本來醫生叫我同ｍｏｕｓｓｅ戴個頸伊利沙伯罩，等佢唔好舔尿尿個到，唔係會舔晒ｄ葯膏同會舔損／發炎，不過一同佢戴左罩罩，佢就好唔開心，企係到郁都唔郁，我伸個頭埋去叫佢鍚鍚，佢都唔啋我拎轉面，所以除左岩岩搽完葯膏，其他時間我都同佢著條褲仔。

今晚，當我準備同妹妹除褲仔搽葯膏，我發覺…佢條褲仔濕左…丫∼∼∼佢賴左尿呀，著住褲仔尿尿呀，仲要尿完之後跳左上我床尾訓覺豬，乜濕漉漉焗住個屁屁唔會唔舒服架咩？？張被我先１、２個禮拜先洗完黎，而家又…不過算啦，唔係係上面痾，只係一條濕既尿褲仔印左ｄ尿尿落去，又有過底，唔…都係遲下至洗　^^

夜晚，比平日早左少少洗白白，著住作睡袍同兩兔執屎籠，ＣＣ對我件睡袍個袖好有興趣呢，只要我一伸隻手埋去，佢就追住個袖邊咬，我隻手向右移，佢個頭就跟住向右邊移，總之就係咁追住個袖黎咬啦，都唔明點解特別鍾意咬睡袍既？唔通鍾意隻沐浴露味？

朱古力︰我地住地下，所以成日有好多人出出入入，肥舅婆啦，太太婆啦，只要我地坐低、比下手手，咁就會有餅餅食，仲要“乙水”到佢地好開心添，所以每次見親有人落／入黎，我地都努力擺尾、坐、比手，所以，成日都會收到禮物仔，今日呢，就收到舅婆送既雞肉味西渣，之前舅婆買ｄ寶路都仲未食完，又有新既，真係好呢，仲要開左兩罐比我地就咁食添，雖然太婆話佢“有冇搞錯，就咁比佢地食，食刁咀呀！呢個舅婆離譜既∼”，哼∼我覺得冇搞錯丫，幾好呀，平時撈左狗糧都冇咁好味既，溝淡晒，如果舅婆成日落黎開比我地食就好ｌｕ，下次要舔舔以示多謝先得∼汪！

呢兩日ｄ陽光麻麻地，蘿蔔乾仲未成乾，只係少左Ｄ水份既蘿蔔片，不過都試下比矇豬ＣＣ食，ＣＣ呢就一放埋去己經一啖咬落去，食得津津有味，矇豬呢就小心Ｄ，聞下舔下，先試一小口，然後先搶走慢慢食，唔∼咁就好喇，第時落雨曬唔到都可以切片，等佢乾身少少比佢地食，唯一唔好係放唔得耐者，都好過出去買丫∼　

夜晚，諗住用蘿蔔片引矇豬同佢剪指甲，明明見佢食得津津有味，點知拎住個剪甲鉗行埋去，扒左係地下準備同佢剪時，佢一見個鉗就第一時間用個屁股對住我，我移去佢前面啦，佢又再拎轉身，好喇，咁我係佢後面諗住同佢剪腳仔先，個鉗都未放到埋去佢隻腳到，佢就己經逃走左…果然，兔兔除左中間既盲點外，幾乎可以睇到３６０度既事物呀下∼

今日慶起整沙律食，當然唔少得加個富士大蘋果，又當然唔少得兔兔份啦，先切左一小塊比矇豬食，然後再比ＣＣ，沙律見到就唔多鍾意，因為佢冇得食麻…結果竟然想搶兔兔個舊黎食，用個鼻仔頂兔兔個籠門，搞到企左係門後面既矇豬即刻紮定個馬步，進入作戰狀態，不過一見我又放左塊小蘋果係門口呢，又開始鬆懈喇，咩都唔理就將個鼻隻伸埋去門既隙到聞兩聞，完全唔理企係門前發晒“炆陣”既沙律ｗｅｌｉｗｕｌｕ，然後一口就咬走舊蘋果繼續津津有味地食∼食∼食∼

新年就黎到，今日好豪地送左三隻狗去美容，沙律係熟客仔，洗個白白就算數，毛毛留番我自己親自操刀，嘿∼　而朱古力同ｍｏｕｓｓｅ呢，今次就剪埋毛毛喇，朱古力對上一次出街剪毛毛，都好似好耐ｌｕ，多數都係我自己黎，而ｍｏｕｓｓｅ呢，就一次都未試過出去剪，因為細粒，總覺得唔多抵…

因為舅父佢地有車車，又岩岩準備去飲茶，所以順道兜一兜我喇，一上到車，嚇到三隻莎攬到我同媽咪實一實，到左寵物店，仲比隻ｃｈｏｗｃｈｏｗ同金毛兇一兇佢添，搞到平時係屋企巴巴閉既三隻野聲都唔聲，交低左佢地比寵物店，沙律自己一個籠，朱同ｍｏｕ一個籠，就走左喇∼

到晏少少，媽咪同姨媽飲完茶茶番黎，又兜一兜左去寵物店，沙律同ｍｏｕｓｓｅ都己經搞掂，係差阿仔，所以就先接佢地兩隻番黎，阿仔見到，媽咪就佢不停咁叫，緊係以為我地唔要佢定啦，望住媽咪同家姐比太婆接走左，又確實係幾驚既，加上本身佢又細膽喎，真係嚇死哦，呵∼ 到夜晚，去接埋阿仔，一見到我佢好似好開心呢，搖晒尾咁，即刻來個抱抱攬到實先，放佢落地行時都好似唔多肯，行幾步就想要抱抱，嘿∼雖然美容完好乾淨地下又污糟，但廿磅仔實在太重抱唔起哦 ^^"

夜晚放左兔後，例牌隻腳附近一定有隻兔跟出跟入，鬼咁有耐性，跟左一輪後冇野食呢，就會走黎頂下你隻腳，投訴一下，通常呢野兔呢，都係矇豬黎，ＣＣ就會企係茶几底觀察＆等，今晚都一樣，叫佢都唔走埋黎，懶有性格咁，好啦，咁唯有淨係餵矇豬唔理佢，本來矇豬都食得好斯文，一粒一粒慢慢食，但ＣＣ觀察左一陣，發覺安全喇（冇梳冇指甲鉗），跑埋黎一齊食，矇豬見到就即刻變得狼吞虎嚥，一口就食左４、５粒，然後先慢慢“ｏ趙”，驚死蝕底咁∼

唔知係咪真係隔黎飯香ｄ架呢？沙律鐘意食ｍｏｕｓｓｅ兜糧，朱古力又鐘意食沙律個兜，但明明就係同一樣既食物黎，連阿兔都唔例外∼

平時放出黎，佢地都好鐘意交換籠食草食糧，但多數我都唔會開矇豬個籠既，因為咁朝早就可以執少一個籠，所以多數都係矇豬走入ＣＣ個籠到食既，唔知係咪因為咁，所以一有機會，ＣＣ就要食番矇豬個籠Ｄ食物呢？夜晚同矇豬個籠添草時，懶得將佢剪短，咁Ｄ草草就伸左Ｄ過ＣＣ個籠到，ＣＣ一見到即刻第一時間走去食，一路食一路食，一條都唔放過，直到伸過黎既草草短到佢咬唔到為止，而自己個兜呢，反而唔多理，唔∼真奇怪呢∼

呢兩日天氣明顯凍左好多，聽日仲要係唔知幾多年黎最凍既年三十晚，算叫有番ｄ新年氣氛，狗狗們都可以著下靚衫過年，不過唔知係咪因為之前帶左佢地去剪毛，所以怕凍左呢，尤其實ｍｏｕｓｓｅ呀，好似成日凍到係到震下震下咁，要攬住下一陣先唔震，不過佢地好似好胃口左呢，淨狗糧冇野撈黎食都清晒，真難得，夜晚訓覺時，又堆埋一齊訓，雖然都有爭床仔既情況出現，但起碼冇打交，你“埃”住我我又“埃”住你，鬼咁好感情，當堂暖笠笠晒呢∼

雖然兔兔冇咁怕凍，不過佢地個籠放正係個大窗下面，又對住大門，見佢地都冇扒係到訓，而係變左波波，摸摸耳仔都凍冰冰，所以都拿拿臨拎張毯舖一舖佢地個籠頂，擋一擋風，再同佢地添一添就黎清晒既既草兜，哈∼當堂好似活躍左話，即刻起身食下草舔下耳仔∼

今日係大年初一，我地呢ｄ鄉村地區例牌炮聲連連，霹靂啪喇冇時停，乾早媽咪帶ｍｏｕｓｓｅ去屎尿時，每次ｍｏｕｓｓｅ紮好個馬想屎屎，就突然間霹靂啪喇，嚇都佢即時企番起身，仲要咁岩兩三次都係咁，嚇都佢企係到都腳震震，番到屋企都仲係到震，真陰功呢，驚到屎屎都痾唔出…

不過夜晚拜完年番黎，除左廁所上面有兩督屎屎外，廚房同餐檯底都有各有一督仔，唔…應該有衰妹份啦，不過都好∼唔係谷住就麻煩喇，不過唔知係咪成日都有炮竹聲嚇親佢呢，夜晚見到佢好似呆下呆下咁，冇平時咁熱情哦∼

先兩日發覺沙律夜晚訓覺成日“ｒ”耳仔，所以今日就同佢黎個大清洗，嘩∼果然係有好多耳屎呀下，撩左幾支棉花棒都好似都係好污糟咁，白色棉花棒入，啡色棒棒出，可能撩得耐左少少，搞到佢發晒脾氣，開頭就“ｗｏｏ”我，唔理佢繼續撩，佢就轉個頭咬落我到，離晒大譜呀！！持住自己得寵就放肆喇，結果我當同佢鬧惡，再罰佢企高高（高櫃），當堂聲都唔聲，哼∼同我鬥丫拿∼

今日病病請左假，沙律同ｂｂ都好似知我病病咁，冇抓門要出廳，有人經過冇吠，只係靜靜咁扒係我側邊訓，我唔起身，佢地就繼續訓，真乖呢（其實係佢地豬，呵），直到２點我起身佢地先跟住起，去屎屎尿尿食個ｌａｔｅ早餐，不過最開心都係兔兔喇，佢地都好耐冇試過一放就十七、八個鐘，所以一見我出黎，都好自動自覺跳入籠，加上ｄ草草菜菜都食晒肚仔餓，所以第一時間跳入籠等開飯呢∼幾

唉唉唉……今日只係懶左少少，少少者，冇番到屋企即刻拖ｍｏｕｓｓｅ出去屎尿，點知佢就跳上我張床到痾，張雪姑七友被新年前先洗乾淨架麻，又要洗，丫！！！好彩我個鼻都夠靈敏，聞到有尿味，係佢未索晒入張棉被到，第一時間用紙巾索左係被面到兜住，仲“浪浪”下既尿尿者，唔係就真係好難先洗得乾淨啦∼