1/11/2002 (五) 我咬呀∼
今日執衫時，發覺好多件係屋企粗著既衫後面有好多個小孔，哼∼緊係 CC 既傑作啦，平時成日走埋黎，係我後面扯我件衫，趕佢走之後又番過黎扯，初頭都冇乜為意，因為佢一扯我就會趕佢走，點知原來已經咬穿左咁多個窿．．真係激死人 >.<
2/11/2002 (六) 又打針啦∼
ｂｂ今日打左針啦，醫生話佢地好活潑呀，係咁追住人地隻腳跑，又撲埋去，打針時佢地都係冇反應，真乖呢∼　不過蛋糕佢今朝屎屎時有少少血呀，嚇鬼死我，好彩之後要打針可以比醫生睇，醫生話佢可能有蟲，因為我仲未同佢地杜腸蟲，我都唔記得左有呢回事，因為個陣帶沙律去打針時醫生順手餵埋，打晒三支針我先開始自己餵佢食，所以都唔記買比ｂｂ食，真大慒呢 ^^"，拿拿林出去買左之後就餵佢地，之後蛋糕ｄ屎都冇咩血啦，都放心ｄ．．．不過醫生話佢有ｄ皮膚病，要浸葯水，同埋同阿哥家姐隔離，唔係好易會傳染，唔．．．真難搞．．．點隔呢？？
3/11/2002 (日) 幸福兔蛋糕拜拜啦∼

今日睇到網友既留言，知道係愛協待領既兔兔們生活情況，真係好心 UP，連草草咁基本既食都冇，只可以食紙碎，真係好慘呀∼∼不禁覺得屋企個兩隻皇帝兔好幸福，草草較碎、太幼、太粗、總之咬落去口感唔好既－＞唔食，菜只愛食葉，莖部－＞唔食，名符其實 "生在福中不知福" 的好例子，拎住一束Orchard Hay 去餵皇帝矇，左聞右聞，然後將一ｄ佢忍為質素唔好既草咬出黎放係地下唔要，之後先開始食，有時食食下又唔要食過第二條，唉．．．真係要帶佢去愛協睇下佢ｄ朋友仔既苦況先得呀，等佢成日咁浪費丫拿∼∼

因為蛋糕皮膚有ｄ問題，醫生叫我隔開佢同阿哥家姐，不過因為得一個籠，所以做唔到，咁就唯有叫佢阿公今日接佢走囉．．．好∼唔∼捨∼得∼呀∼，不過星期二我就會去探佢啦，順便同佢用葯性Shampoo沖涼同拔耳毛，本來想今日沖左先，不過岩岩打完針又唔沖得住，其實養左沙律咁耐我都係同佢沖過一次渣，Nei咁Hei，平時都係媽咪幫佢沖既，希望到時唔會雞手鴨腳啦∼
4/11/2002 (一) 阻住我，噴你丫拿
坐係梳化同矇豬個籠中問約兩尺位同佢執籠時，呢隻麻煩兔又走埋黎捐黎捐去，係到要係我個身同籠中間捐去我身後面，再捐入梳化同牆中間既罅隙，係餐檯個邊出番黎，然後再跑過黎捐過，有時又會掉轉係個邊經梳化罅走去我後面，發覺我阻住佢就係我背脊係咁挖，真係攞命．．．好彩天氣轉涼件衫都厚厚地，唔係實花晒，好啦，借少少位比佢過，點知仲要向我噴尿．．．真衰豬黎架！！
5/11/2002 (二) >>>>拔耳毛呀∼
今日同左朱古力、Mousse拔耳毛，佢地都好乖呀，冇咩大反應，可能我等佢地玩左幾個鍾，玩到累想訓先同佢地拔啦，所以都好順利，過幾日天氣暖ｄ，就同佢地洗埋白白同剪番個靚裝過冬天啦∼∼
6/11/2002 (三) 有新朋友到訪呀∼　屁屁．．屎屎．．
因為朋友要去旅行，所以想我幫佢照顧兔兔，又因為怕屋企太多寵物兔兔會大驚，所以今日就帶左兔兔＜Miffy＞黎玩，睇下佢適唔適應，沙律對呢住新朋友極感趣，成日走去聞佢，又追住Miffy玩，係咁追住佢屁屁黎聞，好搞笑呢，玩左一陣，大家姐矇豬終於知道黎左隻兔兔，所以都走埋去聞埋一份，係咁追住Miffy，屋頭到屋尾，屋
尾又番番去屋頭，我諗 CC個一刻心裡面實係諗"好囉，大家姐有新目標唔追我，甩難囉．．．"，呵∼　下個星期五Miffy就會係我屋企住幾日啦，到時實好熱鬧者∼

仲有，今日發生左ｄ核突事件，話說沙律屎屎時，有一小時痾左係籠出面，所以見到佢哩左係餐檯底，緊係驚比我地鬧定啦，點知同佢執左知後佢都唔出黎，再睇，原來係屁屁有條屎屎痴住左痾唔到出黎呀，咁媽咪就用紙巾包住同佢"蚊"出黎啦，點知拉到條兩吋長好似手指尾咁粗既白色條條出黎，開頭仲嚇死媽咪以為係咁大條蟲，睇真ｄ原來係綿花黎架，佢個衰豬又走去咬梳化ｄ綿花出黎食呀，結果痾時痾唔出就"din" 住左ｄ屎屎喇．．．咦．．．諗番起都核突呀∼∼
7/11/2002 (四) 剪毛剪毛．．．
今日，同左阿仔剪毛啦，好∼靚∼仔∼呀∼，剪完之後變左好靚既淺灰色，個樣傻傻下咁，仲有今次都好乖啦，剪個身同個頭時都冇乜點郁，所以一個鐘到己經搞掂，係成日要扒係到訓唔肯企起身，懶豬黎架！！
8/11/2002 (五) 婆黎探我呀∼
今日終於去得成探蛋糕啦，佢．．．好似都仲認得我喎，冇見幾日，ｄ毛長左好多哇，條界都冇左ｌｕ．．要搵日同佢剪個靚裝過冬天先得，雖然佢個籠細ｄ，不過快ｄ學識去厠所咁就可以訓床仔唔洗困籠啦，希望佢做個叻ｂｂ快ｄ學識啦，不過唔知係咪阿公個邊個地下好滑呢，佢係到跑時跣下跣下咁，有時仲路左係到，好搞笑呢∼∼
9/11/2002 (六) 想抱我地？好難啦∼
Timothy無啦啦缺貨，諗住買包拎去愛協比兔兔都買唔到，結果只買左包草樽，嘿∼好抵，明明打價４５，do 機時只收左我３５，哇哈哈∼　去到既時候，發覺原來矇豬同CC，其實都唔係咁肥同大隻者．．因為個到ｄ兔兔隻隻都好肥肥、好大隻呀，仲大隻過樓上隻貓花花呢，不過兔兔真係好乖呀，見到網友仔反轉佢地梳毛、剪指甲，佢地都冇點反抗．．．如果係矇 C，呵∼抱住佢地個個都變左花面貓囉．．．
不過番到屋企，見到佢地，都忍唔住要抱下佢地，然後反轉，矇豬例牌反轉之後未數到第２聲，己經一個飛腿再加１８０度大轉身，安全著地，幾次都係咁，激死，而CC，都未抱起佢，己經起勁咁原地跑，嗚∼佢細個好乖架．．．唉．．．失敗呀！
10/11/2002 (日) >>>>閂埋對門先∼
今日放出矇C出黎之後，過一陣同佢地執籠，發覺矇豬個籠對門自己閂埋左，係全完閂晒唔係推左一半上去，之後我開番同佢執木糠時，矇豬又走左埋黎，係到咬對門，咬幾咬之後就向上扯，又再咬咬咬向上扯，到對門推高左一半之後，就係個底到咬，然後向上推，經過一番努力之後，終於閂好左對門，差在冇扣實去，不過其實佢都有咬個扣架，不過佢向後拉唔係向上推，所以就扣唔到啦，佢緊係唔想CC走入去食佢ｄ野同埋係佢個籠痾屎定啦，不過睇住佢咁咬同扯，真係驚佢扯甩ｄ牙呀∼∼
11/11/2002 (一) >>>>我要抱抱呀∼
今日同四妹Mousse剪毛，全程佢都冇坐低／扒低過係到，十分好精力，之前己經放佢地玩到累先架啦麻．．．一路剪，佢就一路用兩隻手抓住我膞頭，然後努力嘗試踩埋落我心口等我抱抱佢，拉開佢之後，一靠近佢佢又爬上黎，最後唯有比佢撘住膞頭黎剪背脊ｄ毛毛，之後再幾經辛苦先剪到頸頭同ｄ毛，又企唔定喎，郁黎郁去．．所以個樣都剪得麻麻地．．．之後洗白白佢都好乖，不過就好唔鍾意個風筒喇，係咁對住佢擘大個口，好似想食左佢咁，好搞笑呢∼
12/11/2002 (二) 張梳化係我地架！！
夜晚困左ｂｂ放兔兔時，無啦啦係房聽到ｂｂ係咁嘈，無理由架．．．食飽飽應該訓到好豬豬格，出去睇下，原來佢地係到鬧兔姨媽呀，事關佢地跳左上梳化挖棉花（梳化兩邊己經比兔兔咬穿左個窿，成日挖𥚃面ｄ綿花出黎玩@_@"），因為ｂｂ見過佢地阿媽挖（又因見過家姐挖，所以唔執輸挖埋一份），所以抱左佢地上梳化時會照樣學樣，係到挖完順便食落肚，所以見到小姨媽挖時就嘈到拆天喇，佢地緊係當左呢個挖梳化既玩意係佢地專享架啦．．．唉．．．張梳化買番黎，係用黎坐架，嗚∼∼
13/11/2002 (三) 我未玩完架．．．
夜晚係房玩電腦時，見到沙律企係床到係咁聞個窗，有時又"捐"個頭去窗簾布後面，過左一陣，又企床到抬頭向住吊係到既扒地熊吠，抱係佢睇下做咩啦，又淨係係到聞下聞下，古古怪怪咁，再過左一陣，佢又走左去床頭係咁聞，又伸個頭去ｄ罅位到唔知做乜，跟住，恐佈既事情就發生左．．．我．．．見到有個黑影閃過．．．好快好快．．．之後又唔見左．．．沙律就繼續係到聞，丫∼∼∼∼∼∼好驚呀∼∼∼∼
有小強呀！！！原來沙律之前聞窗，係因為有小強係出面爬入黎呀，嚇鬼死我，不過沙律就好似好開心咁，佢學左花花鍾意玩曱甴呀．．．噢賣葛！我抱沙律出去等媽咪捉小強個陣，佢都係咁抓門要入去，等小強被殺後放番佢入去，仲要死心不息咁周圍索周圍聞去搵阿小強兄添，嚇死．．．
14/11/2002 (四)我挖我挖∼好多雲呀∼
夜晚，一行出廳，好多雲呀，仲有一隻神仙兔凸左個屁屁出黎，矇豬又咬梳化啦，不過今次都好，仲見到半個屁屁，唔係全隻兔捐左入梳化入面，真係比佢激死呀∼
15/11/2002 (五) 有新朋友呀！！
今日朋友帶左兔兔Miffy黎住一個星期，沙律見到佢好開心呀，係咁聞佢，不過就好乖，冇撲佢只係聞聞下，但大家姐矇豬就追到Miffy傻，所以唯有困下Miffy先啦，等佢地可以適應下，過左一陣見Miffy好似冇咁驚，又肯食野，就開左佢個籠對門喇，嘿∼點知佢又八八掛掛咁走左出黎，矇豬一見就飛撲埋去，結果，就比我困左入去CC個籠，而CC，就幫家姐追埋一份（終於唔係被追∼），隔開佢地之後，Miffy就走左入矇豬個籠度（矇豬係CC個籠望住勁緊張，係咁咬籠！），而CC就走左入去Miffy個籠，仲要食佢ｄ草草喎（隔離草香？），過左一陣Miffy就走左出黎，仲跳左上CC個籠頂添（間接騎住大家姐呀！），最後，我又困番佢喇，洗左ｄ菜菜，比左兩塊佢食，佢都好快食晒，因為初黎報到，所以我都唔敢餵太多，怕佢肚痾呀∼

過左一陣去睇下Miffy，一開對門佢就想走出黎，CC見到就走左埋黎啦，仲想跳入去，不過比我捉住左，之後Miffy係到聞下聞下，跟住．．．跟住．．．．佢捉住CC個頭UnUn呀！！！！！CC向後退時都拉左Miffy出黎，兩隻都比大家嚇死，各自跑番入自己個籠，場面都幾搞笑 ^O^，CC真係慘呢∼呵∼

不過之後佢地兩姊妹就夾埋蝦Miffy呀，大家姐就跳左上籠頂，騎番住佢，順便係個紙巾盒到扯ｄ紙巾出黎玩，二家姐就負責咬籠（佢竟然張鎖住門個扣咬開左呀∼），再夾埋圍住個籠散屎，好多好多屎圍住個籠呀∼∼∼
16/11/2002 (六) >>>>媽媽，我番黎啦∼∼
今日ｂ公帶左蛋糕黎剪毛，佢黎到好似好開心呀，周圍走周圍跑，不過佢阿媽沙律仲開心呢，係咁追住佢黎玩，唔知佢仲知唔知蛋糕係佢個女黎呢？不過同蛋糕剪毛時佢就麻麻地合作喇，可能想同阿哥家姐同阿媽玩啦，所以都冇時定，仲跳左幾次落地下添，不過剪完都係好靚女，呵∼仲有呀，繼上次沙律痾花綿花屎後，Mousse又痾草草屎啦，走去偷兔兔ｄ草食，結果消化唔到痴住ｄ屎屎，之後又係"定"住係屁屁到，要同佢"蚊"出黎，真係核突呢∼

Miffy好似開始適應呢到既生活，開始咬籠要出黎玩，出到黎周圍八掛，跳上矇豬籠頂示威，鑽入去罅位到玩，跳上放電視機既櫃咬野．．．Woo∼好百厭呀！
17/11/2002 (日) 想挑戰我？冇咁易呀∼
原來矇豬同Miffy都可以相處到喎，今日放矇豬出黎時，佢係都要走入去Miffy個籠到搞搞震，一個手腳慢就比佢成功衝左入去，不過佢都冇蝦Miffy，只係不停咁磨同放地雷，但反而Miffy就成日將個頭損入矇豬個肚肚到，之後．．．嘩∼佢挑戰大家姐呀，佢竟然想UnUn矇豬，不過當然唔會成功啦，佢地個Size差成幾個碼．．．第時大個女實係小惡霸黎者！
18/11/2002 (一) BB好重呀
今日手痕痕兩隻ｂｂ一齊抱，嘩∼∼點解好似咁重咁既，之後唔多準咁同佢地上磅，朱古力有成７磅到重呀，Mousse就輕ｄ啦，６磅到，而沙律都係１４磅到渣，佢地就黎追到阿媽啦，真係大得好快好快呀！
19/11/2002 (二) 下？放係地下唔係飲得架咩？
今日，沙律比媽媽話個呀，地主公杯茶岩岩換完冇耐，成杯冇晒得番幾滴，原來沙律走左去飲，結果就比媽媽捉左去拜拜ｌｕ，好彩冇偷ｄ生果食渣，唔係有排佢拜呢∼

自從Miffy黎左之後，三隻兔就展開左一場激烈既地盤爭霸戰，尤其是矇豬，係Miffy 個籠周圍係咁放不停咁放地雷，不過Miffy 都唔輸蝕架，出黎時就去番矇豬個籠前面尿尿，再跳上佢籠頂到坐下，搞到被困既矇豬大為緊張，見到佢地都好笑呀∼呵∼
20/11/2002 (三) 呢個又唔得？
今日朋友仔黎學琴時買左杯奶茶飲，再順個手放左係餐檯面，結果，就比沙律飲左幾啖喇，仲搞到張餐檯都係添，真係冇佢乎，成日都偷野食同飲，有時比餅餅佢食，仲要擔去ｂｂ籠前面咬碎去，然後慢慢逐少逐少食，搞到ｂｂ得個望同恨字，真係比佢激鬼死，第時ｂｂ大個時佢就慘啦，實搶晒佢ｄ野食呀！
21/11/2002 (四) 蛋糕好肥豬哦∼
今日入左ｂ公到探蛋糕，嘩∼好肥呀∼雖然朱古力係ｂｂ中最大隻，不過佢係骨架大，肉就反而家係太多，不過蛋糕本身骨架唔叫太大，不過就．．．都幾多肉喎，望落去圓碌碌咁呢，去到時佢都好熱情呀，係咁撲埋黎舔，唔∼算佢有良心仲記得我啦∼不過就好鍾意咬野喇，同埋見佢ｄ皮膚都好左，冇上次同佢剪毛咁多頭皮ｌｕ∼
22/11/2002 (五) 痾屎落糧兜
兔兔會痾屎入糧兜去話比人聽糧兜係屬於佢既，做唔到沙律都有樣學樣呀，將ｄ屎屎痾入自己個兜到，唔想食狗糧都唔洗咁浪費丫∼
23/11/2002 (六) >>>>Miffy拜拜囉∼
Miffy主人今日番黎，所以夜晚就黎拎番Miffy走ｌｕ，養左佢幾日之後，覺得佢好似比之前肥左少少，不過一直以為係自己錯覺黎，點知佢主人見到Miffy後，都覺得佢肥左喎，唔通．．．我屋企係會養肥ｄ兔兔既？唔怪得之矇C咁肥啦．．．Miffy住左一個禮拜之後，好似練大左個膽，因為都冇黎個陣咁驚ｌｕ，唔知番到屋企之後會唔會奀皮左呢？
24/11/2002 (日) 又有新朋友到訪啦∼
今日網友仔帶左佢仔兔兔PabPab黎玩，沙律見到當堂好開心呀，係咁聞想同佢玩，不過PabPab緊唔係啋佢啦，過左一陣，就放左PabPab出黎見下矇豬同CC，唔∼好似CC 既吸引力大少少，因為PabPab比較多走去聞阿CC，不過後尾又哩左係矇豬個籠個邊，因為矇豬比較易控制，所以就淨係放左佢出黎玩，嘩∼佢竟然肯比PabPab"Un"佢呀（PabPab係男仔黎，不過做左公公喇），過一陣，又到矇豬Un番佢，總之兩隻兔就輪流Un對方啦，都幾搞笑呢∼∼


26/11/2002 (二) ．．．．．
因為ｂｂ會咬矇C間小木屋，所以放佢地出黎玩時就會將木屋仔放係矇豬籠頂到，點知放兔兔時唔記得拎番落地下，過左一陣，奀皮兔矇豬就跳左上去個頂到，嘩，好高高在上呀∼∼　不過一見到我，可能驚比我鬧啦，就急急腳就跳番落黎，點知一個唔小心，叉錯腳哦，呵呵呵∼∼∼場面超搞笑呢∼
27/11/2002 (三)
今日一個唔為意，開左屋企個木門唔記得閂，就比兩隻兔走左出去，佢地又唔識死咁去搞地主公公，個香爐打翻左不特止，連個牌都打翻埋訓左係地下，矇豬仲要踩住企左係上面添，真係激死，好彩阿媽睇唔到渣，唔係佢地實屁屁開花都似∼
28-29/11/2002 (四-五) 　紙巾，我鍾意呀∼
呢兩日唔係香港，所以又要拜託媽媽照顧ｄ百厭星，番到屋企例必收到投訴，今次係投訴兩隻兔兔跳左上放電視机個櫃到，然後將兩盒全新紙巾咬咬扯扯抽晒出黎，舖滿整個廳既地下，不過都好彩，如果唔係有呢兩盒紙巾既話，我諗電視機呀、錄影機呀個ｄ電紙就一定斷晒ｌｕ．．．
30/11/2002 (六)
平時餵沙律食餅餅時，佢就最鍾意拎去ｂｂ個籠前面咬碎佢慢慢食，如果ｂｂ出左黎既話，就拎去梳化上面食，等ｂｂ得個睇字，不過，今後既日子，呵呵∼∼冇呢支歌仔唱啦，因為朱古力己經跳到上梳化啦，仲要唔洗助跑喎，真叻叻呢！