                  |
| 2/7/2003 (三) 整捐頸．．． |
|||
|
今日發覺沙律條頸損左呀！好心痛呀！嗚！個傷口都冇手指尾塊指甲咁大，望落去唔知係抓損，亦唔似係同ｂｂ玩時整親，最大可能係撞到保護梳化腳既硬膠角落，因我曾經都試過撞左埋去，到而家都仲有個疤痕係到．．．唉．．．點算呢？有咩方法可以封左個角落佢呢？ |
|||
3/7/2003 (四)  牙碰牙！ |
|||
| 日日放工番到屋企，都會受到熱情款待，不過今日就有個小意外，當我踎低叫"阿仔"時，佢突然跳上黎"傑匙"我，我地既牙．．．相撞呀！！搞到我流左小小牙血．．不過阿仔就好似咩事都冇，照係咁撲埋黎鍚鍚，熱情到死∼ | |||
| 4/7/2003 (五) 追呀追∼ |
|||
| 今日矇豬唔知發咩癲，係咁係個廳到追住CC，但又唔係要Un佢喎，只係追，見到CC 係咁跑就好似好滿足咁，不過佢追既同時，引到ｂｂ又追埋一份，結果一兔兩狗追住CC，嚇到佢傻下傻下咁，最後哩左入茶几底，我又喝住矇豬佢先肯罷休，仲要扮晒舔腳趾咩事到冇咁，以為我睇唔到喎．．．都唔知話佢醒丫？定蠢好∼ | |||
6/7/2003 (日)    |
|||
| 今日同ｂｂ執屎時，發覺屎屎係綠色既．．．再指細睇睇，原來係尋日比ｂｂ咬既潔齒骨，佢地係咁易咬下就吞落肚，然後冇乜點消化就痾番出黎，話晒都１２蚊一支丫．．．真係嘥鬼晒呀！ 今日蛋糕入左黎玩，一黎到Mousse勁惡咁又Wu又噬埋去，搞到要困住佢等佢冷靜一下，先可以放番出黎，唔知係咪因為一開始Mousse Wu佢，所以今次蛋糕冇痴住阿Mou玩，反而係咁撩阿仔同佢玩，成晚兩隻野都形影不離，你撲我我撲你，沙律就冇佢地咁好氣，玩左一陣就入房訓，啋你到傻哦！ |
|||
| 7/7/2003 (一) 有賊呀！ |
|||
| 今朝起身，又發現屋企有賊仔啦，一早放定既蘿蔔乾同日本量，全部唔見晒．．．但明明夜晚放兔時個籠係扣好既，究竟憑一隻兔仔，點樣可以開到個扣呢？食完又識得頂番好對門，扮晒咩事都冇咁．．．有機會既話，一定要安部Cam拍抵佢哦∼ | |||
8/7/2003 (二)  搞肚子添∼ |
|||
| 呢幾日都冇帶狗狗出街，今日一拖就三隻，雖然有媽咪幫手，但都幾LeiHei，可能耐冇出去啦，所以三隻野都好興奮，搞到ｄ狗鍊打晒結，最幣就係Mousse肚痾呀，ｄ屎屎一Pab野咁超難執．．．基本上冇得執，係要抹，真麻煩，抹既同時三隻野仲要不停咁郁，向唔同方向行．．．下次都係分兩次帶好ｄ =P | |||
9/7/2003 (三)  我要抱抱呀！ |
|||
| 阿仔越大越爹，唔好睇佢牛高馬大好似好Man咁，其實成日要人抱，又唔知自己重喎，成廿磅仔．．今日仲要同家姐爭添，抱Mousse時阿仔就係側邊係咁跳係咁抓，唔理佢時仲吠到大大聲鬧你添，好啦，放低Mousse抱阿仔，又到Mousse爭寵，超高音咁又跳又吠，真係順得Mou時失朱意呀，好彩沙律知自己地位最高（得佢可以上床同我一齊訓渣），所以都費事爭慳番啖氣者，唔係就真係唔知抱得邊隻囉．．． | |||
| 10/7/2003 (四) 我好慬慎架！ |
|||
| 洗完個靚白白一行出廳，就受到兩兔熱情款待，死跟爛跟，好啦，停低餵幾粒日本糧過佢地食，丫，矇豬又唔食喎，可能因為洗完白白隻手有ｄ香味啦，所以佢就鼻嗡嗡聞下聞下，非常慬慎，不過聞既途中己經比CC搶左黎食，所以到第４轉餵既時候，佢都唔再聞ｌｕ，一口就咬左幾粒走呢∼ | |||
| 11/7/2003 (五) 我地係一家人哦∼ |
|||
| 沙律、朱古力同Mousse感情真係好呢，雖然平時成日Weliwulu打晒咬咁，又會爭野玩爭野食，不過有起事上黎就唔同喇，Mousse今日賴尿比我捉個正著，一捉住佢想鬧時，阿朱就撲埋黎推開我隻手，等Mousse可以逃走，好喇，咁我就轉呔捉住阿仔扮鬧佢，話佢好威救家姐咁話拉，丫∼沙律又捐個頭埋黎係我同阿仔中間，之後舔我，等阿仔可以走，果然係一家人呀下！ | |||
| 12/7/2003 (六) 最愛望∼ |
|||
|
|||
| 13/7/2003 (日) 最愛．．．跑？ |
|||
| 阿仔除左遺傳到沙律比較細膽慢熱既性格之外，仲有就係成日無啦啦屋頭屋尾來回跑發癲喇，以前得沙律一個時，佢己經鍾意由厠所跑去梳化，梳化又跑番去厠所，撞黎撞去氣來氣喘咁，唔知為左乜，可能悶得淨，可能練跑．．．到有左ｂｂ，佢就會咬住個公仔兩邊跑，等ｂｂ追住佢，到阿仔而家大個喇，又癲埋一份，不過路線呢，就有小小唔同，由梳化跑入我間房，蹺過書檯櫈，再衝出房跑番去梳化，不停咁跑，沙律同o妹o妹都冇追入房，但唔知點解阿朱都一定要跑入房兜個圈既，仲有，就算兩隻野冇追住佢，佢都會照跑，跑６、７次就停一停，喘下氣不停流口水咁抖一抖，之後又再跑過，雖然開左冷氣，但咁跑發．．．唔熱唔辛苦架咩？ | |||
14/7/2003 (一) 死．．．牙石．． |
|||
| 朱古力．．．以未夠一歲既年齡．．．大牙有牙石呀！！！佢己經食乾糧而唔食濕糧架啦，照計應該會好ｄ．．．又成日有ｄ潔齒骨骨咬下喎，點解會咁架．．唉，都怪我懶啦，少同佢地刷牙，不過同佢地刷牙真係好麻煩嘛，佢地係咁舔ｄ牙膏，一放支牙刷入口就係咁咬係咁舔，總覺得好似刷左等如冇刷咁，因ｄ牙膏入口即食晒．．．嗚∼∼∼ | |||
| 15/7/2003 (二) 我唔梳頭呀！！ |
|||
|
|||
| 16/7/2003 (三) 兩面受敵，處變不驚 |
|||
|
|||
| 17/7/2003 (四) 仲有一個月一歲啦！ |
|||
| Mousse下個月既今日，就滿一歲啦，但．．．佢仲未識係厠所尿尿呀，點算好呢？有冇人可以教下我呀？？？唉．．．．但佢又好醒地賴完屎尿後會哩埋，咁即係知會比人鬧啦∼同又好醒地只會襯冇人係廳時先會痾既，又或者如果長時間個廳有人，佢就會靜靜雞走去厠所門前痾（廳望唔到），然後乖乖搵個方便捐到入茶几底既位置扒係到，即係知道如果比我地見到咁就會鬧佢啦，既然知道，咁點解唔肯係厠所痾呢？成日同佢玩坐係廳捕佢賴又捕唔到，一行開佢就痾．．．唉．．．好煩呀∼∼∼ | |||
| 19/7/2003 (六) 救命．． |
|||
| 今晚因為有好多野要準備唔多得閒，所以就叫左媽咪幫忙執兔仔籠，執完時媽咪又幫我手教Mousse同兔兔相處，捉住佢叫佢Down然後定定地望住兔兔，不過佢都係控制唔到興奮心情，雖然扒係到，但個屁屁仍然係扭緊，之後佢阿公好醒咁要參予埋一份，要教導佢同矇C相處，結果搞到CC鬼咁狼狽，嚇到鼻哥窿都冇肉咁跳番入籠，就算Mousse困左籠佢都未敢走出黎住，唉．．真係多得沙ｂ公唔少呢∼ | |||
| 20/7/2003 (日) 泰國五天陽光之旅)))))) | |||
| 聽日一連起五日出發到泰國旅行，三隻莎加兩隻兔就要交託媽咪代為照顧喇，希望佢地五隻野生生性性啦，尤其是兩隻兔呀，千祈唔好因為掛住我而唔食野、搞腸沙等，唔好要我擔心呀∼ 黎賣個小關子，奀皮兔大本營聯同沙律小部屋預計將會於八月中有兔兔及狗狗圖案Tee推出售賣呢，詳情同陽光玩完遊戲後番黎再公佈啦，密切留意哦！！ |
|||
| 21-25/7/2003 (一 ~ 五) | |||
| 此行收獲最豐富，就係一堆狗仔衫呢，估唔到得到最多手信既會係沙律同ｂｂ佢地呢，數數手指，都買左１１件呢，有扮青蛙（Mousse），扮牛牛（沙律），扮企鵝（阿仔），扮豬豬（蛋糕）既衫仔，同一ｄ正正常常既，ｂｂ老豆，大家姐同三家姐都有份呢，就當係下個月生日既禮物啦∼ 呢五日，佢地都算乖啦，５隻都冇比媽咪投訴，仲有乖乖地比媽咪同佢地剪腳底毛，例牌當我唔係屋企時既小搞作（沙律第一次洗白白，都係我入左Camp時媽咪偷偷地同佢洗架呢，因我堅持等佢大ｄ先洗，怕冷親），我番到去佢地都好熱情咁歡迎我，係咁舔係咁舔，兔兔就係咁頂係咁頂，要拎野食呢∼ |
|||
| 26/7/2003 (六) 我ｄ指甲好好味 |
|||
| 冇見ｂｂ五日，突然發覺Mousseｄ指甲長到好似白雪公住入面個巫婆咁，所以拿拿臨抱起佢剪剪剪，我一剪，彈一粒指甲落地，佢阿媽同細佬就白白痴痴咁以為有金執，即刻走去追粒指甲，仲要執埋黎食，𡁻兩𡁻吐番出黎，又再去追過第二粒，真係比呢兩隻為食狗激死加笑死呀！ | |||
29/7/2003 (二)  從前的小霸王 |
|||
|
死啦死啦，細細個係小霸王既阿仔，點解會越大越細膽架，咩都驚，今日佢走埋黎時，岩岩身邊有個小風扇仔（拎出街個ｄ），當我拎住個風扇仔對住阿仔，再開著佢時，阿仔驚到即刻跑入籠呀，過一陣佢走番埋黎，我淨係拎住個風扇仔都唔洗開著，放近佢時，佢就第一時間＜逃走＞，真係冇鬼用呀∼∼∼ |
|||
| 30/7/2003 (三) 男人老狗唔可以呷醋架咩．．． |
|||
| 朱古力名符其實係一個醋酲黎，男人老狗呷家姐同阿媽醋，平時番屋企唔摸佢，又或者唔叫佢個名，佢就會係到吠、鬧我，然後撲埋黎推開家姐阿媽，要人地摸摸佢，都可以理解啦，我番黎佢開心麻，不過今日學生黎學琴，雖然個個禮拜都會見到，但都叫係客黎丫，佢都要爭喎，人地摸沙律，Mousse，佢都走埋去推開人地隻手，然後霸個企到正正既靚位要人地摸佢，懶係熟咁，真係頂佢唔順呢∼ | |||
| 31/7/2003 (四) 同心合力∼咬 |
|||
|
    |