1/9/2003 (一)　"啪啪啪啪"
今朝一大清早６點都未夠就比 d "啪啪" 聲嘈醒左，本來都唔想起身出廳睇下乜事，但實在太太嘈，結果都忍唔住走出去望下，就見到 CC 博晒命咁咬掛左係大門角落頭既膠厠所，係咁咬住擔起然後放，發出 "啪" 一下巨響，好似玩得好過癮咁，將厠所掛好掛實，就冇理佢再去爭取時間訓多陣，到我再起身時，厠所蓋己經比佢咬甩左，裡面既木糠飛晒出黎，真麻煩，不過我諗唔係咁，佢都唔會罷休呢∼
2/9/2003 (二)　打風哦！！
今日打風有半日假，可以番屋企同ｂｂ玩，平時多數得星期六、日叫做有ｄ時間陪佢地玩，要番工既日子放工番到屋企都８點，食個飯Hei一陣就要放兔執屎，再洗個白白就要去訓，時間真係唔見洗呢∼所以陪到ｂｂ佢地玩既時間真係唔多哦，唔知幾時先可以唔洗做又有錢錢洗呢？呵∼　不過今日，差ｄ發生意外呀，當Mousse係廚房望望下八八掛掛時，大風一吹，廚房門以一秒極速 "嘭"埋，不過好好好彩，嬌小敏捷既Mousse以半秒極速將八掛緊既狗頭再後閃，唔係．．後果真係唔敢想像哦∼∼
3/9/2003 (三)　我．．有ｂｂ？
CC 假懷孕呀，養左佢咁耐都係第一次，不過好彩佢冇拔自己胸毛，只係不停咁咬住草草忙錄地築窩，見佢咁不安，唯有同佢舖多ｄ木糠比多ｄ草草佢，用布舖一舖佢個籠頂，等個環境安靜ｄ，同時佢都可以可心ｄ啦，∼
4/9/2003 (四)　幣∼咬錯左添．．．
以為自己大左肚既 CC ，今日竟然大膽到大住個肚去UnUn入左佢籠食野既家姐呀，雖然第一次唔成功，不過佢冇放棄到，第二次佢就攬住矇豬個頭係咁Un，結果矇豬發惡喇，一個轉身狂追CC，結果兩隻兔就係個籠到勁轉勁轉，我見到當然伸隻手埋去試圖分開佢地啦，點知．．．就受左矇豬一大啖喇，好∼痛∼呀∼不過好彩渣，唔係我，矇豬就分分鐘咬左落CC度架啦∼
5/9/2003 (五)　可樂罐
今日係雪櫃拎罐冰凍可樂出黎飲時，ｂｂ佢地一見我開雪櫃門就跑埋黎，以為有金執咁，好啦，我拎罐氣水埋佢，丫，佢地即刻走夾唔抖，原來佢地記得可樂罐呀，我曾幾何時佢地走埋黎八掛時我用過可樂罐冰佢地個鼻哥仔同耳仔，原來佢地仲記得喎，真係好記性呢∼
6/9/2003 (六)　地拖水疑雲
今日冇帶o妹o妹出街街或者上天台尿尿，結果佢又係屋企周圍痾喇，真係激死！結果就困左佢入厠所諗住罰佢一陣，點知．．．我完全唔記得有件咁既事呀，直到佢傻傻下抓門我先記得，放佢出黎，咦？佢個咀咀好似濕濕地喎．．．咦？厠所有桶地拖水喎．．．唔通．．．唔通佢走左去飲？唔係下化．．．
7/9/2003 (日)　我識企係到屎屎架
今日帶Mousse出去屎尿時，唔知佢做乜鬼，係到轉轉轉屎屎時，由轉住踎既姿勢無啦啦變成轉住企，即係好似人地請請咁，企係到邊轉邊屎屎，有冇人見過狗係企係到屎屎既呢？我係咪要帶佢去參加ｄ咩咩比賽咁呀？
8/9/2003 (一)　表演絕技，坐住行！
繼尋日有Mousse既企住痾，今日有阿仔既坐住行，話說ｂｂ公今日黎左探佢地，佢見到阿仔，就衰衰格咁"WOWU∼"咁嚇佢，嚇完佢又好聲好氣咁叫"朱朱"，搞到朱古力都唔知點好，又想行埋去玩，但又驚喎，結過就坐住黎行，首先係兩隻手向前踏一小步，前後屁屁向左擺，將左腳向前移少少，再向右擺同時將右腳向前移，就係咁，完成左一小步既動作，再重覆幾次，就可以向前移動喇，見到佢真係好搞笑呢∼
9/9/2003 (二)　唔帶我去∼嗚∼
今日番到屋企，放低手袋就帶Mousse出去尿尿喇，去完番黎準備換沙沙同阿朱時，兩個學生就黎到學琴，諗住快快趣帶佢地兩隻出去屎尿完就番黎教，丫點知其中一個學生話又想拖佢地出去喎，結果我地兩隻就拖左沙沙同阿朱出去屎尿同散左一陣步，番黎時另一個學生話Mousse喊呀∼∼ "WoooWoooouuu……"咁叫左好耐，好似好淒涼咁，乜佢唔記得佢自己係岩岩街街完番黎架咩？咁冇記性既…
10/9/2003 (三)　凍冰冰咩黎呢？
原來ｂｂ唔係驚可樂凍冰冰既感覺，因為今日飲緊時見到阿仔係我隔黎，我又手多多咁凍佢喇，哈∼點知佢一ｄ反應都冇喎，但當佢擰轉面望到係可樂黎時呢，又嚇到即刻彈開喎，真奇怪哦，咁究意佢驚ｄ咩呢？
11/9/2003 (四)　中秋快快快樂呀！
今日係中秋節，本來諗住去買西莎同狗狗們做節，食餐好既，不過後尾買左另一隻十幾蚊大大罐火雞味罐頭，好似好鬼抵咁呢，仲買左包肉條同芝士添喎，雖然屋企既零食己經多到夠佢地食成個月，不過天生購物狂既關係，所以都忍唔住買左ｄ呢∼

開始準備佢地既晚飯時，一開罐罐頭，三隻野己經第一時間撲埋黎，除左罐頭撈糧，仲有蘿蔔同芝士添，開飯時，食得最快既係阿仔，沙律就最慢啦，仲要邊食邊望，驚死ｂｂ走黎搶佢個ｄ咁，鬼咁唔專心，結果ｂｂ食晒時佢一半都未食完，真係慢ｎ咁多拍呢∼

夜晚，矇豬唔知係咪唔鍾意中秋節咁熱鬧呢，一出黎就跳入CC籠後面，用個屁屁對住籠門口勁扭屁屁，噴到媽咪一腳都係尿，呵∼
12/9/2003 (五)　嘩∼蘿蔔乾呀！
呢幾日天氣麻麻地唔算好猛太陽，所以ｄ蘿蔔乾晒得唔太乾，仲有ｄ淋淋地，夜晚成盤收落黎後，見兩隻寃係咁跟係咁跟住，所以就索性整盤放係地比佢地食，食到佢地鬼咁開心呢，矇豬食食下就企埋係盤上面，CC就咬起一塊哩埋入紙皮箱食，食完又伸個頭仔食出黎，咬一塊又縮番入去，好鬼竄呢∼
13/9/2003 (六)　我識聽人講野架∼
３隻莎莎裡面，我覺得最叻叻架呢，就係沙律喇，佢真係好似識聽我地講野咁，我係房食飯佢撲埋黎，我同佢講 "去媽媽到媽媽有餅餅呀"，就真係跑佢媽咪到，真醒目呢，今日阿朱入厠所玩水，比媽咪鬧，沙律見到媽咪鬧阿朱，就即刻走去咬阿朱耳仔，好似知道佢係阿媽要管教個仔咁，佢咬完之後我地又扮鬧佢，點知沙律又真係衝埋去咬佢耳仔，真醒目呀∼
14/9/2003 (日)　聰明？蠢？
呢一兩日睇新聞話貓咪識睇電視原來係蠢ｄ，因電視係不停發射ｄ點點，咁ｄ點點係人個腦會停留，所以我地就睇到連續既影像，但貓貓呢ｄ動物呢，就唔同既，佢地唔會咁樣翻譯ｄ訊息，所以只會睇到好多好多點點，如果識睇電視，即係話－佢地係蠢ｄ既∼　咦？我記得我個三隻莎好似會睇電視架喎……
夜晚，我抱住Mousse用電腦時，我發覺佢追住Mouse個箭追仔呀，我郁去邊，佢隻眼仔就望去邊，係咁跟住個箭咀仔眼睩睩咁，唔知望到電腦既影像，係聰明定蠢呢？
15/9/2003 (一)　唔好追住我呀！
今日一放CC出黎，佢就係咪都好似走難咁，一支箭想衝埋去茶几到（冇兔冇狗追佢），點知比阿仔見到，以為佢同佢玩，所以訓緊覺都即刻彈起身，走埋CC到，仲想用兩隻手攬住佢添，結果嚇到佢傻，原地跣腳勁跑幾步，丫∼又好彩佢夠細粒喎，可以係阿仔四隻手腳中逃脫，當安全入到籠後，隨即大大力踏幾下地，示一示威及表示佢既不滿，嘿∼佢唔跑，阿仔就唔會追架啦，細細個阿媽己經教，見到狗唔好跑丫麻，唔知佢幾時先明呢個道理呢？
17/9/2003 (三)　好阿哥＋好細佬
今日糕公帶埋豬糕黎探我呢個小病人，一黎到，扮大家姐既Mousse又例牌勁吠糕糕喇，次次蛋糕黎親Mousse都係咁，惡到死呀，完全控制唔到自己情緒，安頓好後，隔一陣又走去蝦蛋糕Wu佢，不過阿仔好正義呢，一見到呢ｄ情況，即刻衝埋去分開佢地，唔比家姐蝦細妹，超乖仔哦，佢除左係一個好細佬，仲係一個會保護阿妹既好哥哥呢，真抵鍚呀 ^3^
18/9/2003 (四)　唔剪呀∼
夜晚放左兔兔後，見矇扒係地下時個屁屁兩邊的兩執毛沾到尿漬，再痴住ｄ木糠，走埋去摸摸佢個背背，咦冇反應由得我喎，好摸摸佢屁屁搞下兩執毛毛先，咦？都冇反應喎，靜雞雞拎把較剪仔出黎，打算剪左執毛毛時，較剪都未放埋執毛毛到，己經比矇豬一個眼尾瞄過黎發覺左，第一次時間彈起身，兩隻後腳大力踢逃∼走∼了！係咪真係咁好眼呀？
19/9/2003 (五)　咬呀咬∼
今日一早媽咪就出左街，一整天屋企都冇人，直到我夜晚放工番屋企，一路行番去時，己經諗緊三隻奀皮狗唔知會唔會返轉間屋，亂咬雜誌報紙咁，行到番去，屋企入面黑麻麻，企係窗外面裝下佢地搞乜鬼，企左幾秒就被發現及狂吠（唔認得我？），開聲叫佢地之後，就由狂吠變鶯鶯叫歡迎聲喇，入到屋，報紙雜誌叫到原封不動冇比佢地亂咬啦，因為佢地將目標轉移到去蘋果咬咬木處，成舊木冇左一大忽！！！離晒大譜呀！！！
20/9/2003 (六)　震．．．
夜晚坐係到食飯飯時，無啦啦見到Mousse自己坐埋左一邊呆居居，望真ｄ佢，原來係到震緊，望下周圍ｄ電制電線，放得好好丫，唔會係電親，都唔知佢搞乜鬼，佢不嬲都天不怕地不怕架麻…
21/9/2003 (日)好好味哦∼
一到中秒節既月份，屋企就會有好多水晶梨及蜜梨食，又因為我懶既關係，所以通常梨都會預先切粒用碗裝起，放係雪櫃，間接地益左五隻小魔怪，放便一粒粒餵佢地食，數數手指矇豬 CC 都有好一陣子冇食過梨啦，仲要係水晶梨添∼拎住兜梨行埋去佢地個籠，矇豬本來扒係籠既上層訓緊覺，鼻子嗡嗡，就即刻起左身周圍聞，認真醒目兼嗅覺靈敏，而CC又例牌慢半拍，矇豬食左幾大啖佢先彈起身周圍聞，真係遲鈍呢∼

矇豬食水晶梨小短片　－＞　按此
22/9/2003 (一)　我係Fit沙沙
先兩日，診所打電話黎提我沙律夠時間打預防針，本來諗住尋日帶佢去打，點知又落狗屎，結果就託媽咪今日幫我帶佢去喇，佢隻衰豬好似知到要去醫生到咁，唔肯行呀，要人抱，抱到一半路放低佢行兩步又要抱，之後再放低佢叫肯行啦，點知去到差唔多到診所又唔肯行喇，抱到佢入去，即刻掉頭走，叫佢磅重，一上磅就跳番落黎，入到醫生房，就不停咁震震震，連醫生都話 "嘩∼佢真係好驚喎，咁震法番到屋企實好攰喇"，哈∼真係失禮呢，不過醫生話佢都幾 fit，唔太肥又唔太瘦，真好呢 ^^
23/9/2003 (二)　我要食你個塊蘿蔔乾呀∼
夜晚行出廳時，比兩隻兔兔纏住，死追住我拎晒食，於是我每兔分左三塊蘿蔔乾，半分鐘唔洗，矇豬己經火速地食晒，不過CC呢，唔知係咪平時矇豬成日走去佢個籠食佢ｄ野，所以佢要食番矇豬個ｄ呢？佢自己個ｄ食完一塊後，就走過去想食矇豬個ｄ，但當然唔夠佢搶啦，呢到聞下個到聞下，自己個ｄ放埋一邊好似己經唔記得左咁，認真冇記性呀∼
24/9/2003 (三)　見到經媽會起水？
今日朋友仔黎學琴時，例牌受到三隻狗狗熱情款待，當其中一個朋友仔抱完沙律後，冇幾耐就發覺件衫有ｄ血跡，原來沙律起水呀，咦？好似阿仔做公公前冇幾耐先起完，又起？唔通打左支針影響左？不過真係好奇怪呢，養左佢兩年，一年起３次水，數數手指，有３、４次都係呢位朋友仔發覺件衫有血跡先知佢M，真係好橋哦，要幫佢做 "經媽" 呢∼
25/9/2003 (四)　我係醒目兔我係威姨媽
今朝梳洗時，開個厠所門望望兩兔，咦∼竟然冇扒係厠所門，等我一開門時走入黎搞搞陣，少可呢，不過原來佢地好醒目哦，雖然冇扒係門口，但我開門唔夠廿秒，己經見矇豬帶頭跑入黎，CC就跟住尾，我己經細細力冇聲咁開門，咁都知既？好醒哦∼
今日屋企門口舖階磚，所以我未出門口時媽咪己經起左身困兔兔，矇豬真係一見媽咪行出黎就飛快跑去自己籠門前，等媽咪開門放佢入番去，但每朝我行出黎呢，佢就會死跟爛跟，要我比野佢食，原來佢真係好識得人呢∼

夜晚三隻奀皮豬唔知搞乜鬼成日係到吠，搞到CC發皮氣大大力踏力，佢地即刻收晒聲跑入我房，坐低望住我，嘩∼CC好成威，聲都洗出，就搞得掂呢三隻野，我叫左好似次No，叫佢地唔好嘈，佢地都唔理我…等我下次又試下踏地先得　＝Ｐ
27/9/2003 (六)　新剷剷哦
今日去買左個新剷，因為之前用的一個不太暢順，剪朱古力還好，但蛋糕、Mousse既毛毛比較軟，所以就好難剪啦∼
買左個新剷之後，上左蛋糕屋企試剷，雖然佢ｄ毛毛唔太長，但之前由ｂ公操毛，剪到一忽忽咁好肉酸，所以就同佢剷靚靚喇，丫∼果然好用好順暢哇∼於是乎番到屋企，就快手快腳再同阿朱剷埋，Wo∼好痛快好順暢哦∼

仲有，今日買左兩塊有吸引狗狗去厠所既味既尿布，希望Mousse會用啦∼
28/9/2003 (日)　我忍…　惡屎兔
今日淨係朝早帶過Mousse去屎尿，夜晚專登唔拖佢出街，舖左塊尿布係厠所門口，離佢個籠最遠既地，希望有潔癖既佢會係上面痾啦，等呀等，等呀等，等到夜晚十點幾要放兔兔喇，佢都係唔痾，死忍爛忍，結果…唉…都係帶左佢上天台，上到去兜左個圈佢就痾左喇，真麻煩呀∼　聽日繼續努力！！

今日訓醒左個黃昏小睡，見CC個籠冇乜草，諗住同佢加番ｄ啦，再執執個籠加ｄ木糠，己經邊整邊摸摸佢，叫佢個名，點知佢都鬼咁惡死，大大力用個頭頂我摸緊佢既手手，好似話我好搞亂佢ｄ頭髮咁，頂既時候直情成隻跳起咁，一ｄ儀態都冇呀！
29/9/2003 (一)　尿布當床仔
為左教Mousse係尿布到尿尿，夜晚突登唔帶佢出街街，然後係厠所前欄個膠板，限制住佢既活動範圍，唔比佢走去廳，而我就扮若無其事咁玩電腦唔望佢，眼尾"sau"到佢係尿布上面聞下聞下，開心都黎唔切，佢就當塊尿布係床墊咁扒係上面訓覺喇…抱佢去沙律張床仔訓佢都唔訓，係要走番去尿布上面訓，激死人∼∼

夜晚阿姨走落黎，唔記得欄番塊板，就比Mou一支箭咁衝左上天台，唉…結果唯有開門比佢去尿尿，今日訓練用尿布宣告失敗∼
30/9/2003 (二)　WUUUooooo
夜晚同阿沙洗耳仔，佢又發惡喇，開頭都好地地既，但越洗越忟憎，之後就發皮四咬我，於是乎就同佢戴個口罩繼續，點知佢竟然可以除左佢，發晒癲咁惡到不得之了，咁曳曳當然要罰啦，結果就比我罰佢企係一個米幾高既濶櫃櫃上面，然後熄燈訓覺，再用枕頭遮住自己番臉等佢望唔到我，而我就靜雞雞裝佢，見佢好似好慘咁望住我，又望下門口想媽咪救佢，過左個零字起身行埋去，佢即刻垂低頭唔望我，呵∼之後媽咪入左黎抱抱救佢，我想接手抱時佢竟然唔肯呀，死抓住媽咪條頸，放佢落牀後就即刻走去牀角尾訓唔訓我側邊，發我皮四（明明佢曳先 ><），真係離譜呀∼