矇C日記

1/4/2003 (六)　

我係聰明矇！

因為要番工關係，夜晚放左兔兔出黎後，朝早就等媽咪起身先會困番佢地，等佢地多ｄ時間四圍走動，四圍八掛一下玩下，而每次困籠，都會放幾片蘿蔔乾同小小日本糧比佢地食，等佢地比人困籠時冇咁唔開心，有野食下，久而久之，矇豬己經記得入籠就會有好野食，媽咪話而家朝朝早起身，矇豬都會跑去自己籠前面企係度，等媽咪開門困番佢地入去，真係叻叻呢～

2/4/2003 (三)　

大～～大～～大～～件事啦！！！　
食飯時接到媽咪電話，第一句就話 "死啦，阿仔搞左阿Mou呀！！"　
唔係下麻，咁大件事？媽咪話行開一陣，就見到阿仔同阿Mou兩隻野走左入籠，想分開佢地時己經太遲，因為己經．．搞左啦～～　想隔硬扯開阿仔，點知阿仔好惡咁Woo，所以唯有扯開阿Mou啦，慘啦，亂倫左呀～～～　不過好彩打去比醫生，可以打針防止懷孕，雖然今日第九日唔係時候，不過都係打針穩陣ｄ，唔洗驚餐慒，正一衰仔黎，由細對到大，家姐都搞 @#$%$^%&@

3/4/2003 (四)　

咬呀咬～痾呀痾

今朝一起身，嘩～搞乜鬼？沙律個籠索滿狗尿既報紙，比兩兔扯晒出黎，撕開好多好多小塊，又濕又霉痴住地下，仲要係周圍散左過百粒屎加數督尿，真係作死，仲要好意思走埋黎頂下你隻腳拎野食，真係少丙呀！

5/4/2003 (六)　

小氣CC～

今日兩兔大打出手呀，一日都係矇豬啦，每次放出黎都要走去CC個籠痾尿痾屎，好衰唔衰今日走入去痾時痾中CC雙腳，搞到CC雙腳濕晒發皮四，追住矇豬咬，但又唔知自己唔夠打，結果兩隻兔就係個籠到係咁轉係咁轉，轉到ｄ毛都甩左幾執出黎周圍飛，真係比佢地激死，咁就好打一餐既．．．

6/4/2003 (日)　

玩糧兜

一早起身，就聽到 "KingLingKwanLan"聲，原來矇豬又係到玩糧兜啦，將佢搬黎搬去，ｄ糧就倒晒出黎一粒都冇剩，之後仲要走番去兜住個糧兜個框框下面挖，挖完就向上頂，個頭就岩岩伸左上糧兜個框框到，超搞笑呢～

7/4/2003 (一)　

魚骨．．．．

今日沙律曳曳呀，襯我唔留意時偷魚骨食，係好尖好尖既魚骨呀，真係想死定～結果比我係咁塞ｄ菜佢食（因為冇飯呀），好彩冇事渣．．．嚇死．．．

8/4/2003 (二)　

因為先兩日CC反比矇豬追住黎咬，所以呢兩日都變得好慬慎，矇豬一企係佢籠門口，都未入去，佢就大大力踏地，不過又真係有ｄ效喎，矇豬聽到之後又真係走番入自己個籠到，雖然入一入去又出番黎，但都叫有ｄ阻嚇作用啦，之後CC再踏地，矇豬都冇再理，照跳入籠屎尿，搞到CC雞咁腳走都走唔切，真冇用哦！

9/4/2003 (三)　姐弟情深　

今日晚飯時候，Mousse又襯沙律行開左時偷佢ｄ糧黎食，阿媽見到當然叫 "No" 然後想走埋去拉住佢啦，點知朱古力見到即刻走埋去撲住阿媽唔比佢行埋家姐到，等家姐偷食完行開先唔撲，真係好細佬呀～

12/4/2003 (六)　肥豬仔呀！

今日去接蛋糕黎剪毛，冇見一排，第一個感覺就係－嘩！乜咁肥既？？　圓碌碌成個波咁，帶到番屋企，Mousse好惡呀，係咁Woo佢，撩交打，平時佢地雖然成日打交，但都冇咁惡死，都唔知做乜鬼，要困住佢係籠冷靜下望下，之後先相處到，而沙律呢，好似認得咁，冇Woo冇撲，只係聞聞屁股仔，玩左一陣之後，發覺原來Mousse學習能力都幾高架，先排比阿朱UnUn完，竟然有樣學樣攬住蛋糕UnUn，噢我啋～女仔人家搞埋ｄ咁既野，最衰都係阿朱啦，教壞阿Mou呀，咸濕仔～哼～

13/4/2003 (日)　征服厠所！

矇豬個籠一直到放左個黃色厠所既角落到，雖然佢會企上去上面尿尿，但就好似唔多鍾意咁，成日係到咬，所以我就用ｄ鐵線仔將佢同個籠綁實，但通常過左幾日，條鐵線就會斷，所以冇幾耐之前，媽咪就用較粗既鐵線將厠所綁好，自此之後都平靜左一排，但到今日，終於失守啦！！！粗粗鐵線連個厠所本身有既小膠勾都比矇豬整爛左，正衰兔黎，不過佢就好似好開心，整甩左之後係咁咬係咁搬黎搬去，砰寧嘭蘭，嘈到不得了呀～

14/4/2003 (一)　腸胃炎？假大肚？

因為蛋糕呢排唔多食野，又有ｄ嘔，所以尋日去左睇醫生，醫生話係腸胃炎，不過呢，據佢阿公既觀察所得，佢可能 "假．大．肚" 呀～～　因為ｄ奶支漲大左，個肚又好似大左ｄ，十足十沙律個陣有左咁樣，但起水期間完全冇接觸過狗公，做乜以為自己有左呢？究竟係咪真係假大肚呢？

15/4/2003 (二)　張櫈係我架！

每晚我開飯時，沙律都會好快反應地跳上餐櫈左好睇下有冇得分，久而久之，佢己經當左張櫈係屬於佢既，今日媽咪坐係到睇報紙，佢就狂係到抓阿媽，以為佢想食野，丫～又唔係喎，以為佢想抱啦，丫～都唔係喎，原來佢係話阿媽坐左佢張櫈呀，阿媽一起身，佢就第一時間跳左上去坐，順便黎一個午睡添，真巴閉呢～

16/4/2003 (三)　唔剪呀～

困厠所

又好一排冇同矇豬剪個指甲，嘩～好長呀，不過矇豬真係越黎越醒目啦，淨係拎住個指甲鉗都未行到去佢身邊，佢就走定先，乜真係認得嗰個係指甲鉗咩？比左少少零食佢，同佢鬥快，係佢食既大限時間內，都叫剪到少少啦，同佢地剪指甲真係越黎越傷腦筋呀～

今晚，阿仔自己困左自己係厠所呀，都怪佢太八掛仔啦，成日周圍八，做咩都關佢事，三隻莎裡面佢係最八掛既一個，自己走入厠所自己閂左門，好彩聽到佢抓門渣，唔係都唔知要困幾耐呢～

17/4/2003 (四)　

冇氣喇．．．

今日去左探蛋糕，第一次有我份帶佢落街玩，唔．．．佢都幾乖啦，行得幾好，去到一個公園仔既小斜路，我同佢阿公一人企一邊，輪流叫佢個名，佢就好忙咁兩邊跑，由本身跑得超快，到開始跑得慢，呵～　一條小斜路搞到佢喘晒氣呢，不過岩架喇，當修下身減肥啦（雖然佢阿公堅稱佢唔係肥係健碩，不過我都係覺得佢肥嘟嘟 ^^）

18/4/2003 (五)　

新厠所好好咬～

係阿公到拎左個蛋糕唔用既狗厠所番黎，拍住放係沙律個籠前面，等朱古力可以企係上面痾，唔洗捐入去沙律個籠到咁辛苦，點知就成為左 CC 既新玩具，係咁咬個底盤同扯ｄ報紙出黎，趕左佢扯整理番好個盤同報紙，轉個頭唔夠十分鐘又見到佢走去咬走去扯，大大舊咬咬木放係到佢到唔咬，乜咁樣真係好好玩咩？

19/4/2003 (六)　

Greg Greg

今日屋企出面黎左個大清潔，結果搞到ｄ小 "甲才另" 係咁greg greg 叫，搞到Mousse 都唔肯訓同佢地一齊叫，唔同既就係佢唔係 greg greg叫，而係奀奀叫，出去抱一抱佢按撫下佢，點知仲衰，奀得仲厲害，軟既唔受就黎個硬，鬧佢兩句果然收晒聲，哼～係要人地惡ｄ對佢既～

20/4/2003 (日)　

入石澳玩呀！

今日約左栗子入石澳玩，之前見個天咁好太陽，就拖晒三隻野出去行個圈，點知個衰朱古力行左幾分鐘己經嫌曬同熱唔肯行，走去ｄ櫈底到抖涼，激死，因為今日淨係諗住帶沙律去玩，所以等佢屎尿完就番左屋企，準備出發去也！

幾經轉折，上車落車嚇餐飽後（佢嚇餐飽，驚死我賣甩佢），終於到達目的地＜石澳＞，雖然大大個牌寫住 "No Dogs Allowed"，不過都冇人理，一個救生員都唔見，落到沙灘，就放左繩比沙律周圍跑，見到佢個樣好似好開心咁呢，周不時去撩下打排球既姐姐，路過既哥哥咁，仲有同佢一樣放假黎玩既狗狗，都有好幾隻史納莎呢，後尾帶佢去游水，不過佢就水皮喇，企左係濕既沙上面，望住一個又一個既浪湧上岸，都未濕到佢雙腳仔，己經嚇到鼻哥窿都冇肉係咁向後退，死都唔肯落去游，見個天又開始黑，所以都由佢ｌｕ，下次一定要掉佢落水游先得～

玩到咁上下，咪摩既栗子終於到囉，除左CreamCream因為我冇見過之外，佢係ｂｂ中最奀之之哦，尤其是同蛋糕比，簡直係細左一個碼呢～不過就好烏卒卒囉，唔知佢仲認唔認得沙律係佢媽媽呢？佢都表現得好興奮呀，兩隻野撲黎撲去玩～

夜晚食完飯後，就帶左沙律去探佢另一個囡囡 "蛋糕"，蛋糕見到媽媽黎探佢莫明奇妙地超興奮，係咁彈係咁跳係咁撲，可能係佢咁大個女第一次有狗狗上黎探佢既關係啦，佢仲帶沙律四圍參觀添，入廚房、阿公房、厠所，而沙律又真係跟住佢尾行喎，超搞笑呢，不過因為夜，所以玩左陣就走ｌｕ，撘車時，沙律都好攰啦，攰到夜晚都冇跳上床訓慳番ｄ力，係番佢自己張床仔訓到超 "Lum"呢～

21/4/2003 (一)　

發左癲？　

新咬咬木

阿仔學左媽媽發癲呀，係屋頭跑去屋尾，屋尾跑番去屋頭，係咁衝係咁撞，撞到嘭嘭聲好似唔痛咁，Mousse 就係咁追住佢係到陪佢發癲，沙律就好少理喇，企係到望慳番ｄ力，真聰明呢～

先兩日買左舊小蘋果咬咬木，諗住用水沖一沖先比佢地咬，點知一沖先發覺原來好污漕架，沖出黎ｄ水係黑色既，沖沖刷刷之後拎上天台曬，今日終於拎番落黎放左係矇豬個籠入面，唔知佢鍾唔鍾意呢？

22/4/2003 (二)　上天台玩好開心唷～

因為非典型既關係，而家都少左帶沙同ｂｂ出街街，最多都係襯星期六、日有陽光好似會殺菌既時候帶佢地出去行下，有見及此，媽咪就用左幾個鐘，將屋企個天台洗乾淨喇，然後就帶三隻野上去玩，一開門，沙律就一支箭跑左上去，而Mou屎同阿朱呢，就因為唔識行樓梯，所以企左係樓下好耐，係咁推佢地，抱佢地上幾級再推都唔肯行，死坐係度，結果就要分兩轉行三層樓梯抱佢地上去，都未同佢地玩，己經開始出汗．．．上到去，就係不停咁執屎、抹尿、再執屎，仲見到隔隔離屋比人養左係天台既一隻汪汪添，我諗佢一定好想過黎同我地一齊玩定呢～　不過唔知點解，三隻野上到去都唔玩玩具既，望住個波波拋出去，跑兩步就唔追，不過佢地自己跑黎跑去，周圍聞下，你追下我，我撲下你都玩得好開心呢　^ ^

24/4/2003 (四)　

我又要餵呀～

唔知係咪天氣熱，呢幾日ｂｂ都冇乜胃口，唔多肯食狗糧，要放係隻手餵先肯食，尤其是Mousse，企到好硬唔餵唔食，但一用手餵就係咁食係咁食，本來阿仔都肯自己食架，不過見到呢個情況，佢就望下家姐，再望下自己兜糧，又再望下我，就唔肯食喇，要好似家姐咁有人餵，你話幾衰格丫！

25/4/2003 (五)　

唔好睇少我地ｄ兔兔呀！

雖然兔仔係食物鎖鏈中排得好低，但係原來佢地都唔係咁蠢架渣，好似矇豬咁，就越黎越聰明喇，呵～　每朝早佢都己經好叻，知到要困籠，同時又知道籠裡面己經放好左幾塊蘿蔔乾同日本糧，所以一見到阿媽就會跑去自己籠門前等，而家呢，就仲巴閉，今朝早想困佢既時候，發覺佢個籠個門扣開左，而裡面既蘿蔔乾同日本糧就冇晒，矇豬意然自己開左個門扣，然後走入去偷黎食呀，話晒個扣到要拉高、轉４５度、再拉番低先開到架麻，究竟佢點開架呢？仲要食完之後都好好手尾頂番埋佢，差在冇扣番好渣，真係利害呀！！！！

26/4/2003 (六)　

學識啦～終於學識啦～

今日蛋糕又左黎玩，所以就放晒四隻野上天台玩喇，蛋糕好叻叻呢，自己識行樓梯，不過阿mou 同阿朱今日都終於學識左上落樓梯喇，雖然每次行都仲係有ｄ驚驚地，要推一推先肯行，不過都好好啦，仲有呀，阿Mou又係咁聞阿糕想UnUn佢啦，阿仔都未有行動佢就帶頭，好既唔學衰既學，不過阿糕都唔輸蝕架，都有反擊，想Un番Mousse，真係冇佢地咁好氣呀～啋～

28/4/2003 (一)　

新梳化呀！　

今日屋企黎左張新梳化，舊個張可以光榮退休囉，佢都身經百戰喇，四隻腳咬到見到裡面ｄ木，坐既兩邊比矇豬咬開左個大洞，大到可以成隻捐左入去剩番條尾，不過我唔會再比呢個情況再發生架啦，兩兔見到新梳化，好似都冇咩反應，反而對包住梳化既紙皮就好有興趣，係咁咬係咁咬，咬到累就去餐檯底抖一陣，抖夠食幾塊菜就再咬過，而三隻沙呢，就成日想跳上梳化，八八掛掛咁，不過每次都比我趕番落地，呵！

29/4/2003 (二)　

學識－咬

以前Mousse一有野食入口就會即刻吞，完全唔咬爛咬碎佢既，驚死冇蝕抵咁有咁快食咁快，不過呢幾日發覺佢終於學識會 "o趙" 喇，比細細粒既小鏝頭佢食都會咬幾啖先吞，真乖呢，感覺冇咁浪費哦，以前一入口吞總覺得好似放左ｄ野入佢個胃，而唔係餵野佢食呢～

30/4/2003 (三)　

今日餵菜菜比矇豬既時候，隻肥兔懶到扒係到唔肯郁，用兩隻短手仔係咁易向前扒兩扒，伸長條頸就扯塊菜埋去食，食完一塊又再伸長條頸扯塊菜落黎食，完全冇企過起身，唔怪之得．．．咁～肥～啦～