1/9/2002 (日) 　我都識得聽"NO"
呢排小左出去同矇C玩，通常放左佢地，同佢地執乾淨個籠加草加糧之後，就由佢地自己玩，周圍跑跑跳跳，所以當我好難得行出廳時，佢地就會即刻跑埋黎，尤其是當我開左ｄ房門時，矇豬就會帶頭第一時間衝入黎，不過又好得意，係我不停叫"NO"時，佢又會自己走番出去喎，唔通．．佢識得聽？
2/9/2002 (一) 　
ｂｂ而家己經識得四隻腳企係到行下行下咁啦，不過就左搖右擺咁行得好唔穩，行得最好既係阿大同阿仔，因為最大件係佢地呀，飲得最多奶，每次都一次過飲成７０ｍｌ到，飲到個肚漲卜卜，不過而家沙律唔多肯餵奶啦，同佢都冇咁多奶水，５隻ｂｂ加埋要飲差唔多３００ｍｌ奶呢，同埋可能ｂｂ既指甲開始尖，整到佢痛啦，我又唔敢同佢地剪得太短喎，唯又我勤力ｄ幫手餵奶啦∼
3/9/2002 (二) 　痾出界　ｂｂ變左濕水雞
今日去左小睡一陣，點知ｂｂ就出事啦，５隻ｂｂ好似濕水雞咁，全身濕透，同佢地抹乾ｄｄ之後，三妹仲凍到係到震，所以我就用張毯包住佢等佢暖ｄ，好彩過左一陣佢都冇再震，都放心ｄ，仲有呀，而家都估到ｂｂ大概幾時會屎屎，因為佢地屎屎之前原來會屁屁架，同埋會撐直隻腳仔先，咁我聞到有味時就可以準備去執屎，等佢地唔洗成日痾完係上面錄到成日都係，臭到死喇！
呢排，矇豬都唔係佢個厠所都尿尿，原來佢係企左上去之後冇轉身，將個屁屁向住個兜就痾，所以就痾晒出去，真係激死人，點先可以令到佢痾屎時個屁屁唔好向出，而係向番個兜呢？
5/9/2002 (四) 　餵糧失敗．．．
今日嘗試將ｄ幼犬糧浸到好淋比ｂｂ食，我用個小小平匙羹放去佢地個咀邊餵佢地食，點知佢地得個索字，同啜個匙邊，完全成唔到ｄ糧，放係個小'骨'碟比佢地又唔得，所以最終都係放棄左，搞到我成身成手成地都係糧，算啦，等多兩日佢地足三個禮拜再餵過！
6/9/2002 (五) 　三妹噴奶呀，嚇死．．．
零晨時份盡最後一次努力，係訓之前餵ｂｂ飲奶，等佢地唔洗咁肚餓，成日互啜飲尿＠＠，換好報紙諗住同ｂｂ放一放尿先放佢地入ｂｂ房時，三妹ｄ尿好似開水喉咁多到索左４、５張紙巾濕晒都唔夠，之後就嚇死我喇，佢嘔．．丫唔係，係噴奶呀，好似睇古惑仔噴血場面個ｄ咁，我而為反轉左佢放尿啦，之後同佢轉番身扒係到，點知再噴左一次，當堂岩岩換好既四層報紙濕到落底，基本上係成支奶差唔多８、９０ｍｌ噴晒出黎，嚇嚇嚇死我呀！！！之後就軟爬爬，手腳無力，又冇咩反應，真係嚇死，好彩放佢係沙律ｄ奶支附近時佢都有反應會走去飲奶，擔心死我啦，差ｄ想用電筒照佢隻眼睇下瞳孔有冇放大架啦，嚇死嚇死∼∼∼
7/9/2002 (六) 　我唔係貓呀∼　狗糧糊仔
矇豬：今日屋企黎左個客人，好似叫咩大姑婆喎，指住我同CC話＜呢兩隻貓唔放架，困係個籠到，隻貓唔會同狗打交架咩，隻貓都好肥喎＞，唉．．．雖然平時都成日比人以為我地係狗仔，不過貓喎，隻耳仔邊有咁大隻咁Dup架，仲要話我地肥添．．．真係激死兔呀！！！

今日我又餵ｂｂ食糧啦，今次叫成功啦，佢地都食到，不過就好輪盡啦，成面成口成個上半身都係，一路食一路爬一路撥，搞到周圍都係，餵一餵就搞成２，３個鍾，真麻煩，又要同佢地抹乾淨喎，搞到我都 'Lei' 咁 'Hei' 呢∼
8/9/2002 (日) 　唔好搶我ｄ野食呀！　我個籠識得分身術呀！
尋日屋企有個新狗籠，係比其中一隻ｂｂ第時住既，不過未拎得走就放係我到養住ｂｂ先，去做方便左啦，因為換報紙冇咁煩，又減低ｂｂ痾完屎係上面碌黎碌去既機會，搞到鬼咁臭，不過佢地ｄ手手腳腳就成日叉左出黎，沙律又成日好好奇咁係到聞，可能諗緊點解自己個籠會走左入我房，好彩佢冇走入去方便者∼　沙律而家己經記得佢ｄ零食放左係邊，當我同媽咪坐係到既時候，就會對住我地吠，我地一起身呢，佢就即刻跑去放零食個箱到抓，要我地比野佢食，真係為食豬呀！

而兩隻兔，都仲係咁為食，今日屋企有提子，又比左一粒矇豬食，次次比親提子佢食，佢都一定要咬住跑去一個佢認為安全既地方先放低慢慢吃，驚死有人搶佢咁，食PAPAYA都係，實係成粒搶左去先慢慢，唔比你揸住黎餵佢既，懶有寶呀！
10/9/2002 (二)　　我唔好蝦架！
矇豬：呢排細細妹生左ｂｂ，搞到我同 CC 既活動範圍細左，冇得入媽媽房玩，出黎玩既時間都少左ｄｄ，所以我決定要嚇一嚇細細妹，係我細心觀察下，除左高之外，佢係驚一ｄ平面一塊既野，好似膠板、垃圾鏟個底咁，不過呢ｄ我又拎唔到．．．最後，我就襯媽媽執屎時將個掃把同垃圾鏟推跌，結果，嚇到佢向後退左幾步，呵呵，咪當我矇豬好蝦呀！
11/9/2002 (三)　　獨愛狗尿報紙　阿仔嘔呀！
零晨，又發生左ｄ恐佈事件－－＞阿仔嘔呀！！嚇死我，嘔晒ｄ糧出黎，原來佢食左咁多落肚，緊係食得飽得淨消化唔黎啦，次次食完個肚dum都大到好似有左咁，下次都係唔好比咁多佢食，不過佢好搞笑，肚餓時會自己食自己隻手架，成日搞到兩隻手仔濕晒呢！

因為之前沙律生ｂｂ借左部ｄｖ番黎，岩岩今日屋企又有幾粒大提子，所以就拎住部CAM諗住影下矇豬食提子，將沙律困左係廚房，提子比矇豬搶左之後，唔知係咪因為沙律係咁抓門同吠，矇豬驚有人搶佢，所以咬住粒提子由茶机走去門口，之後就走番轉頭，跟住走多一轉就入左 CC 個籠度，發覺都係唔安全又跳番出黎，最後都係番回原位食，真係多舊魚呀！

仲有，我屋企ｄ動物都怪怪地既，沙律鐘意食兔仔屎，生出黎既ｂｂ鐘意互啜大家既尿尿黎飲（尤其是阿仔個ｄ），兩兔呢，尤其是 CC ，鐘意咬有狗尿既報紙，茶机底特登放左ｄ舊雜誌比佢地咬，但就係要咬沙律個屎盤個ｄ，今日又係咁，張索滿晒尿既報紙扯左３份１出黎，仲要有幾小忽係唔見到添（即係吞左啦．．），真係激死呀，報紙己經污漕架啦，仲要有埋狗尿添，都唔知佢地係咪傻架！！
12/9/2002 (四)　　我要食風水梨呀！　BB打交呀！
年年中秋節都令人諗起好好味既水晶梨，不過唔知點解今年食親既都係風水梨，不過是但啦，反正味道都一樣，有好野食當然要分比三個寶貝女啦，估唔到一向唔鍾意食生鮮水果既CC竟然對風水梨有興趣喎，不過可借佢太謹慎喇，要舔舔舔黎試味，所以都未食到就比矇豬一口搶左去，咁唯有再比第二舊佢呢，可借，又比沙律搶左，再比，今次佢叻啦，唔試味就食，不過咬得少少就比己經食完一舊既矇豬係佢口中搶左去，食完既沙律又黎搶，結果我就要用個身擋住沙律再一手推開矇豬黎餵佢CC食，真係冇鬼用呀，食舊梨都要人幫！！

BB而家開始識得打交啦，企係到面對面你咬我我咬你，好鬼搞笑，又冇牙又企唔穩，咬得兩咬就咕嚕咁跌低左，不過都照繼續咬，真係冇佢地好氣呀∼
14/9/2002 (六)　　BB起身唔準訓呀！
唔知係咪因為沙律好緊張ｂｂ，驚佢地有事呢，當現到ｂｂ訓左覺唔郁時，佢就整醒ｂｂ，如果係籠到佢就會吠，如果係紙皮箱呢就用個鼻頂，搞到ｂｂ醒晒呢，就會好安心咁走鬼左去，番黎見到ｂｂ訓左就再整醒過，真係比佢激死，好難得餵飽ｂｂ可以安靜下，抖下架麻，ｂｂ一醒就會想食野，想食野就會嘈，之後就打交，真係搵黎搞呀！
15/9/2002 (日)　　好．．好多狗呀！！
係沙律入左媽媽房涼冷氣訓覺時，見到矇豬係門口就特登開左房門比佢入黎，開頭係門口到磨下磨下，之後行多幾步，差唔多去到ｂｂ個籠時，唔知做咩鬼突然間掉頭跑，仲要係出左門口之後都仲係一路跑出廳個隻，好似好驚咁，唔通見到有咁多隻ｂｂ嚇親？？不過呢排 CC 就連影都冇見過呀，唔通矇豬話左比佢知個情況，所以佢連行都唔敢行埋黎？
16/9/2002 (一)　　救命呀，家姐蝦我呀∼　唔準打交呀！
今日放左兔兔冇幾耐，就聽到好嘈既撞籠聲，應該又係矇豬走入去CC個籠到追住佢啦，本來都冇諗住出去睇，因為都經常發生，只要CC跳出個籠就冇問題喇，但今次ｄ撞籠聲過左幾秒都冇停，所以就出去睇，只見到兩團啡白色物體係到轉轉轉，間中仲要都唔知邊隻行得慢反肚添，今次仲要加埋做左阿媽既沙律，可能佢對慣ｂｂ，平時ｂｂ打交，想走出黎佢就會用個鼻頂番佢地入去，有時我拎ｂｂ出廳放係地下到，佢都會係咁頂，所以見到家姐打交，佢又伸埋個頭入個籠到想頂佢地，結果就緊係打得仲勁ｄ啦、兩兔轉得仲快ｄ，最後要媽咪抱走沙律，而我就阻止矇豬再追住CC，等 CC 可以跳出個籠到先搞得掂，而矇豬當然係比我鬧啦，佢都知自己唔岩架啦，因為我反住左佢黎抱，邊抱邊鬧，佢竟然冇反抗，成分鐘都唔敢郁，比著平時，反轉左佢幾秒就出飛腿啦，而家沙律見到家姐冇再打交，都安落晒喇！
比矇豬咬甩左ｄ毛呀∼
17/9/2002 (二)　矇豬嬲左我呀！！！　BB滿月啦∼
自從好惡咁鬧完矇豬蝦CC之後，矇豬佢．．．嬲左我呀，一摸佢就走，仲要係去茶几最角落我摸唔到佢既位置，我餵日本糧比佢，唔食，香蕉乾呢？唔食，木瓜丸呢？唔食，菜食喇掛？都係唔食，嗚，人地話兔仔好冇記性架麻，好，咁我去訓啦，訓醒天光佢應該唔記得架喇，點知訓醒覺之後，同樣再餵一次相同既食物，都係唔食，下？過左十多個鍾頭仲嬲緊？我開佢個籠都唔出黎，結果只好放低菜菜，放低日本糧同香蕉乾係佢個兜到啦，觀察左一個小時，都係唔食，只係變波波縮左係個籠度．．咁我唯有番入房啦，正諗緊 ＜好唔好帶佢去睇醫生呢？會唔會咁岩病病呢？＞再轉個頭出去時，發覺菜菜唔見左，雖然只係一塊，肯食即係冇事啦，咁咪即係仲嬲緊我？要見唔到我先肯食野，嗚∼∼到夜晚放佢出黎時，佢都係唔啋我，唔肯食我餵既日本糧同菜，放低左望住佢都唔食，除非我行開左啦，不過提子就例外，唯一一樣我餵佢會食，唉．．．都好過冇啦，真係小氣呀佢！聽媽咪講，話佢比 CC 蝦添呀，佢食緊菜時比 CC 搶左同頂開左個兜，佢都傻下傻下咁冇反應喎．．．下次唔鬧囉，咁佢係曳丫麻．．．

今日係ｂｂ滿月既大日子，所以擺左個滿月酒，外賣左意粉等食物番屋企，代ｂｂ收左ｄ利是同禮物，ｂｂ真係大得好快，仲有２，３個禮拜有ｄｂｂ就要走啦，真係好唔捨得，希望沙律到時唔會太緊張唔見左ｂｂ啦，因為有時我拎住ｂｂ四圍走佢會跟到我實一實，又會撲埋我到同吠我，好似鬧我搞佢ｄｂｂ咁，而家夜晚我會放佢係媽咪房訓涼冷氣，但好準時地每朝６，７點到佢就會抓門要我放佢出去睇ｂｂ，見到ｂｂ生生猛猛佢先會放心再去訓，真係一位好媽媽呢！！
18/9/2002 (三)　好啦，唔嬲啦∼

今朝媽咪幫我困兔兔時，話矇豬一見到佢就走埋去問佢擺野食，一比佢就好開心咁食食食，但係我走埋去餵佢唔鬼理我，邊有兔仔咁小氣架，一直到夜晚，佢先嬲完，肯食我比佢既野食呀∼∼　真係比佢激死呢∼∼

尋日ｂｂ滿月都唔記得同佢地磅下重添，所以今日起身就襯佢地空肚時磅一磅，比一個星期大時真係重左好多，阿仔體重仲拋離其他ｂｂ呢，而最惡既就係阿大，成日都撩交打，餵其他ｂｂ未到佢時就大叫，又weliwulu∼
阿大：３１６ｇ－＞９７４ｇ　三妹：３３２ｇ－＞８６０ｇ
四妹：２９４ｇ－＞８７８ｇ　阿仔：３８０ｇ－＞１１６５ｇ
孻女：２８８ｇ－＞７８４ｇ
19/9/2002 (四)　好忙呀∼∼
今日將５隻ｂｂ放晒出廳玩，佢地都好活躍周圍行周圍爬，原來最細膽係三妹呀，成日自己一個哩埋一二邊，好似好驚咁，冇鬼用呀，行得最快既係阿仔，叫佢個名＜朱古力＞時都會好快好開心咁走埋黎，而沙律呢就好忙喇，因為ｂｂ向四方八面咁走，佢想叫番ｂｂ入房，不過顧得呢個又顧唔到第二個，搞到佢要騰黎騰去，但係又頂唔番ｄｂｂ番入個籠到喎，做狗媽媽真難呢∼
20/9/2002 (五)　我地出牙仔啦∼
今日發覺原來有幾隻ｂｂ己經開始出牙仔啦，咁遲ｄ就唔洗 '顏' 爛ｄ糧比佢地食，可以慳番ｄ工夫囉，不過佢地都開始發牙痕，成日搵野咬，不過比ｄ小骨骨佢地又唔咬，係都要咬其他ｂｂ同咬媽媽個咀ｄ毛呢，佢地一見到媽媽就會好開心撲埋去，想媽媽同佢地玩，仲邊撲邊擺尾呀∼
21/9/2002 (六)　中秋節快樂呀∼　阿仔帶頭用水樽呀∼

個水樽放左係籠到都有好一段日子，不過ｂｂ呢就唔識用，只會一口咬埋去而唔會舔，不過今日就見到阿仔帶頭舔下舔下咁飲呀，之後阿大又有樣學樣，不過佢地舔下舔下都會一啖咬埋去，不過都叫識識地咁啦，希望佢地教識埋其他ｂｂ啦∼

今日係中秋節，都叫做係半個兔仔節丫，話晒月亮上面都住左隻玉兔丫麻，所以我都買左包餅餅比矇C兩姊妹食，對上一次買己經係佢地生日囉，佢地一見到就極為開心，即刻衝埋黎食，仲鬥快食完搶對方個ｄ添，不過我都唔敢比得太多佢地食，少吃多滋味麻∼不過佢地就好似同個月餅有仇咁，一放埋去就咬住個袋邊想掉左去，而沙律就好鍾意食喇，佢都食左十分一個月餅呀，仲食到舔舔脷添呢∼∼

22/9/2002 (日)　BB搞小圈子哦．．．
而家ｄ BB分左做兩派，阿仔同阿大一派，其餘三隻一派，可能身型差唔多打起交上黎好打ｄ啦，不過我都見過孻女同阿仔打，都幾搞笑呢，身型差成個碼，不過當然係阿仔嬴啦，暫時黎講得阿大係阿仔對手渣，難分高下呀，因為阿大真係好惡死∼∼不過其他ｂｂ都好活躍架，尤其是見到阿媽時，而家我會成日放ｂｂ係紙皮箱同沙律玩，佢地會自己無啦啦跑圈、伏低向前撲、退後向前衝咁，好鬼搞笑，同埋而家都開始成日咬骨骨啦，今日睇過差三妹同孻女未有牙仔渣，不過都見到ｄ牙肉一點白色ｌｕ∼仲有，今日睇番沙律細個時既相，發覺原來四妹既毛色係同沙律最最最似架，我諗沙律出世時心口都係有閃電毛架者，之後就傳左比四妹，而個樣就好似孻女比較似，不過沙律就長方ｄ冇咁圓囉∼
24/9/2002 (二)　 小木屋好受歡迎呢∼　我要睇住ｂｂ架
今日又放晒ｂｂ出廳玩，玩得最癲既既阿大、阿仔同四妹，癲下癲下咁亂跑亂撞，見到佢地跑得咁快我都嚇左一跳呀，先幾日佢地仲唔係行得好穩架麻，阿大仍然係最惡，媽咪係二樓行落黎，仲係樓梯都聽到阿大叫，佢仲大聲到嚇到同佢打緊交既沙律都向後退左２步添，阿仔就最醒目，一出到去識得搞拖鞋咬，有時仲咬埋我隻腳，都幾鬼痛∼不過玩玩下成日都唔見左兩隻ｂ，就係四妹同孻女，有時會見到佢地走番去我房到，我閂左房門就坐係門口，捉番佢地出廳玩，玩玩下過一陣又會見佢地縮左去餐檯底，真係冇鬼用呀，不過影佢地相最容易呢，因為郁得冇咁快呀，而ｂｂ都好似認得我呀，不過係我＝食物 -_-"，我一踎低時佢地就會走埋黎，仲會係咁舔我添，不過放佢地完時都幾麻煩，因為佢地會周圍尿尿要同佢地抹，之後又要拖地喎，丫，仲有，因為想同ｄｂｂ影相，不過沙律又以極速咁輪住同每隻ｂ玩，係ｂｂ中間'切桌'咁轉，所以我就抱左佢上餐檯，平時一抱佢上去佢就唔敢郁，會乖乖咁扒係到架啦，今日，佢竟然為左要睇住ｂｂ，係餐檯跳左落黎呀，我都比佢嚇一嚇，母愛真係好偉大呀！！！

到夜晚放兔兔，矇豬唔知做乜鬼，跳左上間小木屋到企，仲要企左幾耐下唔郁，好似比人定左形咁，而CC近期就好鍾意間小木屋，成日走入去咬，不過今日比我發玩佢又咬爛左Sofa個角落呀，之前都係咬爛左２個，而家又多個，ｄ皮己經唔見晒，見到裡面ｄ木，張 Sofa我有份去睇去買架，嗚∼∼∼我諗都係要去而家買張個 Sofa腳係唔知鋼定乜鬼質地既先得囉∼
25/9/2002 (三)　

今日有朋友仔黎左，仲抱左ｂｂ出黎玩，不過因為廳開左冷氣驚凍親佢地，所以只放左佢地係房地下，好彩地毯上面舖左塊膠，唔係就慘啦，佢地邊玩邊痾．．．唔知係咪陌生既關係，開頭ｂｂ都好靜，連阿大都係，不過後尾玩熟左就開始癲下癲下咁，撲黎撲去，不過三妹都係比較怕羞，鍾意哩埋一二邊，又或者爬去我地大脾咁，我諗佢第時都會幾爹下，後尾我行出廳時，ｂｂ都跟住我跳下跳下走出去，不過行左幾個階磚位，又自己傻下傻下跳番入房，真搞鬼∼
26/9/2002 (四)　姊妹情深　ｂｂ好大食哦∼

ｂｂ既食量真係好利害呀，由開始戒奶轉糧到而家，而經食左１０磅糧啦，而家每餐都食三十多粒糧，都仲要好似唔飽咁，由其時阿仔，一見到兜糧就發晒癲咁，今日餵完阿大放佢係紙皮箱等佢痾屎屎時，因為佢見到阿仔食緊糧，佢仲想食，仲一跳係個紙皮箱跳左出黎，係真係座低一跳出到黎個隻，唔係爬出黎，個動作真係好鬼完美！！仲有，媽咪投訴今日幫我餵ｂｂ時腳趾公被偷襲呀，原來係阿仔一啖咬落去，真曳皮呀！

因為平時放矇C時矇豬會走入CC個籠蝦佢，所以我會先放CC，等佢出左黎先再放矇豬，不過次次放完 CC 之後矇豬都會好緊張咁即刻企係到，驚死我唔放佢咁，好∼我今日就試下唔放佢睇下佢會點，結果見到佢係個籠到好不安咁騰來騰去，同埋咬籠喇，最得意既就係連 CC 都幫手咬埋一份，之後仲隔住個籠舔矇豬添，真係姊姊情深呀！！！

為免有人唔高興，所以又要係到多謝沙律老豆放左工都特登係銅鑼灣撘成粒撞車入黎幫我一次過買左２０磅幼犬同２０磅成犬糧，再行幾個字拎黎我屋企呀 ^^

27/9/2002 (五)　終於到我叻番次！　我有新背囊呢

晨咁早天都未光（其實係未訓），見到矇豬又帶頭想入黎，我即刻抱住沙律等佢唔好撲佢地睇睇佢地會點，矇豬好慬慎咁係門口磨左好耐，之後行入少少磨，跟住再入ｄｄ磨電腦檯，不過就冇再進一步行動，好驚青咁跑番出去，不過CC今次好叻呀，雖然矇豬走左出去，不過佢都繼續周圍聞，八八掛掛咁，矇豬見到都忍唔住再入多黎一次呀，冇理由比CC帶頭做左大家姐架麻∼

一直都覺得孻女係比較細膽，但原來佢惡起上黎都唔係人咁品架，今日見佢同阿媽玩，鬼咁惡死Weliwulu，因為要同阿媽搶野玩呀，我放ｄ骨骨、公仔比ｂｂ，沙律就擔番出黎，ｂｂ緊係唔肯啦，所以就連阿媽都冇面比呀，一於打過！！

沙律：媽媽今日買左個小背囊比我呀，紅色好搶眼架，本來係想買衫仔架，不過姐姐話狗仔衫買左唔岩冇得換，所以媽媽話都係同我度岩 '曬屎' 先買喎，唔係唔岩著就幣傢伙，好緊張呀，唔知衫仔咩樣架呢？媽媽話件件都好靚，都唔知買邊件好呀∼

28/9/2002 (六)　我有新衫新玩具呢∼

沙律：嘻∼我有新衫著啦，不過唔係媽媽本身想買個件，因為比老豆潑佢冷水話＜成舊水買件衫比佢係唔抵丫麻，又唔係成日著，佢又唔係鍾意著，係妳鍾意同佢著之麻，佢著左妳開心又唔係佢開心，又唔知岩唔岩身．．．＞，結果就冇買到喇，丫∼老豆又講得岩喎，我寧願拎黎買野食好過囉，好彩媽媽去完街街番黎都有買野我食，仲有兜兜比ｂｂ同埋小玩具添呀，不過個玩具己經比我搶左黎玩啦，咇咇聲好響架∼∼
29/9/2002 (日)　唔好搶我架下∼
每次由房行出廳，都會比兩團毛茸茸東西纏住討食物，今晚行出去時都唔例外，所以我就一兔比左一塊蘿蔔乾，先比矇豬後比CC，不過未到CC時，佢見到矇豬有就即刻想係佢個口到搶過黎食，搞到矇豬即刻鬼咁緊張，咬住塊蘿蔔乾通屋走，明明企左係到準備食，又無啦啦咬住再走去第二度，之後仲咬要塊蘿蔔乾做一個向後扯既動作（？？），仲做左幾次添，好似有人揸住唔比佢食，所以要搶番黎咁，但事實圍住佢５尺範圍兔影人影都冇隻，都唔知做乜鬼要咁緊張∼∼
30/9/2002 (一)　ｂｂ識打筯斗哦∼　
沙律：丫∼先兩日漏左ｄ野唔記得講，媽媽佢呀，出街時襯屋企冇人Set左個Cam黎拍我，話要睇下我冇人係房企時有乜搞，有冇曳曳，亂吠咁喎，不過呢我就令佢好失望喇，因為係拍既６０分鐘裡面，除左開幾個幾分鐘意外，我都冇再係鏡頭面前出現過，入左房訓覺喇，聲都冇出過添，搞到媽媽鬼咁冇引呢∼　仲有呀，ｂｂ好叻呀，阿大妹幾犀利呀，識得打筋斗呀，佢係個紙皮箱踎低用力一跳，就跳到出黎，落地個下仲要打個筋斗添喎，動作幾美妙呀，唔．．．我都要向ｂｂ學下先得喇！