1/10/2002 (二)　我地打左針啦∼
今日，五隻ｂｂ都打左第一針啦，佢地個個都好乖，打針時冇曳曳，定一定咁比醫生吉針針，係完全冇感覺個隻，仲有，醫生入到黎摸完ｂｂ之後，重覆左一句說話兩次呀，就係＜ｄｂｂ養得幾好喎＞，呵呵∼醫生讚我養得ｂｂ好呀，緊係啦，好食好住喎，個陣沙律買番黎皮包骨咁，醫生一摸就話太瘦，而家隻隻ｂｂ都肥過佢個陣時呢∼∼
打完針之後，三妹就要走啦，今個星期五就會去新主人屋企，唔知佢會唔會唔慣呢？真係好唔捨得哦∼∼今日阿大（粟子）老豆黎左探佢，過多個幾禮拜，粟子都要走啦，嗚∼∼唔捨得唔捨得o~((>< ))~o　今晚又放晒ｂｂ出廳玩，今次最細膽係孻女呀，同三妹一齊哩左係房門口唔敢行出黎，不過三妹今次就叻左啦，過左一陣都有出到黎同其他ｂｂ玩，但孻女唔係哩埋就係訓，間唔中比家姐阿哥蝦時就打下交咁，仲有呀，原來最精力充沛個個係四妹呀，玩左個幾兩個鐘，其他４隻ｂｂ都攰到係地下訓晒覺時，佢仲係到彈下彈下，真利害哦！！
1/10/2002 (二)　我唔剪指甲呀∼　BB狼叫呀∼
今日餵完阿大之後，放左佢係籠冇咩點理佢，同佢玩，佢．．．竟然係到狼叫呀，仲要唔只一聲，抬到個頭高一高咁添喎，直到我抱住佢佢先收聲渣，
矇豬ｄ指甲好長啦，見佢係到食緊野就走去摸下佢ｄ腳趾先啦，睇下佢有冇咩大反應，咦，冇縮喎，咁我就走去拎個指甲鉗啦，點知我拎住個鉗行埋去，都未掂到佢時佢一見到我走即刻走，唔通佢認得個指甲鉗咁醒？？　
2/10/2002 (三)　都話唔剪囉　唔好攪我間屋呀！　我剪左毛呀！
今朝早困完兔兔入籠時，見 CC 又痾左好多屎，咁諗住同佢執左佢等佢間屋乾淨ｄ啦，點知佢一個飛撲埋我隻手到咬左我一啖呀陰功，好彩冇流血者，冇良心架佢∼∼

因為三妹星期五就會走，所以今日同左佢開裝剪毛，由做流金歲月開始剪到做新聞，
因為佢成日都郁黎郁去，又拎轉面望，又係張檯到周圍行，一路剪又要顧住唔好比佢
跌落地，太大力捉實佢又驚整親去，結果剪下停下剪下停下咁，頸到梗埋，剪埋面時仲要氹佢訓覺豬先剪到添，搞完三妹，就到矇豬，因為佢地指甲太長喇，不過佢通屋走剪唔到，最後我就抱左佢入厠所，再用膠版間細ｄ範圍同佢剪，幾經辛苦再次頸到梗埋終於剪到，仲要佢圍住我係咁跑，我又追住佢係咁轉，我諗到轉左有廿幾個圈呀，不過發覺佢隻腳仔有腳趾整親，因為係指甲同ｄ肉既接位有少少血跡，好彩冇發炎呀個ｄ者∼
3/10/2002 (四)　超級污漕兔
今日幾經辛苦，終於同CC黎左個小美容，包括剪左指甲啦，用水抹下屁屁啦，同埋修剪屁屁 ｄ毛，因為真係污漕到不得了，都係先兩日一手摸落去屁屁到先發覺原來
佢咁污漕，濕漉漉．．．軟便＋尿＋毛＝超級霹靂臭！！不過佢尿尿個到我都冇乜點剪，因為我反轉到佢又剪唔到，就咁係後面剪又睇唔清楚，又驚剪親佢，所以都係盡量剪晒污漕既毛，不過剪完之後都幾搞笑，條尾又幼喎，呵呵∼∼
4/10/2002 (五)　BB走左啦 !_!
今日，三妹去左新主人到啦，ｂｂ走之前黎左個一家團聚，沙律老公 Tiger 都有黎到呢，沙律一見到佢老公，竟然賴尿呀∼∼仲要唔係幾滴係一大督個隻，除左MM時，佢都唔會係厠所以外既地方尿尿架，唔通佢．．．太緊張？之後就放晒ｂｂ出黎玩，今次全部ｂｂ都好活躍呀，連三妹同孻女都係，通屋走冇再哩埋係角落頭，冇以前咁驚ｌｕ，三妹剪左毛之後仲好似醒神左、活躍左，唔通係遺傳左阿媽ｄ野，每次沙律剪完毛都會比平時活躍ｄ架，鍾意跳上跳落來回跑咁，好奇怪！！到ｂｂ要走時，我都困左沙律係廚房冇比佢睇住，但係佢都好似知道咁，因為一出黎佢就周圍走，隻隻ｂｂ都走去聞一聞，所以我都即刻比ｄ小食佢分散下佢注意力，以狗狗既智商，真係
分到４同５既差別？？不過ｂｂ走左冇耐，我比零食佢時佢竟然吐番出黎呀，之後就入左房訓覺，唔通．．．佢真係知？
5/10/2002 (六)　臭死兔狗屎
今日，８掛既矇豬又走左黎我房，呢度聞下個度磨下，點知因為佢太８掛，見到個用黎裝住ｂｂ既屎同尿報紙既膠袋時又走埋去，仲要企高用個鼻頂，點知一頂一聞，臭到佢第一時間用左半秒係我間房消失左呀，呵呵∼下次ｄ地方唔比佢去都要掛袋屎係到先得喇∼

Cream Cream @ 新居 by Isiah（CreamCream爸爸）
Cream Cream 昨晚走時，上到車都幾驚，個身震下震下，條尾就縮左去下邊！！ｂｂ爸爸呢？就成程車望著個女，回到家，我冇放 cream cream 入籠，我把毛巾放起一個木箱入邊，再把 cream cream 放入去，cream cream 開始有咁驚，對新環境都好好奇，成個八妹仔咁，之後比去起廳行一陣，學下新環境，cream cream 公公都有同 cream cream 玩呀，玩左一陣之後，媽媽抱著 cream cream，cream cream 就係咁訓左。
我地把 cream cream 放番入箱，再放近床，咁半夜都可以睇下 cream cream，2：00 am 聽到 cream cream 鳴鳴兩聲，我起身睇一睇 cream cream，原來佢尿尿呀，咪同佢抹一抹身，毛巾就濕晒，只好比條 "鴨屎必（某名牌喎）" 既毛巾佢，今日睇來都要買多兩條先得啦。

Cream Cream 在新居的第一個清晨 by Isiah
Cream Cream 係好孩子，昨晚都冇咩出聲呀，6：00 am，我聽到 cream cream 好似醒左，我坐起身望下，佢見我起身，佢又起身，我訓番起床，佢又訓，如是這試左幾次，都係咁，我起身行近 cream cream，佢成個起晒身，不停向我擺尾，oh！shit ，真係有屎屎呀，第一時間清理現場，唔怪得訓晚上係訓起毛巾上邊，今早唔係啦，之後，我就連木箱，放佢出廳，之後我就扮晒唔理佢，返房關門，佢出到廳，好八掛咁四處望，我望小佢一陣，佢就跳左出個箱，隔左一晚就咁大膽．．．之後，我再放番佢入箱，去一去洗手間．．．成家人起晒身同佢玩．．．真係威水.原來報紙下邊仲有兩粒屎屎，清一清先，7：00 am 比早餐 cream cream 食，同佢玩到 8：00 am 佢又來屎屎，屎屎之前好似叫左兩下．．．要留意下 cream cream 係唔係每之開大之前，都會話過我知先，仲有，cream cream 好跟我．．．不過目標係我隻腳。
6/10/2002 (日)　有狗味我唔食呀∼　齊齊剪毛毛

今日一口氣同左阿仔、沙律、蛋糕剪毛，不過蛋糕就由番佢阿公操刀同佢剪，第一次剪都叫OK啦，係條界唔多直，而阿仔，剪背脊時佢都好合作，好快就剪完，不過到頸同近耳仔就慘喇，鬼咁大反應，係咁擰黎擰去，結果淨係個頭同頸都搞左個幾鐘，到沙律時，佢都好唔合作，剪腳底毛時係咁踢，剪佢屁屁毛時仲大叫添．．．仲有呀，阿仔佢今日玩玩下時竟然跑番入黎，跳入個紙皮箱到痾屎呀，真係叻叻呢，不過蛋糕呢就渣渣喇，比佢阿公用個吸塵機嚇到佢邊跑入房邊賴尿呀，冇鬼用呢∼

唔知係咪因為今日近距離對住狗狗既時間好長呢，到夜晚我餵矇豬食日本糧時佢竟然唔食呀，聞一聞就縮埋個頭，換過另一隻手餵佢都係唔食，結果要放係地下都佢先食，我沖都涼左啦，仲有味？？
7/10/2002 (一)　我唔剪毛呀∼好驚呀∼∼
今日幾經辛苦，用左成４個鐘，先同阿大剪完毛，因為佢實在太奀皮＋大驚喇，一開個電鏟未掂到佢己經想走，一掂落去就超大反應，又跳又跑又擰黎擰去，全完搞佢唔掂，淨係個身都搞左成２個鐘，佢驚到條尾都去左屁屁眼到，剪條頸時就掙扎得最厲害，成隻彈起，太婆黎捉實佢都唔掂，結果我要用大屁夾隻佢個身同四隻腳，一手捉住佢個頭，再比ｄ肉條佢舔下先叫剪到，所以條頸都剪得唔多靚添．．．

愛上夜生活的 cream cream by Isiah
Cream Cream 好愛日夜生活的，呢兩晚佢半夜都有起身叫人同佢玩，昨日諗著同佢玩，玩到佢冇晒力就可以一訓到大天光點知都係唔得，要再諗下計先，佢一訓醒，就要叫人同佢玩啦，摩打式擺尾一定唔小得，一放佢，佢就貼著你隻腳來追，家下佢屎屎，會走番入個籠，可能因為之前屎屎o既時候佢起籠入邊，冇人話佢，不過尿尿就唔係啦，仲要教佢，另外昨日比我用芝士條利誘之下，叫 cream cream 佢就識走到我身邊，不過 cream cream 對佢來講唔知同開飯有咩分別。
呢家兩大訓練目標，就係尿尿同唔好半夜叫人起身玩，半夜佢叫，有時唔理佢，佢會訓番，不過六點幾果轉好似唔work。
8/10/2002 (二)　為左食糧爬爬爬
今日如常地放ｂｂ出廳玩，因為之前試過比阿仔就入沙律個籠到偷糧食，所以就將兜糧放左係CC個籠頂到，點知都比阿仔知道左，佢幾鬼利害呀，兩隻手抓實個籠，然後一跳兩隻腳企係個底盤既邊到，然係借個籠側邊既隙爬左上籠頂食糧呀，仲要比我捉番落黎都再成功地爬到上去，真係睇到我眼到凸呀！！！仲有，今日同埋四妹剪毛ｌｕ，佢都算好乖，冇乜點反抗，兩個鐘到就剪完ｌｕ∼

cream cream 要學尿尿啦 by Isiah
昨日好高興請到 tiger 媽來教我地點護理 cream cream，一來到，當場要展示下我點叫 cream cream 佢就走來，不過，tiger 媽就唔o岩啦，用我個名來叫佢（cream cream），教壞晒，食飯時，cream cream 好眼訓，我就唔係咁想比佢訓，佢訓左，半夜又要我同佢玩，食完飯，cream cream 已訓到唔知咩事，我抱起佢，把 cream cream 隻腳放起佢塊面左右，佢都冇理我，成隻免仔咁，之後就由靚靚 tiger 媽操刀為 cream cream 剪指甲，再表演拔耳毛，勁呀，cream cream 一路訓，直到洗耳先醒。
呢家開始教 cream cream 尿尿，仲未學識，打佢 pet pet 佢又好驚，個身震晒，震到我都震震地，真係講佢又唔聽，打佢又唔係。
昨晚 12：00 比左一大碗飯佢食，因為之後兩晚 2：00－3：00 am 佢會叫人，唔知係唔係因為尿尿左起個木訓唔到定係佢想食o野，今次放佢入大籠，半夜果然冇嘈，不過佢又係 6：00 am 叫你起身同佢玩。
9/10/2002 (三)　　菜菜＝清新口氣
衰矇豬係我房賴尿呀∼∼平時佢入黎都唔會痾屎既，多數都係放低幾粒屎霸左個地盤就算，今次竟然衰到尿尿，真激死，好彩有 "浸" 入地毯到者．．．本身我都唔知，係聞到ｄ尿尿味先發覺，抹完之後唔知點舊紙巾放左係地下唔記得掉，冇幾耐，又聞到尿尿味，一望，原來沙律係到食緊舊屎紙巾呀！！！！！仲要津津有味個隻，真係激鬼死人，都唔明點解對兔仔屎同尿咁感興趣架，成口尿味仲要對住佢訓架麻，所以都係比佢食兩塊生菜，等個口清新ｄ，菜菜己經成為左沙律用黎癖口氣既食物啦∼

Cream Cream o既安全地帶 by Isiah
昨日冇咩同 cream cream（即係三妹）玩，事關我傷風，冇氣冇力，呢家開始教佢尿尿，因為我都唔想佢成日起籠到（基本上有人起家佢都唔會起籠入邊），佢好鐘意個籠，因為起入邊佢可以訓得好舒服，講到教佢尿尿，真係失敗，事關佢去得好快，次次完事之知，我捉實佢，嗅一嗅 d 尿尿，鬧下佢，拍佢 pet pet，再帶佢去佢應尿尿o既地方，讚下佢．．點知．．．佢當左果到係安全島，一企上去就唔會比人打同鬧，成日坐起果到同訓起果到．．．昨晚佢食完晚飯，捉實佢起尿尿o既地方，半小時都唔去，一行開就．．．尿尿呀∼∼∼
10/10/2002 (四)　我地搬竇呀∼∼
今日一起身見到ｂｂ痾尿痾到籠底都濕晒，所以就索情將佢地搬埋出廳喇，起碼唔洗搞到間房咁臭先啦，而家又唔怕佢地凍親，不過個廳就好似變左個超小型寵物店咁，四個籠拍住放，又好彩個位岩岩好，CC而家有４個百厭星做佢鄰居啦∼∼
Cream Cream, 咁就好孩子啦 by Isiah
Cream Cream 己經識去應去o既地方屎屎同尿尿，點解叫應．．因為 Cream Cream 媽家人話佢識，我昨日一去到 Cream Cream 媽家，同佢玩，一放佢落地一陣就隨地尿尿，之後又去左唔該去o既地方，屎屎，我唔信佢識去，不過之後，佢又真係識去尿尿喎，前後兩之都去o岩，仲有一次屎屎都o岩，今早 Cream Cream 媽話佢自己識去屎屎，順手尿尿，可能佢真係識啦，train 左 3 日，叫好好成績啦，不過佢有時會坐 ／訓起 d 尿尿果度，真係激死昨日同佢玩，反轉佢來 pu pu o支，可能玩得勁過頭，佢肚好多風，之後嘔左 d 出來。
11/10/2002 (五)　收復失地磨下磨　我比人鬧呀∼嗚∼
今日訓訓下覺聽到阿沙比阿媽鬧，原來佢咬爛左電視機條天線呀，仲係要我房個一條，連個插頭都唔見埋，用部Cam拍佢時又鬼咁乖，唔拍時就搞破壞，激死∼不過好彩後尾都係阿媽個床下底搵番到ｄ殘骸，剪剪駁駁之後都叫救得番∼∼　仲有呀，今日同沙去林村河玩時佢己經冇以前咁成日哩埋啦，仲自己走到鬼咁遠添，不過我覺得佢其實想番屋企，因為我地一走時佢都一支箭咁跑左去上樓梯，平時會等埋我地架麻，我諗佢緊係好掛住BB定喇∼∼

唔知係咪因為個籠搬走左，今晚矇豬同CC入侵我房既次數＜＜激升！！！＞＞，趕走佢地後唔夠十分鍾又走番黎，趕走完一陣又番黎，成晚大大話話都走左過黎十幾次，直到我比佢地入黎磨一大輪，收復失地後先叫收斂左少少渣，CC今次仲有幾次自己帶頭添，認真大膽呀，平時一定要有矇豬帶住先敢架麻∼∼∼
12/10/2002 (六)　乜姨媽唔同我地玩架．．．
夜晚放兔兔時為左拍埋盒ｄｖ，所以都放左ｂｂ出黎玩，雖然佢地既Size仲細隻過兩位小姨媽，不過佢地就一ｄ就唔驚，仲走埋去嚇佢地，撲埋去添，嚇到矇C即刻走番入個籠到，但ｂｂ都仲要伸個頭入個籠到聞聞下，不過兩兔都唔好嚇架，隔左一陣都有跳番出個籠到八八掛掛，希望佢地第時會相處融合啦∼
13/10/2002 (日)　ｂｂ出黎陪我玩！！
今日朝早教完琴番到屋企，一開門就見到沙律好開心咁撲埋我度歡迎我，隨後，恐怖既事情就發生啦∼∼四隻ｂｂ，由四方八面跑埋黎．．．下？？明明困左佢地入籠架喎∼∼再望一望地下，全屋包括每一間房都佈滿狗屎及狗尿，噢賣葛！！ｂｂ既身做左個掃把將ｄ尿尿全屋四圍拖，屎屎踩扁後周圍印，沙律呢個好媽媽竟然係冇人係屋企時自己開左ｂｂ個籠放晒佢地出黎玩呀！！真係不得不贊成＜史納沙係好聰明＞的哦．．．事後做到一隻野咁．．．@_@
14/10/2002 (一)　捐黎捐去好好玩　阿大粟子走左啦∼　蛇呀．．
阿大今日走左啦，去左陣主人到，雖然佢係咁多隻ｂｂ中最惡死同最嘈，不過佢好熱情架，一聽到我嗌"粟子粟子"，就會即刻走埋黎然後係咁撲上黎舔我塊面，又唔驚死，放佢係梳化頂佢都照跳落梳化再跳落地，真係話之你∼　以前沙律好似佢咁大都唔敢跳呀，都成３、４個月先唔怕渣∼∼　不過粟子主人應承左打齊針之後每個月都會同粟子影５張同帶佢黎探我架，仲有寫週記添，希望佢唔好呃我啦∼∼今次沙律都有搵ｂｂ，不過當我係咁塞ｄ零食比佢，當佢食完時就好似冇左回事囉，同我當困番ｂｂ入籠唔多覺眼，下一隻走就係傻下傻下既蛋糕啦，不過蛋糕係可以見得番最多既
，我得閒又可以去探下佢，都好ｄ，冇咁唔捨得∼
仲有呀，媽咪話今日佢出街時，見到沙律乖乖咁扒係ｂｂ個籠前面，閂門之後係窗到裝下佢啦，佢係到咬ｂｂ籠問個扣呀，佢又想放ｂｂ出黎，不過經過佢一次成功之後，我地己經做左手腳，所以．．．佢係唔會成功既，呵！同埋，沙律今日又多左樣玩具喇，就係青蛇一大條呀！！
夜晚同矇豬執籠時，都唔知佢做乜鬼，我如常開左佢個籠坐係到執ｄ木糠出黎換，佢就捐埋黎我同個籠中間，然後頂高其中一個閘（籠門），捐落下面，再頂高另一個，之後壓低個身行過去，行完之後繞過個我身，又捐入黎我同籠中間，重覆以上動作，哈∼乜咁樣好好玩架咩？？
16/10/2002 (三)　 我爬我爬．．出到黎啦∼
零晨時份，係到準備ｂｂ既糧時，見到有個大黑影追住一個小黑影係身邊飄過，睇真ｄ，原來係阿仔比沙律追住呀，不過我明明困左阿仔係籠架喎，唔通沙律又開左佢地對門？望下，又唔係丫．．．抱番阿仔入籠，過左一陣，又見到佢走左出黎，佢．．佢自己係個籠入面爬左出黎呀！！佢．．．才不過係二個月大，竟然可以爬到出黎，好利害呀，沙到到而家都唔識呀，死啦，第時冇人係屋企時實拆左我間屋都似呀！！
17/10/2002 (四)　我．．好肥咩？　阿仔叻過我添．．
因為阿仔好輕易咁係籠到爬到出黎，所以認定佢係ｂｂ中最聰明既，所以今日試下教佢Sit，拎住粒糧用手按佢屁屁要佢坐低同時叫Sit先比佢食，食左２粒之後，再叫Sit，佢竟然真係坐左係度喎，唔通．．佢真係識，試多幾次，佢真係坐係到喎，嘩∼好利害呀，聽日再試試先∼

夜晚望下兔兔搞乜鬼，見到矇豬，當堂嚇左一嚇，佢．．．好肥呀，條頸巾就黎可以包住個咀，佢都唔係食得好多糧丫，平時都係食草食菜多，冇理由咁肥架，定係為凍天作準備，所以生多ｄ毛毛呢，希望係後者啦，唔係真係要同佢跑下樓梯減肥先得呀∼

今日 D 狗 BB 兩個月大啦 by Isiah
Cream Cream 大隻左好多，昨日我出門時，佢境隨地小便，壞孩子，仲有，家下唔比芝士條佢食，叫佢個名冇之後咁熱情地走來。上星期，cream cream 老豆來探佢，呢隻小鬼，追著個老豆唔放，係要咬到佢老豆先安心。
18/10/2002 (五)　BB蝦我呀．．　朱古力好叻仔呢∼
今日再試下阿仔係咪識Sit，經過幾粒糧既測試之後，証實左佢真係識呀！坐定定望住粒糧好乖仔，之後教埋佢Up，嘩！一教就識啦，雖然唔係企得好穩，不過都真係好叻叻啦，但係就仲未識得番入籠屎尿，要耐唔耐抱佢入去等佢痾完先再放過∼∼　仲有呀，阿閃（Mousse）好惡呀，成日走去蝦姨媽，仲要選個細膽既 CC 黎蝦，企係佢個籠前面吠，搞到 CC 即刻係到踏地求救，之後又向住阿閃個方向挖地，不過都真係嚇左阿閃一嚇，搞到佢向後退喎，冇幾耐困番ｂｂ入籠時，阿閃係個籠到都要吠 CC 呀，真係比佢激死 ><
19/10/2002 (六)　超級煩兔．．
唔知點解，呢個禮拜兩隻兔變得好鬼煩呀，成日係我房門口係咁咬＆推塊膠板要走入黎，趕完佢走又再咬過，咬到累就索性扒係我房門後等待時機，一見我行出行入就衝入黎，除左我房，廚房、厠所、媽房、琴房．．通通都係佢地既目標，趕極都唔走，真係超級好耐性呀，佢地都有好一陣子冇扒係我房門口架啦，通常都係扒係餐檯底，耐唔耐就走黎８掛下，不過呢排又再次長駐我房門口喇，真係冇佢地咁好氣呀！

做咩鬼呢.........佢 by isiah
呢幾日，Cream Cream 都唔知佢做咩鬼，明明自己識去洗手間，有時又唔去，起檯底尿尿，真係唔係好明佢，可能因為佢成日去o岩尿尿，我地即刻捉著佢同佢清潔佢對腳有關啦（佢去完通常踢返自己果 d）。
20/10/2002 (日)　蛋糕都識 Sit 啦
見阿仔己經識 Sit 識 Up，同一個阿媽生既應該差唔多聰明既，所以就教埋阿蛋糕同阿閃Sit，點知，竟然係蛋糕一教就識喎，仲要Sit得好定個隻，平時佢最懞架麻，食野又唔搞家姐阿哥搶，玩具又係，開餐時又唔專心鍾意周圍望，估唔到佢都學得咁快呢，相反閃就麻麻地識，淨係識得撲向粒糧到，叫好多聲先係咁易坐一坐，之後再撲，要慢慢再教佢喇∼
21/10/2002 (一)　你地係到搞乜鬼？
＜兔仔係好奇心重既動物＞呢句說話真係講得冇錯，因為CC就係一個好例子，夜晚放左佢地出黎玩又咁岩要餵ｂｂ時，CC 就會好８掛咁走埋黎聞下望下，搞到ｂｂ食糧時都有ｄ分心，抬頭望一望呢個小姨媽搞乜鬼，而呢隻８掛 C 見ｂｂ有動靜望佢時又驚到轉頭走喎，但見ｂｂ又繼續食時又跑番番黎望，真係冇佢修呀，又要驚，又要望，８掛到死呢∼∼
22/10/2002 (二)　ｂｂ搶我ｄ玩具呀∼
而家餵完ｂｂ都會放佢地出黎玩，玩到累先困佢地番籠訓，可能食飽飽有氣有力既關係，個個都好似好Hign咁玩到癲晒，搞到沙律都伸條脷出黎"heiheihei"，又勁飲水，ｂｂ仲成日同佢爭玩具添，１隻小公仔４隻手手腳腳放別比４隻狗咬住係咁扯，見到佢地真係搞鬼∼∼不過竟然比阿仔搶羸而唔係沙律喎，佢搶到之後不知幾開心，咬住個公仔通屋走示威，沙律就係咁追住佢，不過佢又醒目呀，跑去茶機底，再捐去梳化後面，搞到沙律得個望字（太肥入唔到去），呵呵，比阿仔玩到佢氹氹轉呢∼
23/10/2002 (三)　ｂｂ中惡霸－朱古力
朱古力阿仔，越黎越鬼惡啦，唔知係咪因為放親ｂｂ出黎，沙律都係咁追住佢咬，搞到佢咁惡死呢？有時沙律會咬住阿仔隻耳然後拖住佢四圍行架，阿仔用力撐住個地下都係冇用，所以有時沙律一埋去佢就係到Weliwulu，我地捉佢入籠痾尿佢就擰轉面一啖咬落黎，真係話知你死，嗚∼∼∼好惡呀∼∼∼
24/10/2002 (四)　唔放我就拆左個厠所去
今日晨咁早就聽到矇豬係個籠到"binlinbanlan"，原來佢又拆左個厠所出黎呀，都唔知做乜鬼，明明綁實左架麻，咁到比佢拆到出黎，真係"近"呀，成日都發皮氣∼
25/10/2002 (五)　阿仔帶頭識去厠所喎！
今日，朱古力終於學識左番籠痾尿尿啦，一下屁屁都冇打過佢架，就學識左，真叻叻呢，不過佢阿媽就成日搞住晒，朱古力明明入左籠想痾架麻，佢又伸個頭入去咬下佢搞下佢，搞到佢冇痾到就出番黎，同阿仔玩少陣都唔得，真麻煩呀∼
26/10/2002 (六)　心情唔好．．．　阿仔比阿太婆打屁屁呀∼
朱古力明明學識左去尿尿，點知今朝媽咪放佢出黎時，竟然係出邊尿尿，結果比媽咪打屁屁，我問"咁佢有冇好驚呀？"，媽答"緊係冇啦，仲Wu我添呀，幾惡死呀∼"，不愧係ｂｂ中既惡霸呀∼∼∼

矇豬今日唔知做乜發皮氣呀，我比Papaya佢又唔食，比蘿蔔乾佢又唔食，仲要我一放埋去佢就擰轉面，我．．．冇鬧過佢丫，究竟搞乜鬼呢？會唔會有ｄ作病呢？不過冇鼻水冇打噴嚏冇眼屎冇肚痾冇軟便兼有屎有尿一切正常，不過都有ｄ擔心添．．．希望真係鬧下情緒啦∼∼
27/10/2002 (日)　發完皮四ｌｕ∼
零晨，繼續觀察矇豬，仍然係一舊飯咁冇咩反應，唔啋我唔食野，後尾唔知係咪嫌我煩仲走去小木屋入面哩埋唔出黎，CC 見到家姐咁，都有舔下佢，不過家姐就唔多理呢個阿妹喇，搞到 CC 都唔多開心，番番入個籠入面扒係到冇出黎玩，之後半夜起身望一望佢地，見矇豬己經係小木屋走番出黎，扒左係屋前面，而 CC 都陪住家姐，不過我比野食佢都係唔理我呀∼嗚∼再過一陣天光喇，又出去睇下佢地啦，噢∼回復正常喇，矇豬終於發完佢ｄ唔知咩皮氣，肯食野喇，終於鬆一口氣呀！
28/10/2002 (一)　太太婆大架光臨呀，一定要同我地玩！
今日放ｂｂ出黎玩時，阿太太婆走左落黎我地屋企坐下，ｂｂ見有人黎當然好熱情咁撲埋去啦，係咁咬同扯阿太太婆條褲，搞到太太婆縮起隻腳又唔係，推開佢地又唔係，結果就係到拍打梳化然後叫 "咬我，打你呀下（啪啪啪）"，果然有ｄ用，ｂｂ都向後退一退，然後轉移目標去搵太婆玩，不過阿四妹呢，就唔知做咩，企左係到係咁吠呀太太婆，吠到太太婆摸一摸佢先罷休走去玩，玩一陣又走番黎吠，又係要摸摸佢先走，搞到阿太太婆都話 "真係怕左你地呀．．．噓"，第時佢地大個就慘啦，一番屋企時都唔知同得邊個玩，都係要練定分身術先得呀=P
30/10/2002 (三)　再黎超級污漕兔　狗造飲水器？？
月頭先同CC清潔完屁屁，都未夠一個月，又發覺好污漕啦，今次係一Pat乾左既葡萄串痴住左屁屁近條尾既位置，仲有生殖器則邊ｄ毛都硬左一舊，最怕同佢清潔呢個位置，因為一個不小心就好容易整傷佢，究竟佢幾時先學會做一隻乾淨既兔兔呢？

孻女蛋糕一直都被我認為係ｂｂ中最慒下慒下既，反應較遲鈍，成日傻傻下咁，爭咩都唔夠家姐阿哥黎，今日阿仔兩隻手按住個籠頂既邊企左係到，然後痾尿尿（唔怪得成日個籠出面都有尿啦．．．），點知蛋糕見到竟然伸個頭埋去飲，真係唔知叻（反應快）定係蠢好，搞到成塊面濕晒都係阿仔ｄ尿尿．．．
31/10/2002 (四)　四妹嘔，阿仔爭住食．．．
夜晚餵完ｂｂ放佢地出黎玩時，唔知係咪因為玩得太癲，所以玩左一個鐘到阿四妹就嘔啦，好明顯ｄ糧冇乜點𡁻就吞落肚，因為嘔出黎ｄ都見到半粒發大左既糧（本身我都會將ｄ糧浸淋之後一分為二為比佢地食），嘔完之後佢就順個便食番，點知比阿仔見到，即刻走過去搶黎食@_@，真係比佢激壞呀．．．話晒都係嘔吐物丫，咁都好爭黎食既，食飽冇耐之麻．．．真係咁肚餓？？