                  |
| 1/6/2002 (六) 生日但冇慶祝．．． |
| 今日係沙律正式生日呀，不過因為今日唔得閒，所以提早左ytd同佢慶祝，今日唯有佢自己看家囉∼ |
| 2/6/2002 (日) 開生日會 |
| 沙律：雖然我生日過左，不過家姐話今日同我補祝生日喎，真開心喇，又有蛋糕食，不過又係唔公平呀，媽媽佢地仲食得多過我既，都唔知有冇搞錯，而家係我生日麻．．不過媽媽好鬼惡呀，因為我撲大家姐，嚇親佢搞到佢好唔合作咁唔肯影相呀，結果淨係同左二家姐影渣，大家姐哩埋左，不過再夜ｄ佢就走番出黎，仲食我個生日蛋糕個粒士多啤利添呀，佢就好啦，我都淨係得ｄ蛋糕食渣，都冇生果．．． |
| 3/6/2002 (一)
|
| 夜晚困CC時又唔記得鎖好對門，結果掃掃下地又見到佢走左出黎，哩左係個茶机底到，不過都係敵不過生菜既誘惑，一用生菜引佢佢就就出黎，追住ｄ菜菜，不過佢又蠢唔晒喎，去到個籠邊時識得放棄菜菜去番個茶机底到，真係激死，又要我周圍騰咁捉番佢入籠喇，麻鬼煩呀佢∼∼ |
| 4/6/2002 (二)
籠頂逃走 |
| 矇豬真係越黎越叻喇，今日佢唔知用左幾耐既時間，企係個二樓係咁頂，頂甩左扣實個籠頂粒膠，呯鈴嘭欄之後，出去一睇，竟然見到佢企左係茶机上面，個頂都ok重架麻，上面仲放左ｄ野既，咁都可以跳到出黎，好彩冇夾扁佢渣∼∼∼ |
| 6/6/2002 (四) CC換毛喇 |
| 矇豬換完毛之後，咩都慢半拍既CC，終於都換毛喇，隨手一執都可以執到一大執毛，尤其是個 PatPat 位，甩得最勁，佢個衰妹又唔係幾肯成日比我梳毛，就算比野佢食都係咁話，用個大口一連氣食６、７粒糧就走佬，食完先行番黎，又再食６、７粒，總之就走黎走去好麻煩啦∼∼ |
| 7/6/2002 (五) 又滴滴．． |
| 沙律佢ｄ麻煩野又黎，四個月一次真麻煩，周圍係咁滴，想攬下佢都要就住就住，拎張紙巾墊一墊，今次諗住同佢搵個老公仔配種，唔知搵唔搵到呢？ |
| 8/6/2002 (六)
|
| 矇豬今日好叻，一放出黎就走入CC個籠到踎係個厠所上面，過左一分鐘到，就見到有十幾廿粒屎喇，估唔到佢咁大Pat都可以企得晒成隻兔上個厠所到，記得以前佢係兩隻手仔放左落地，淨係隻腳個邊企到上去，唔通佢
Fit 左？ 仲有呀，沙律佢今日又乖又曳喎，無啦啦走黎係咁抓我門，出去睇下咩事啦，佢就即刻哩係櫈底，原來係佢痾左兩粒屎係出面，不過都有一條係籠到，做左壞事黎自首，都算佢啦，不過都係要比我鬧架啦∼∼ |
| 9/6/2002 (日) 相處融洽 |
| 今晚，沙律嘔呀，將夜晚食左ｄ糧嘔晒出黎，真奇怪，每次滴滴時，ｄ胃口就會冇咁好，而且仲會嘔添，都唔知佢搞乜鬼呀，佢嘔完之後都好驚呀，哩埋左，因為嘔左係籠出面，以為我會鬧佢，不過我當然冇啦，仲要見佢個樣好似好可憐咁望住我喎∼ 而家沙律都好乖啦，唔會撲矇豬，所以呢幾日我都好放心咁放佢地三個周圍走，冇睇實佢地，佢地都會各有各，矇豬同CC仍然係痴到實，其實係CC係都要跟住矇豬，而沙律就做實Q，看實屋企每一間房，係佢既看管下，矇C每次想走入房，沙律都會第一時間企係房門口看住，唔比佢地入黎，用個鼻頂走佢，因為兩兔有咬斷地主公電線紀錄，所以用ｄ野頂住左，今日CC就去想咬開佢時，又比沙律個鼻頂走去，搞到阿媽鬼咁歡喜佢，佢幫手保衛家居麻∼係衰在會同矇C爭野食，搞到比佢聞過ｄ野食矇C都唔肯食，麻煩呀∼ |
| 10/6/2002 (一) CC舔我呀
|
| 好開心呀，今晚．．CC佢．．．竟然舔我呀∼∼ 自從佢４、５個月大到，己經冇再舔過我囉，淨係識得咩都咬，同佢執籠又咬，阻住佢又咬，坐係到佢都無啦啦走埋黎咬，但係今晚我同佢地兩隻野係到按摩時，唔知係咪中左ｄ穴位好舒服呢，按完佢就係咁舔我，可能叫我唔好停，繼續按呀，哈哈！！ |
| 11/6/2002 (二) |
| 呢排都係放晒三隻野係屋企走圍走，而矇豬簡直唔知個死知點寫（雖然兔仔跟本就係唔識），佢竟然當住沙律面前，走入去佢個籠裡面痾屎呀∼∼∼好彩沙律冇發惡渣，之後矇豬都自己走番出黎ｌｕ．．． |
| 12/6/2002 (三) 河童沙 |
| 今日心血來潮問表姐借左個電鏟同沙律剪毛，結果，咪變左小河童沙囉，最衰到係佢啦，剪剪下拎轉個頭喎，咁我咪唔覺意錯手．．咩囉，佢呀，剪個陣又唔肯企係身，不過諗住同佢剷背脊咪由得佢扒係到，點知剪剪下訓鬼著左，真係豬一隻黎．．．到夜晚，佢訓左係地下時，矇C向佢挑戰呀，一前一後係到頂下頂下，搞到沙律醒鬼左，都唔知兩兔想點既∼∼ |
| 13/6/2002 (四) 著褲仔 |
| 為左夜晚都可以同沙律訓，而佢又唔會滴到張床周圍都係血，我就自整左條褲仔比佢著住訓覺，不過佢就唔多欣賞囉，一著左之後係咁來回係個櫃到擦，想整甩佢，整唔甩就上張床到，張個頭捐左入個被竇到，淨係突番個PatPat 出黎，真係笑死，要我話 "沙律好靚呀，著條褲仔好好睇呀"，先好似冇咁唔開心∼∼ |
| 14/6/2002 (五) 睪丸疑雲 |
| 見CC成日都唔用個厠所，所以ytd拎走左，點知今日到５、６點都見佢冇咩屎尿，唔通唔鍾意我拎走佢ｄ野，所以就即刻放番落去，同時發現冇同佢清絜屁屁一排，又積左ｄ屎屎喇，唔知關唔關事呢？塞住左痾唔出？所以就抱左佢上餐檯搞搞佢，唔搞由至可，一搞嚇死我，係佢個生殖器既右邊，我摸到粒好硬既野，再摸左邊，一樣有喎，仲好對稱添．．．唔通係．．．死左既睪丸？？望一望，係黑色架，但又唔知乾左既屎，有ｄ似乾左既血，總之唔知係咩黎，因為個到都冇傷口．．於是我就慢慢做ｄ濕毛巾抹下，之後忟左佢出黎，好似一粒蠶豆咁，硬挖挖，都咪話唔核突，仲有ｄ細細粒既野係附近ｄ毛到，結果搞左我好耐，成面都係毛，真係嚇鬼死我∼∼ |
| 15/6/2002 (六) 清屁屁 |
| 唔知係咪同CC清過屁屁呢，今朝困佢番籠時，勁多屎痾呀，係十分鐘內痾左成122粒屎，不過有兩粒應該係矇豬既，我真係走去數架∼∼ 好無聊呢 ＝Ｐ |
| 16/6/2002 (日) 沙律係牧兔狗呀∼ |
| 沙律已經做左隻牧兔狗，矇豬同CC一入我房時佢就會即刻衝去門口到趕佢地走，唔比佢地入去，今日都唔例外，不過就一個唔留神比兩兔入左我房佢先趕到，跟住佢就好忙喇，趕走矇豬再去趕CC時，矇豬又走番入黎，好喇，趕走CC去再趕矇豬時，CC又靜雞雞入番黎，趕黎趕去都Keep住一隻係間房到，超搞鬼呀∼ |
|
17/6/2002 (一) |
| 今日帶沙律去配，本來諗住等小巴，點知等左成半粒鐘先有車，仲要飛站喎，所以結果我就撘左架的士入西頁，一上的士，阿沙即刻望住個窗，好似驚我會賣甩佢，唔要佢咁，好緊張呀佢，係都要坐係我大肶上面，我仲Feel到佢震添呀，到左之後，就去左 Jennifer 個度 Lu ，Tiger真係好乖呀，都冇咩點吠，見到沙律之後就大家聞下，追下玩呀，不過就搞唔掂沙律囉，因為佢走黎走去呀，所以我地困左佢地兩個入厠所，等個方細ｄ，沙律冇咁多地方走黎走去，最衰就係我地一捉住沙律，Tiger就對佢冇晒興趣，真係有性格呢∼我地一放開沙律，佢又會想Un沙律，真得意，不過可能耐左，佢都冇咁堅持喇，後尾出番廳，我係沙律側邊Tiger都照對佢有所行動，有見及此，我當然即係捉住佢地啦，就係咁，佢地就大個仔大個女喇，因為大家都係第一次，所以要出手幫佢地，又要托住佢地個屁屁唔比佢地坐低喎，真係手都軟埋，完事之後，都漏左ｄ落地下，不過應該都有好多入左去既．．．冇幾耐之後，Tiger 又想黎多一次，今次完事時，發生左ｄ意外，蚊唔走呀∼ 嘩！好核突呀，真係嚇死人∼不過總括黎講都幾順利丫，佢地都冇咩點慘叫，可能夾岩時間啦，好緊張呀，唔知中唔中呢？最驚佢假大肚呀∼∼ |
| 18/6/2002 (二) 沙律又剪毛Lu∼ |
| 今日終於買左個動物專用既電剷，所以又同左沙律剪毛喇，今次好明顯短過上次好多，不過就剪得唔靚喇，一撻撻呀，都唔知點解會咁既，真係激死人啦，佢囉，郁黎郁去，又成日要扒係到，麻麻煩煩咁喎，不過下次我會努力ｄ，剪得靚ｄ架啦∼∼ |
| 20/6/2002 (四) 擦褲仔 |
| 因為沙律周圍滴，所以同佢著左條自製褲仔，而家有時見到佢好搞笑，雖然夜晚訓之前有同佢痾屎屎先，但訓醒時我出房，佢就會即刻跟住我出去，然後會衝去Sofa側邊行，之後反方向再衝，點解？因為想擦甩條褲仔囉，平時又唔見佢咁多尿痾，但著左褲仔後就４個鐘到就要痾一次，搞到我成日要就住起身抱佢痾尿尿，想訓覺好都唔得既∼ |
| 21/6/2002 (五) 我食素架！ |
| 都唔明沙律點解咁鍾意食菜既，成日都走去偷菜家姐ｄ菜食，仲要食到 "雜雜" 聲方死我唔知咁喎，話左佢好多次都唔聽，搞到有時ｄ菜有佢ｄ味，矇豬同CC又唔食，要再洗多次喎，真係麻鬼煩呀！ |
| 22/6/2002 (六) 魚翅兔毛 |
|
今日一放矇豬出黎，佢又走入去CC個籠蝦佢啦，正衰豬黎，兩個係咁係個籠到轉，我幫手阻住矇豬唔比佢追CC，CC又一舊飯咁唔識走，真係激死呀，難委我隻手呀陰功！！之後發現左一排魚翅係個草兜到，就係唔知邊隻ｄ毛，甩得好靚架，一個圈一排咁，真係好似魚翅咁架∼∼ |
|
23/6/2002 (日) |
| 牧兔狗沙津呢排開始失職啦，成日放左兔仔入黎，可能佢發現放佢地入黎兜一個圈之後會有屎食呀，所以冇即刻趕佢地出黎，等佢地兜個圈先，之後就即周圍聞，搵下有冇屎食，唉．．．真係為食呀！ |
| 24/6/2002 (一) 咬樹葉 |
| 今日諗住去困兔兔時，見到個地下好多樹葉，佢地兩隻衰兔呀，竟然跳左上 Sofa 頂，咬棵假樹既葉，真係激死，之前因為佢地成日咬，所以突登換左棵ｄ樹葉比較高，等佢地跳上個花盤時咬唔到，點之．．都係一樣．．． 仲有呀，沙律呢排成日發皮氣呀，叫佢去訓時企係個門口吠，要人地抱佢一陣氹下佢，佢先肯上床訓（佢同我一齊訓既），如果唔係就會訓係床下底架唔啋我地架啦∼ |
| 25/6/2002 (二) 大膽左 |
| 今日CC又舔我喇，真係開心，都唔知點解突然間又會舔番我既，哈∼∼可能大膽左啦，以前一行埋去就嚇到即刻走，而家都冇乜 Lu，連沙律都冇咁驚，沙律埋去聞佢，佢都唔係太大反應，有時仲會主動走去聞沙律添喎！ |
| 26/6/2002 (三) BearBear熊CC |
|
今日晏晝玩緊電腦時，立下眼見到沙律擔住隻BearBear熊入黎，點知隻BearBear熊識得自己走，再望真ｄ，原來係CC呀，我又唔記得扣好佢個籠，比佢走左出黎，而沙律就跟到佢實，等我仲以為係隻BearBear添∼幾低能呀！ 到夜晚，發覺CC又好似冇咩屎痾，摸下佢個屁屁，發玩又有一粒半硬半軟既屎痴住屎屎位 |
| 27/6/2002 (四) 最愛媽媽房 |
|
人地話，得唔到既野係最珍貴既，咁去唔到既地方係咪最神祕架呢？所以矇豬同CC成日都想入我房玩，每次入到黎都好開心，尤其是矇豬呀，入到黎就會
Fing 頭跳起，原地跳起，跑８字，來回衝，係張床跳落地下，地下又跳番上去，周圍爬周圍磨，可能平時小入黎，所以有機會就玩番夠本啦，哈哈∼見到佢個樣都好笑！ |
| 28/6/2002 (五)
第一次剪指甲 |
| 因為沙律ｄ剪甲開始長，所以今日襯佢訓覺時，就拎起佢指甲鉗同佢剪，不過剪左一隻就冇剪Lu，一黎我好驚同ｄ動物剪指甲，因為驚剪到血管，同兔兔剪都好ｄ，都叫睇到血管，但沙律個ｄ就黑麻麻，仲要剪落去個下好鬼有質感喎，所以更加得人驚，唉．．都係拎去比寵物店剪算Lu．．． |
| 29/6/2002 (六) 惡婆矇豬 |
| 今日困矇豬番籠時，佢係咁係到咬籠，比左ｄ菜菜佢食都分散唔到佢既注意力，係咁博命咬，成個鼻都凸左出黎，我踎左係佢門口望左佢一陣，佢就一於少理，佢有佢咬，我有我望，之後我叫佢唔好咬，用隻手指督佢兩隻眼中間個位，點知佢就惡到死，好大聲好大聲咁咕我，同用力向剪衝左一下，之後我冇理佢再督，佢又係咁，女仔之家咁鬼死惡！！ |
| 30/6/2002 (日) 血的疑雲 |
| 今日閂左膠版係房食野時，矇豬同CC又想走入我間，由矇豬帶頭起勁咁咬同推塊膠板，而咁岩沙律ｄ皮氣又唔係咁好，係一輪混戰之下，我捉得住沙律按撫佢，又阻唔到兔兔入黎，結果，咪有三隻野係我房到 '切桌' 咁轉，之後仲見到門口有少少血積，不過睇過沙律又冇傷口，矇豬ｄ手手腳腳又冇損到，唔通又係CC，不過見佢扒係到時腳底都好乾淨喎，究竟，ｄ血積係邊到黎架呢？ |