1/11/2003 (六)
萬聖節過後又要番半日工，結果一個午睡訓到第二朝，５隻小鬼做過ｄ咩？
完∼全∼唔∼知　=P
2/11/2003 (日)　食得唔好"晒"
夜晚放兔兔時，慢左一步收起幾兜狗糧，就比兩隻醒目兔衝埋去食左小半粒，激死，三隻狗鐘意食兩隻兔ｄ屎屎，兩隻兔又鐘意食三隻狗ｄ狗糧，唉…
收起左幾兜狗糧收，兩隻兔就轉移目標，執地下ｄ狗糧醉食，洗唔洗咁慳家呢？果然食得唔好"晒"呀下∼
3/11/2003 (一)　我係家姐！
狗狗之間會分地位，跟據屋企個三隻既背份黎講，應該係沙律->Mousse->朱古力，不過可能阿仔太大隻，所以變左佢好似排得高過身為家姐既Mousse，唔知係咪因為咁，所以Mousse成日要Un阿仔，做番個家姐，望到佢既行為，真係好搞笑呢，好彩阿仔夠"好老皮"，比佢Un時都唔會點發惡，最多都係坐低，擘大個口咁∼
4/11/2003 (二)　阿煩∼

沙律真係好好記性，記得當佢入房訓覺後，兔兔就會有菜食，結果佢就會好有耐性咁敲門，唔理佢佢都會好有耐性咁敲幾個字，煩到你肯放佢出去為止∼
好喇，到半夜，佢又記得兔兔ｄ菜菜食得差唔多，淨番ｄ莖，佢又會再敲過，去執矇C口水尾，食埋ｄ莖去，真係超級煩，想有覺好訓都唔得 X(
5/11/2003 (三)　乜我細粒左咩？
今日糕糕黎左玩，唔知係我屋企個三隻越黎越大隻丫，定係佢縮左水啦，望落去好似細仔左好多咁，連黎學琴既學生都係咁講呢∼不過細粒左，身手就好似敏捷左喎，左彈右彈，同家姐阿哥媽媽玩到癲晒，今晚真好好訓定呢∼
6/11/2003 (四)　我…比人丙…
係我番左工其間，沙律，唉…都叫佢要乖乖架啦……

夜晚番到黎，媽咪話我聽佢丙左沙律一大餐呀，事關佢係屋企無啦啦亂咁吠，話極佢都唔聽嘈到屎，結果媽咪就去打佢屁屁啦，點知佢個衰豬竟然反擊喎，拎轉頭咬媽咪隻手，結果緊係比人丙多兩錢重啦，阿媽都醒喇，走去戴番隻手套先丙佢，點知佢又再咬落黎，之後就幣喇，比媽媽用個布既咬咬玩具打屁屁，再加超惡語氣鬧鬧鬧，鬧到沙筆頭"dupdup"聲都唔聲，之後媽咪餵ｂｂ食餅餅佢走埋去想食，都比媽媽鬧，之後就冇晒聲氣自己走埋一邊訓覺豬喇∼

哼∼抵佢丫，成日恃住自己地位高，恃寵而驕，欺善怕惡，唔惡ｄ對佢就比佢蝦架啦，麻麻煩煩大小姐，種壞晒呀！
7/11/2003 (五)　我自己收埋食

今朝唔知矇豬係咪未訓醒呢，CC走左埋黎要野食時佢都未有咩行動，咁我照於低ｄ日本糧比佢啦，CC佢…佢幾醒呀，竟然一個轉身企上去ｄ日本糧到，等ｄ糧收埋晒係佢個肚腩仔下面，矇豬走到埋黎都食唔到，要捐去佢個肚到先食到，真搞笑呢 XD

11/11/2003 (二)　食多d草好呀∼
因為而家要番工，好長時間都唔係屋，所以都要拜託媽咪照顧佢地，尤其是兩隻兔兔，夜晚放工番到屋企，成日發覺佢地草兜都會冇晒草，矇豬就好ｄ，因為仲有個吊吊物掛住草草，食晒個兜個ｄ，都仲有個後備，不過 CC 就冇喇，所以一定要Keep 住個兜兜有草，其實都有成日提媽咪比多ｄ草草兔兔食，唔係會痾嗅便便，不過今晚放工番到黎又見到CC個草兜得番三、四條草草，邊加草邊再提提媽咪，點知佢話個冇幾耐之前先加左一次，仲話 CC 大食添∼　不過諗諗下，又發覺佢地真係食多左草呢，唔知係咪因為而家轉晒食Oxbow加APD既關係呢，貴草不愧係貴草哦！
12/11/2003 (三)　即剪即食
呢一兩日天氣轉凍，攬住阿仔，就係一個天然大大暖水袋喇，攬住佢係心口，再用件睡袍包住，呼∼好暖哦，不過攬攬下比狗鬧哦，媽律企係一邊吠我，然後跳埋上黎要攬攬，好啦，攬晒兩隻，佢地又不和係到Wu，認真難搞 ): \

攬左陣就同阿仔剪指甲，剪呀剪，ｄ甲甲就周圍彈呀彈，除彈左上檯之外，彈落地下既，似乎比Mousse執左大部份黎食呢…到Mousse剪時，就到阿你走去執黎食，點解狗狗咁鍾意執地下到碌碌下既野黎食架呢？ｄ狗糧又係，放係狗兜唔食，掉落地碌碌下就即刻走去執黎食，狗狗心理真奇怪呢∼
13/11/2003 (四)　餓屎我喇…　我發功∼∼煩煩煩∼∼∼
今朝起身，發覺兔兔兒菜放左係餐檯，於是乎就同佢放番落地下啦，跟住兩兔就掛住食菜冇理過我喇，我入廁所梳洗又冇跟住黎，之後入琴房拎衫又冇走入黎，只顧住食食食，再走埋去佢地個籠望望，原來ｄ糧食晒，草草又得番ｄ好短好碎既，唔怪之得咁餓啦∼

夜晚放工番黎，聽番媽咪講，原來"煩沙"尋日又發功，係咁拍門要起身食菜菜，放佢出去食完，隔一個鐘唔夠又起身拍門，搞到媽咪冇得訓，結果放左佢出去３、４次後，就索性抱左佢入阿仔個籠訓，其間媽咪起過兩次方便方便，順便望望佢，佢都呆居居扒係到眼光光，不過因為佢太煩要罰，所以都冇理佢，之後，佢就開始喊喇，但又唔敢大聲喎，細細聲係到嗚嗚嗚…搞到媽咪都係唔忍心抱番佢入房訓，佢入到房，就跳左上床係咁舔我同捐入我個被竇到（點解我完全唔知？），冇再拍過門乖乖地訓覺喇，又因為佢既煩，兜菜菜就放左上餐檯唔記得放番落黎，搞到兔兔捱左一晚餓呢∼
15/11/2003 (六)　乜你咁惡死架…
今日蛋糕左玩，今次佢好快就同Mousse玩埋一舊，可能Mousse 想快ｄ可以UnUn佢，做大家姐所以Wu小ｄ佢呢，唔知係咪今次冇係咁比家姐Wu，所以阿糕今次好活躍哦，周圍彈撩交打，又成日煩住沙律撲黎撲佢喎，睇見佢都開心呢，平時得佢一個實好悶定喇，夜晚放左兔兔，阿糕見到兔兔都好開心呢，走埋CC到，不過CC就唔多歡迎佢，哩左入茶几底，不過阿糕都照捐埋去，搞到CC "唬" 一聲向前衝，嚇到阿糕即刻向後良，好彩冇變崩鼻妹^@^

仲有，今日同阿仔剪左毛，發覺…佢好似∼肥∼仔∼左∼哦，屁屁ｄ肉有一摺呀…
16/11/2003 (日)　呢塊乜家伙黎架？
為左夜晚放兔又放狗，但唔比佢地有接觸，放是乎媽咪去訂左番板板番黎，將我、媽咪房、廁所同廳分開左，咁兔兔係廳到活動，狗狗呢就入房訓覺，不過阿兔發現呢塊木板就好似唔多鍾意喇，梗係啦，少左個地盤，所以就係咁係板板前面放屎又放尿，結果又搞到Mousse唔多鍾意喇，係板板後面又Wu又抓，真係好麻煩呢∼
17/11/2003 (一)　集中彈藥主攻大門　
經過一晚後，矇豬同CC對呢塊減少佢地活動範圍既膠板己經冇晒新鮮感，冇再係膠板前面屎尿，但就將所有彈藥集中放晒係大門口１，真係超多超多屎呀，仲有尿尿一大大督，唉…

放左Mousse入房訓，半夜起身，發覺另一間房地下有一大督尿，衰妹，訓之前都特登帶佢出去痾過一次架啦，入籠訓又可以唔痾喎，都唔明佢既，不過佢都算乖架喇，跳落床，仲識得走過另一間房既地下痾，痾完先走番過黎訓，唉…
19/11/2003 (三)　
自從阿媽發覺蘿蔔乾可以自己曬後（真正的無添加哦），都冇再係出面買過，不過呢排天氣唔係咁好，冇乜太陽，所以岩岩晒既幾個紅蘿蔔，兩大兜蘿蔔乾都發毛變黑，嗚…冬天點算好呢？冇太陽曬唔到會冇得食哦…

今晚放兔時，佢地兩姊妹好恩愛呀，雖然矇豬一出黎就跳入CC個籠屎尿，嚇到CC跳左出黎，但佢邊痾都伸個頭出籠外面，同CC洗面洗眼，呢個家姐惡得黎都算唔話得呢∼

因為而家有塊膠板隔開狗狗同兔兔，所以夜晚Mousse都入埋黎訓，佢似媽咪有潔癖，，廁所係佢籠前面，所以唔肯係個度去，屋企既其他地方，唔係急得好緊要，都唔會去，會忍到我拖佢出街先痾，基本上早一次晚一次拖佢出去就OK，不過半夜冇人睇住而佢又冇入籠訓呢，丫∼佢又會搵地方痾喎，上一次好叻咁走入我房去，今次我叻喇，閂左我同媽咪房門，但就開左廁所門，噴左訓練狗狗上廁所既用品，床仔放係小走廊，唔知佢會唔會入去廁所尿尿呢？　

（答案：冇 -_-"）
20/11/2003 (四)　哼∼我嬲呀！　床仔係我架∼
今朝一起身矇豬就飛快地由茶几底衝埋黎，想跟我入琴房，但因為今朝比較趕時間，所以當佢用鼻仔頂開左房門既時後，我就拿拿淋"o彭"一聲閂埋佢，唔知係咪因為咁激嬲左矇豬呢？之後我係廳到周圍行佢都冇理到我呀，真小氣呢 ><

呢幾日放Mousse入黎訓，佢都係訓沙律舊個張床仔，新個張佢唔鐘意訓，小氣既沙律見到，就走去同佢爭，有大床床唔訓，寧願走去訓床仔，搞到Mousse兩頭騰唔知點算好，又冇定訓喎，煩沙呢個名真係冇改錯呢∼
21/11/2003 (五)　鞋仔…唉…
先幾日買左Pack鞋仔比Mousse，諗住落雨時著左咁地下濕都可以拖佢出去屎尿，唔會整污糟隻腳仔，不過因為Size唔岩咁拎左去換，今日終於換左番黎喇，搵左沙沙黎諗，同佢著完後放佢落地地，見到佢行，我同媽咪都忍唔住笑左佢十秒有多，佢好似知我地笑緊佢呢，因為佢見我地笑即刻靜止晒所有動作，郁都唔郁，比餅餅佢都唔行埋黎食，要Tum左佢好埋先肯行，不過都係行到好似隻蚚蜴仔咁超搞笑呢，呵呵呵∼
23/11/2003 (日)　機不可失∼
今晚放兔時，一個大意係梳化前面放攔少左一塊膠板，結果就比兩隻醒目兔搵到位跳上梳化大玩特玩，屎屎尿尿不在話下，電話線…亦慘遭咬斷，唉…只係一時大意者，洗唔洗咁快口呢？
24/11/2003 (一)　震…
今朝訓到濛濛瀧瀧，Mousse冇啦啦跳左上黎我枕頭到，然後係到不停咁震震震，以為佢凍啦，用張被包住佢訓，點知佢都係不停咁震，唔知搞乜鬼，結果起身時行出房睇下，原來佢係走廊仔痾左尿，驚比我鬧所以驚到震，乜我咁得人驚咁惡架咩？
25/11/2003 (二)　珍惜每個機會
夜晚執屎時未開始同梳化起架部，未欄膠，矇豬就乘機增取時間跳上去玩，可惜佢有ｄ論盡，跳上去時有ｄ失足，抓左幾抓先跳到上去，所以就比我發玩左，丫∼佢都好醒目喎，見我望住佢就即刻跳番落地，仲記得梳他係禁地唔去得呢，真係好記性喇∼
26/11/2003 (三)　龍床不及狗竇
今晚抱Mousse入房訓時，佢又冇啦啦係到震，唔知佢覺乜鬼，又冇賴屎賴尿丫，放佢落地地，丫∼佢竟然自己走去床仔到訓，唔通龍床真係唔及狗竇？定係怕比沙律搶左黎訓所以要死守呢？
27/11/2003 (四)　有舊怪物扮我地呀！　紙盒識走既？
今晚收了份超超超可愛既生日禮物，係一隻莎莎擺設黎呢，仲要係好似架添，拎住隻假莎莎走埋去沙律同ｂｂ到，邊扮狗狗吠，邊隊隻假莎埋去佢地到…佢地好似有ｄ驚呢∼又要走埋黎聞下睇下係乜黎，但又驚向後退喎，好搞笑呢，唔知佢地覺唔覺得呢舊野同佢地好似樣呢？

而矇豬，一放出黎就發現左裝住假莎莎既紙盒同膠袋，第一時間走埋去八掛一下，不過因為紙盒較高又輕有個袋裝住又跣，所以佢一企高想兩隻手仔搭住個盒借力，個盒就走左去，試過幾次都係咁，最終都係好冇癮咁走左去Lu…
29/11/2003 (六)　新衫仔
今日去左探做完絕育手術既糕糕，佢好似好開心咁呢，係咁撲埋黎，完全唔覺肚仔係有個傷口係到既，好似唔通咁，睇黎好精神，傷口都好似埋得幾好丫∼
之後落左旺角，見到街邊擋有狗狗衫賣，五十蚊兩件，於是就買左兩件番黎，一件蜘蛛俠比阿仔，不件馬騮比沙沙或者o妹o妹，不過阿仔竟然著１８都有ｄ窄呀，唔通要著２０先岩？唔係下麻…咁肥仔？
30/11/2003 (日)　好臭呀∼快ｄ拎走佢∼
媽咪買左好香香既番石榴，夜晚入廚房拎個黎食時，矇豬同CC就跟住我走入黎，好似有金執咁，咬左一啖後，遞埋去比矇豬，諗住佢會八八掛掛咁聞下啦，丫∼點知佢竟然第一時間拎"咩"面，佢拎去右邊我就遞去右邊，我一遞去右邊佢又拎去左邊，就好似狗狗賴左屎屎拎埋去比佢埋，佢死都唔聞一樣，真搞笑，乜番石榴味真係咁難聞咩？唔係丫，我覺得好好好香喎∼∼