表姐走左落黎，話兩隻兔好肥，矇豬係加大碼，而CC呢就係大碼，都唔係丫，佢地多毛之麻…拎左ｄ蘿蔔乾餵兩兔，CC反應好快呀，第一時間彈起身食，但係矇豬呢，出奇地反應起遲鈍呀，拎埋籠邊冇反應，叫佢又冇反應，連拍佢個籠都冇反應，傻傻下咁，跟住先發覺有蘿蔔乾彈起身食，噓∼遲鈍之王呀！　

今日阿仔嘔呀，唔知搞乜，唔怪得之我朝早起身出梳洗，到出門口佢都冇乜啋我啦，淨係係床仔到訓，平時都唔係咁既…都夜晚訓覺，未真正訓得著時聽到Mousse咕咕聲作嘔，好彩抱得切佢落地下，唔係就嘔到一床係，唉…究竟咩事啦，兩隻ｂｂ先後嘔，真令人擔心呀∼

差唔多放工時，媽咪打黎，話沙律嘔，岩岩尋日朱古力同Mousse分別都嘔過，但都好活躍，諗住可能食錯左ｄ野啦，點知放工番到屋企，就覺得沙律有ｄ唔妥，冇好似平時咁跳上張�_上面擺尾歡迎我，呆居居咁，冇黎精神，耳仔凍冰冰，個身又好似唔多暖咁，獸醫又己經Close，好擔心呀，咁耐以黎都未試過咁既，平時鍾意既零食完全唔食，越諗越驚，水又唔飲，問媽咪佢有冇食野飲水，媽咪話唔多覺，驚佢會脫水，隔硬強迫佢飲左少少水，點知３分鐘唔洗就嘔左一灘水＋泡出黎，嚇死人…點算好？
好∼好∼好∼擔∼心∼呀∼∼∼！！！

夜晚９點９，都係好唔放心，打左去寶湖動物醫院約急診，Call台落call後都好快有人覆我，２分鐘都唔洗，之後同我約醫生，２０分鐘後有得睇，淨診金千五蚊@.@

去到時醫生未到，等左一陣，磅左重６．５公斤，入去睇時，探左熱冇發燒，睇左眼仔話血色都ok，摸左肚肚就冇野塞住ｄ腸，之後就要挖ｄ便便出黎睇，沙律都叫左一聲，醫生聞ｄ便便話有血腥味，需然冇痾血，但ｄ腸可能損左，之後見佢將ｄ便便整落塊玻璃到，然後用風筒吹，跟住再放係顯微鏡下面睇，隱約聽到醫生話咩便便有ｄ咩different shape，咁而家就咩 only one sharp，one bacteria 咁，之後翻譯就話沙律便便裡面有杆菌，好似人ｄ大腸杆菌咁，所以會痾嘔，但ｄ菌點黎就唔知，因為mousse同朱古力都分別有嘔，但就冇痾同活躍，雖然唔食糧但對零食都有興趣，所以可能佢地食ｄ野有問題交叉感染左，不過其實佢地只食過蘿蔔加狗糧，唔通ｄ蘿蔔出事？

之後就同沙律打左三支針，分別係止嘔，舒緩腸胃同唔記得咩，打第二支針時佢突然發爛擰轉面，支針當堂條條Fing係佢背背到嚇死…到第三支又冇乜野，跟住醫生又講解左係外國有隻菌，史納莎會容易感染到，病徵係痾嘔，冇精神，咁都幾嚴重既，不過話係香港就仲未見過（原來醫生係南非人黎），但叫我小心ｄ，照常理黎講聽日中午應該都會止晒嘔，如果朝早仲見佢嘔，冇黎糧神呢，就要即刻帶番去覆診，唔係都應該可以喇，另外同醫生講左朱古力同Mousse既情況，咁都開埋葯比佢地，今晚三雙都唔食得野，聽日就食醫生叫買個隻罐頭，希望冇事啦，擔心死∼∼

埋單二千蚊，比想像中平，話晒都打左三支針，買左四罐罐頭，三隻狗份量既５日葯，諗住要二千幾，點知又唔洗，呼∼

走既時候，要抱住沙律，又點，兩度拗柴，嗚∼腳趾尾好痛哇，好啋有阿媽扶住，唔係就攬住沙律仆左係地囉…

因為醫生話應該晏晝就會好番晒，唔會再嘔精精神神，但萬一朝早見佢都仲係好呆滯，就要即番去覆診，所以今朝早請左半日假，留係屋企睇住佢，好彩見佢精神都好好，雖然同平時仲係差ｄ，但起碼會周圍走，有人經過會吠下，都放心ｄ，餵佢地食醫生到買既 Sensitvie Control狗罐頭時仲好雀躍添，尤其是Mousse，食到超級大 "雜雜"聲，一ｄ儀態都冇∼

夜晚放工番黎，雖然沙律冇跳上張�_到歡迎我，但都有擺晒尾，精精神神咁，我番左工既時間，佢地都冇嘔到，好彩渣，尋日真係嚇∼死∼我∼

媽咪今朝番左大陸，我又要番工，屋企冇人，得沙律同ｂｂ三個看家，真令人擔心…番到屋企，一開門，咦∼好臭呀，望望地下，一Pat啡色物，再望望梳化，又一Pat啡色物，開頭以為係爛屎屎黎，但近距離望真ｄ，發覺原來係嘔吐物黎，逐個捉黎聞咀咀，如果冇聞及估錯，應該係Mousse嘔喇，不過見佢又好精神，擺晒屁屁係咁又撲又舔，應該冇事掛…　不過最慘係要收拾呢個殘局，抹地下都叫好ｄ，張梳化就慘喇，ｄ嘔嘔浸晒入去，要開張梳出黎抹，好鬼大工程，又漏晒落ｄ罅到，淨係又水又滴露抹張梳化，都搞左大半個鍾，嗚…媽咪哦∼∼

夜晚服侍兔兔時，聽到ｄ清脆"ChopChop"聲，周圍望望，見到矇豬口郁郁，再望真ｄ，原來隻衰豬偷左條像筋食呀，先幾日朝月出門口時己經懷疑唔小心地比佢食左一小條，不過好似今次發覺得左，邊 "R" 佢下巴仔邊 "蚊蚊"下，比我成條 "蚊"番出黎，只係有ｄ牙齒痕同條開左，好彩Jei ^^"