1/12/2002 (日) ｂｂ打最後一支針啦
今日係沙ｂ三個半月大日子，打埋第三支預防針就可以出街街啦，真開心呢，仲有，今日黎左個沙家族小聚會，不過就獨久阿大粟子，真係不得不點名鬧一鬧佢主人＜陳百興Victor Chan＞先生，事關到目前為止我一張相一篇週記都未收過，真係絕頂冇口齒呀，唔該識得佢既人幫兩口話下佢！！！
今日ｂｂ同佢地老豆黎到，發覺阿仔同老豆真係好似樣，毛色一模一樣，個架都特別大，可能大個左大隻過老豆添呀，而蛋糕呢，就係最肥，醫生就過左冬天要同佢減肥添呀，鬼咩，佢主人豬養到隻狗都變肥豬仔，仲有呀，蛋糕同CreamCream好似樣呢，不過就冇咁叻啦，唔多識Sit又唔識Down冇鬼用呢，而Mousse，隻耳仔最豎係佢呀，真係多得佢地媽唔少呀，成日咬住係咁扯．．．
2/12/2002 (一) 睇到個厠所就煩
己經連續唔知幾多日矇豬將佢個小厠所拆左出黎，我己經用小鐵線將佢綁實架啦，都可以比佢扯得甩，都唔知咩牙黎既．．．以前都唔會日日拆佢出黎，呢個禮拜都唔知搞乜鬼，究竟．．有咩方法呢？　
3/12/2002 (二) 出街街，洗乜驚喎！
今朝一早起身，發覺電視機隔黎好多木糠，唔通．．．兩兔又跳左上去？冇理由架，又冇放木屋企係到，成米高架喎，就咁都跳到上去？唔係下麻．．．如果係都幾麻煩，ｄ電視呀、錄影機呀ｄ電線全部係晒到．．．不過都係冇理由，冇理由跳到咁高既．．．（R爆頭中．．．）
因為ｂｂ打晒針，所以今日就帶左朱古力出街，佢好叻叻喎，出世至今都未離開過屋企半步，但出到街一ｄ都唔驚，會跟住阿媽跑，有時又會自己周圍八掛下，唔似得沙律細個時咁細膽，唔知Mousse會唔會都係咁呢，好∼聽日就到佢出街街啦，一ｂ一日，冇法子啦，一次帶三隻出去好困難哦！
4/12/2002 (三) 姨媽搞我地呀！
一大朝早，又發覺兔幹既好事，佢地兩隻衰野，走去搞阿ｂ呀，係到咬及扯屎盤ｄ報紙出黎，仲要係連埋報紙上面ｄ屎屎都扯埋出黎，哈∼佢地又好野喎，扯報紙時ｄ屎冇碌番落個盤到，真係高技術呀，好彩佢地冇踩落去渣，唔係就變左＜狗屎兔＞啦∼
6/12/2002 (五) 好忙應酬婆同太婆呀∼
今日我同阿媽一個坐係屋頭，一個坐屋企，輪住叫ｂｂ，搞到佢地鬼咁忙，不停兩邊跑應酬我地，到後尾，我地都冇叫佢，淨係坐係到，佢地都識得跑完去媽媽到撲一輪，之後就番黎我到撲一輪，跟住又去媽媽到，不停咁來回跑，直到我地企番係身，真係忙呢∼呵∼順便可以減下肥呀∼
7/12/2002 (六) 一行５隻狗，真熱鬧耶！
今日終放見到，栗子啦，第一眼見到佢，都嚇左一嚇，一隻係非洲番黎既乞兒仔呀！！佢係ｂｂ中最黑既，同埋佢個半月大走左之後，到而家都未剪過毛，成２個月啦，ｄ毛己經好長，所以好 "嬲休" 呀，隻耳仔ｄ毛多到完全見唔到耳窿．．．所以我都忍唔住同佢拔左耳毛，仲有呀，佢個咀仲有一陣唔知咩酸粟味，好鬼臭 @_@" ，同埋佢既性格變左好多呀，佢黎到時到阿媽同細佬妹時驚到條尾到貼住個屁屁窿，估唔到佢以前咁惡死而家會咁細膽呀，不過同佢拔耳毛時佢都幾惡死喎又．．．
到夜晚，我地一行５一帶左５隻狗（沙律＋４隻沙ｂ）去林村河到玩，栗子驚到都唔敢周圍去，淨係企係ｄ人隻腳下面，最大膽竟然係蛋糕喎，周圍走，有時仲去撩ｄ大狗狗添，Mousse就成日自己走左去，朱古力就正正常常啦，唔知幾時可以再見到栗子呢，下次見佢應該會靚女番啦，因為過幾日佢就會去扮靚靚囉∼∼
8/12/2002 (日) 屁屁．．．剪到我呀！

之前一早Plan好今日同沙律剪毛，點知今日咁鬼凍，不過算啦，今日唔剪又要等多一個禮拜先得閒，室內都應該唔會太凍者，佢夜晚又同我一齊上床訓既，不過剪毛時發生左個小意外呀，我唔小心整到佢小小耳仔呀，損左少少．．．嗚．．好彩都冇流血整係紅左者．．．下次要小心ｄ先得∼
之後放左沙ｂ出黎玩，原來Mousse好鬼精架，我坐低抱住左佢時，朱古力走埋擘大個口，都未掂到阿Mousse，佢就尖叫定先，搞到阿仔都即刻合番個口，之後再擘大時Mousse 又嗌，真係煩呀∼

到放兔兔時，聞到CC好似有ｄ臭味，摸一摸佢屁屁，嘩∼唔係下麻．．．一大舊屎乾左痴住個屁屁，都有成個５蚊咁大舊呀，都唔明點知可以咁污漕都唔清潔下佢架，最衰我洗左白啦，要聽日先得閒同佢整囉．．．
9/12/2002 (一) 　Wu....
尋日同沙律剪完毛之後，唔知點解佢好燥呀，抱佢同佢著衫仔都鬼咁忟憎，仲要係到"Wu"添喎，次次剪完毛之後都係咁，搞竟點解呢？
11/12/2002 (三) 　執阿媽手尾執舊衫．．．
嘩∼好凍呀，所以都拎左兩件以前買落比沙律著既衫比ｂｂ，大一件上件聖誔時沙律岩著既衫仔，朱古力竟然有少少窄呀！！佢真係好大隻呀，同沙律做左媽媽之後都肥左好多下，應該係成個架都濶左少少，好多衫都唔係幾岩著，好彩可以比ｂｂ都冇咁浪費者∼
夜晚放兔兔時，現好似有少少血跡呀，不過睇黎睇去又唔多覺眼佢地有傷口喎，不過應該係 CC 整到既，因為我見佢個屁屁痴住左少少有血跡既木糠，不過始終都搵唔到個傷口喎，真奇怪呢∼
12/12/2002 (四) 屎尿毛肉，溶為一體
今朝一大早出門口去賺錢養ｄ百厭鬼時，一開門，一個唔為意行開左１０秒再行番出去時，就見到兩隻肥豬兔走左出門口搞搞陣，矇豬係到磨鞋架，CC 就係到磨地主公公，好彩發現得早渣，唔係又倒翻晒ｄ野就麻煩啦∼
夜晚番到屋企，又同 CC 黎左個大清潔，一清就成粒鐘，頸到梗埋．．好好好污漕呀，屎、尿、毛、肉溶為一體，幾經辛苦先叫將ｄ屎屎毛剪走左，不過有ｄ實在太貼肉，用水都洗唔係幾到，不過都叫乾淨左好多，冇咁臭咁啦∼
13/12/2002 (五) 我個水樽呀！　跳上餐檯搵食！
平時沙律好意跳上餐檯張櫈上面，因佢知邊餐檯上面有野食，側邊ｄ膠箱又放左佢ｄ零食咁，不過就只會企係櫈上面等我地拎比佢，點知佢今日威到跳左上餐檯上面，嘩好彩發現得快渣，唔係成張檯ｄ野食一定清晒都有份呀∼
今日幫Mousse清潔耳仔時，發覺損左一大忽呀∼∼∼　一定係阿媽同佢玩，咬佢耳仔時整損啦，唔怪得佢成日咩都嗌定先啦，仲有呀，ｂｂ今日夾埋蝦姨媽呀，放左佢地之後無啦啦聽到出面好嘈，出去一望，原來ｂｂ將 CC 個水樽擔左出黎玩，係個地下都碌黎碌去，搞到成地都係水，CC 就好無奈咁企係個籠到望企佢個水樽周圍碌，真係慘呢．．．
15/12/2002 (日) 話我？我好小氣架∼
今日媽咪係到講，個陣沙律生Mousse搞左成四粒鍾先生得佢出，又到而家都仲未識得入籠屎尿，唔知會唔會係弱智，之後就研究究竟狗狗會唔會有弱智呢回事，不過又唔會丫，佢都識 Sit 識 Stay，我地番黎又識擺尾，最多係蠢ｄ者，不過唔知佢係咪嬲呢，媽咪一話完佢，佢竟然即刻入籠尿尿喎，真係神奇呀，唔通佢真係聽得明？？
16/12/2002 (一) >>>>我ｄ餅餅呀．．．
夜晚無啦啦見到ｂｂ走左入我房，之後起勁咁咀𡁻𡁻，無理由丫，我都冇比過野佢地食，應該係平時比沙律ｄ餅餅，佢諗住收埋黎慢慢食，點知就比ｂｂ搵到，呵呵∼真係慘哦，本來諗住收理得閒先嘆，一個唔該就比ｂｂ食個一乾二淨，鬼咩，平時係到挖兩挖放低就以為收理左，其實就一眼望得見，傻下傻下，呵∼
18/12/2002 (三) >>>> 嘻∼睇下我地跳得幾高
ｂｂ跳得越黎越高啦，平時佢地既糧會放係廚房碗盤簡隔黎既位置，糧兜下面有條小毛巾墊位住，話晒到成一米多高架麻，佢地兩隻為食豬，為左食兜糧，竟然可以跳到扯到條毛巾再打翻兜糧落地下地，ｄ糧又有水浸住，嘩∼天呀，成地水成地糧，再加佢地係咁踩上去係咁食，成咀成身都係．．．噢．．賣葛！
19/12/2002 (四) 有樣學樣喎∼
ｂｂ模仿能力真係高呀，竟然有樣學樣，好似佢地兩位姨媽咁玩扯報紙，用兩隻手係咁抓，將報紙抓到出黎之後，就係咁咬，搞到成廳成地下都係，仲要ｄ報紙己經沾滿尿濕漉漉，真難搞呀∼（好彩我唔係屋企者，以上事件由佢地太婆提供及收拾殘局）

因為矇豬同CC既阿媽我要告別校園及悠長假期，要搵錢養佢地既原故，所以都少左時間同佢地玩，輪到放佢地時我都要去訓，訓醒又要準備去賺錢，所以都唔知佢地發生咩事，所以地排都少左佢地既日記，真係唔好意思呢∼
20/12/2002 (五) 臭屎C
今日又聞到 CC 有ｄ臭，摸下佢屁屁，唔係下麻．．．又有舊硬左既葡萄屎痴似個屁屁啦，天呀∼　ｄ毛己經剪到冇得再剪啦，究竟我應該點整走ｄ屎呢？又唔可以剪左痴住屎屎ｄ毛喎，因為太貼肉喇，認真難搞呀∼
21/12/2002 (六) 細細舊容易食
今日出左寵物城，買左ｄ自助零食比沙律同ｂｂ，當係佢地既聖誔禮物啦，番到黎，將ｄ零食每款拎一舊出黎放係檯到比沙律自己選黎食，原來佢係一隻不貪心的小狗呢，因為佢選左最細個一舊黎食呢∼
22/12/2002 (日) 我彈我跳呀∼
今日阿媽報告，當佢踎係度餵 Mousse 係籠到食野時，阿仔係後面抓住個背脊然後一跳，就由阿媽後面跨過佢跳左入籠，搶 Mousse ｄ糧食囉，真係利害呀，咁都比佢到入去，仲要中間隔左個阿媽喎．．．
24/12/2002 (二) 我個水樽呀．．．
矇豬：自己幾位姨生黎左之後，真係冇日安寧呀，成日嘈嘈閉不特止，仲要偷我地ｄ草黎食，冇大冇細，今日仲過份到．．．係出面咬我個水樽，咬到裂開左仲漏水添，搞到我間屋差ｄ水浸呀，好彩發現得早，唔係我就慘啦．．．不過都好，乘機可以換個新水樽呢∼
25/12/2002 (三) ｂｂ蝦我．．．
今日起身，沙律出奇地好癡身，跟出跟入，我入左厠所佢就坐係門口等，我入房佢又跟住入，問下媽媽咩事，佢話ｂｂ杯葛佢唔同佢玩呀，下？？唔係下麻．．．咁慘．．．不過再留意多一陣，又好似係喎，ｂｂ有ｂｂ玩，沙律有沙律自己一個呆居居，仲成日哩入房唔肯出廳，抱左佢出去就自己走入籠到唔肯出黎，尋日買左個有噹噹既膠波波比佢地玩，ｂｂ玩得好開心之際，沙律竟然驚到係咁震呀∼　都唔知佢搞乜鬼，個波波又驚，ｂｂ又驚，乜鬼都驚．．．
26/12/2002 (四) 唔著衫呀∼∼
好凍呀今日，所以都即刻同ｂｂ著番件衫仔，著完同佢地玩左一陣之後，就上左樓上打邊爐，番落黎既時候，竟然見到朱古力件衫仔冇左呀，佢居然自己除左件衫仔喎，都唔知佢點除既，件衫仔心口既魔術貼仲係貼實左添既，究竟．．．點除架呢？
仲有呀，沙律仍然係好驚ｂｂ呢，不停咁要我地抱，癡到我地實一實，究竟ｂｂ對佢做過ｄ乜，搞到佢咁驚呢？
28/12/2002 (六) 噹噹波．．．驚驚呀．．．
終於知道點解沙律咁驚ｂｂ啦，因為ｂｂ鍾意玩個一個新既噹噹波呀，但沙律又好鬼驚喎，我係拎起個波，佢就己經即係由訓係到變企起身望住，再當我搖個波發出ｄ噹噹聲時，佢就即刻跑去媽媽隻腳後面哩埋，然後開始有少少震，哈∼真係冇鬼用呀，咁都好驚既，以後噹噹波就要退休收埋一邊囉．．．
29/12/2002 (日) 好味道呀！
見新既一年就黎到，所以就去嬌pet買ｄ野比屋企幾隻室頭窿食，係咁易買左ｄ狗零食，而兔兔呢，本來諗住買一盒有三條個隻蘿蔔咬咬棒，但仲未見有得賣（係咪唔再出呢？），所以就買左隻好似冇咁冇益既蘿蔔條，雖然初初比佢地食時都好小心聞左一陣，不過之後就一大啖咁食落肚ｌｕ，不過零食呢ｄ都係少食多滋味，多食壞肚皮呢！
30/12/2002 (一) 　鬧不和？
今日唔知矇C兩姊妹做乜呢，平時兩個就糖痴豆就咁痴住，一齊訓係餐檯底一齊走去搞破壞，不過今日唔知做咩呢，CC就哩埋左係小木屋到，矇豬就扒係餐檯椅下面，當我比野佢地食時就會走出黎，但食完又各自番番去之前個位繼續發呆，唔通佢地鬧不和？
仲有，朱古力今日比隔隔黎屋隻狗嚇親呀，話說夜晚拖佢出去散步時，去到門口佢聽到隔隔黎屋隻狗狗吠，即刻嚇到扒左係地下死撐住唔肯行出去，真係冇鬼用呢（佢都有今日，呵∼），不過出左去之後佢又好次咩都唔記得ｌｕ．．．
31/12/2002 (二)
雖然噹噹波己經收起左，沙律先兩日都同ｂｂ玩到好癲，WeliWulu，不過今日開始佢又唔知做乜鬼，唔同ｂｂ玩喇，唔知係咪因為佢MM，朱古力成日追住佢黎聞佢唔鍾意呢，搞到佢成日要入房要我抱，好鬼痴身呀！