透明咁，呢隻兔丫，越黎越曳喇！！ 夜晚困佢地時沙律醒左，係咁撲埋黎想食佢地ｄ菜菜，結果我比左塊蘿蔔乾佢食，點知佢好鬼渣呀，𡁻唔爛，放係個口咬咬咬又吐番出黎，咬下又吐下，大大話話一塊好似五毫子咁大塊既野就食左成個幾兩個字，仲要食下望下我，好似好慘咁添喎∼ |
| 23/5/2002 (四)
|
| 好開心呀我今日，真係要多謝網友Candy話我知沙田間龍貓仔全店半價呀，收穫都好豐富，買左幾款沙律既零食，仲有ｄ骨骨同指甲鉗，而矇C呢，就買左鹽磚同間大既木屋仔比佢地，真係開心呢∼∼ 番到黎即刻放左間木屋企地下，矇豬就帶頭走左入去八掛下喇，因為淨係夠佢一隻兔走入去，所以CC就唯有係出面望，冇得入去Lu，之後就係咁舔矇豬，可能想佢出番黎讓佢入去玩啦∼∼ |
| 25/5/2002 (六)
|
| 今日放兔兔時，將ｄ貴兔糧放左係木屋仔裡面，矇豬好醒目呀，第一時間走左入去食，死都唔走番出黎，而CC就好無奈就企係個門口到想迫入去，但當然係敗，淨係可以損個頭入去，不過條頸短呀，所以食唔到，見佢咁慘，所以我都放左ｄ係門口度比佢，等佢兩姊妹可以一個係屋入面食，一個係出面食呢 ^^ |
| 26/5/2002 (日)
|
|
今日係到午睡到醒醒地時，聽到廳到有ｄ啪啪聲，應該係唔知矇豬定CC係到踏地，不過因為唔捨得張床，所以都冇出到去，不過如是者踏左成個幾兩個字，所以最終我都出去睇下咩事幹，原來沙律個水樽跌左係佢個籠頂到，因為個水樽個頂係有一個小孔，所以可能漏左ｄ水落佢個籠度，哈∼緊係驚會水浸啦，所以係咁踏地，不過幫佢整番好之後就冇再踏過囉∼ 夜晚同沙律出去玩時，佢勁呷醋呀，因為我攬住左隻Corgi，之後又比隻臘腸狗鍚喎，佢一見到就係到吠人地，平時沙律出到去都好少吠既，不過見到ｄ咁既情況可能好不滿啦，所以係到吠人地，仲吠埋我添呀，好似話我好攬其他狗狗咁喎∼∼ |
|
27/5/2002 (一) |
| 呢一兩日發覺CC 又肯用番佢個粉紅小厠所喇，雖然都仲有好多係痾左係個糧兜側邊，都好丫∼ 佢以前明明會係厠所到痾架，都唔知做咩會突然間唔用既，不過到而家又用喎，究竟佢想點呢？ |
| 28/5/2002 (二) |
| 今日媽咪番左大陸，得我自己一個看家，冇左阿媽既提醒，我又唔記得整好媽咪房門既膠版喇，直到我發現唔見左兩隻兔先知，唉．．入到去就見到成個床下底都係一ｄ膠袋碎同ｄ紙皮碎咁，再加幾粒屎同一督尿，唉．．好啋阿媽唔知渣，唔係實有排鵝呀∼ 仲有，發覺左一樣野，就係沙律除左金毛外，原來都好鍾意牧羊狗架，上一次就同小牧玩，今晚呢，就同新歡Happy玩，第一次見佢會追住一隻狗狗渣！反而對ｄ細狗就冇咩興趣喎∼∼ |
| 30/5/2002 (四) |
| 夜晚帶沙律出去玩時，就放左矇C出黎，番到黎又好眼訓，所以同佢地執一執左ｄ屎就諗住去訓一陣，先再起身，點知我一睡不起，結果．．．唉．．． |
| 31/5/2002 (五)
|
|
到我起身時，己經係今朝成９點囉，仲要係阿媽叫先醒，其間沙律又訓到好似隻豬咁，冇醒過起身痾尿尿喎，所以搞到我都．．．好似隻豬咁，不醒由至可，一醒出廳一睇，簡直係震撼呀！！成個地下都係雪，白濛濛，因為個兩隻衰兔唔知點整開左塊膠板，咬
sofa呀！！將埋面ｄ棉花咬晒出黎，真係激鬼死我啦∼∼ 沙律：到夜晚，媽媽帶左我去開生日會呀，好熱鬧架，有隻好似大眼妹既北京狗狗Bingo啦，金毛狗金仔啦，同埋波波、Bubble兩隻史納莎呀，我就威喇，去到狗地地頭都冇話驚，仲吠Bingo 添呀，鬼叫佢白雪雪咩，又識請請喎，我唔抵得咪吠佢囉，生日大晒丫麻，仲搞到金仔比人罰添呀，好彩我係咪到嗌定先者，唔係實罰埋我呀∼∼仲有呀，主人家煮野好好食架，因為好鬼死香呀，不過我就得個睇字，媽媽同老豆都唔比我食，佢地就冇鬼用啦，咩都唔識煮．．．不過後尾都有生日蛋糕食，不過明明係我生日架麻，同我影完相就叫我走，佢地係到食喎，淨係比少少我都有喎，真係唔公平呀！ |