＊又要戴罩罩…＊
見阿仔個大脾ｄ粒粒好似比之前仲多左，所以今日同佢剷晒大脾內側ｄ毛毛，跟住同佢搽梳甩高葯膏喇，一路搽佢一路“ｙｏｕｎｇ”，我都知好痕架喇，但冇辦法啦，鬼叫你皮膚唔好咩…搽完葯膏驚佢會自己舔番，所以同佢戴左個罩罩，佢一見到個罩罩，就知道唔對路，即係垂低頭，以為咁我就同唔到佢戴…乖仔啦，為你好渣，雖然我都知道好陰功……
０１／０８／０４（日）

＊粒粒幾時走呀？＊
夜晚出街街前，見同阿仔都搽完葯膏咁耐，都唔怕佢會舔，所以同佢除左個罩罩，點知夜晚番到屋企，見到佢個心口仔紅左一撻，ｄ毛又濕晒，應該係佢自己舔＋抓到咁，大脾仔ｄ粒粒又好似多左，有ｄ仲損左添，所以又要好狠心咁同佢戴番個罩，用水抹抹ｄ粒粒，再搽番ｄ葯膏∼
０２／０８／０４（一）

＊搽呀搽∼ 家姐？怕怕∼＊
比阿媽激屎，今朝起身佢同我講“阿仔個大脾仲係咁架，你點養狗架，我同佢搽左葯膏喇，等你搽蚊都訓呀！”，點知佢同阿仔搽人用既止痕葯膏，但佢搽之前既幾個鐘我先同佢祕密地搽左梳甩高，因為驚兩種溝埋唔知會唔會有咩問題，所以拿拿淋同佢用水抹左佢，好彩冇事，仲好似…真係好左ｄ喎^.^"

夜晚見阿矇豬又好痴纏咁隔住個籠同ＣＣ互舔，所以又放左佢地出黎喇，今次我醒目閂埋佢地個籠，等佢地唔會係入面轉轉轉，打起上黎都有得走下，開頭ＣＣ都好驚，走埋去舔幾舔矇豬就走開，但矇豬一直都保持住一個波波合晒眼咁既冧樣等ＣＣ舔既，都唔知有乜好驚，連眼神接觸都冇，來來回回幾次舔幾舔退後幾步，又上前舔幾舔再退後，矇豬開眼喇，當堂嚇到ＣＣ走都走唔切咁款，但矇豬係冇郁過架喎，只係睜大左隻眼仔，真係比呢隻ｃｒａｚｙｃ激屎，不過可能矇豬見ＣＣ跑，所以佢又走去追，其實ＣＣ唔跑就ｏｋ，因為矇豬其實冇乜意識係想ｕｎ／咬佢既，只係見佢跑所以又跟住追咁，究竟ｃｒａｚｙｃ幾時先唔ｃｒａｚｙ呢？
０３／０８／０４（二）

＊雷公好得狗驚呀＊
大埔今日唔知搞乜鬼，由極好天猛太陽，無啦啦落狗屎咁落大雨，仲要勁行雷添，ｄ雷聲係大到震入個心個隻，訓緊覺都嚇到個心離一離，三隻狗就當然嚇到屎屎下，ｍｏｕｓｓｅ係咁係我側邊震，沙律就係咁走上我枕頭頂到喘氣，朱古力叫好ｄ啦，冇喘氣冇震，但就一定要扒係我個身上面，想推佢去側邊，又爬番上黎，沙律又係，推佢去側邊，又爬番上枕頭頂到，三舊熱辣辣毛茸茸既物體就係咁包住我訓覺喇…呼…擺命，扎屎∼
０４／０８／０４（三）

＊唔知魚魚好唔好未呢？＊
因為小表妹全家過幾日要去旅行，所以帶左５條魚仔黎寄養，媽咪同佢講“我地唔識養，唔知會唔會養死佢架喎…”，小妹表話“咁都好過係屋企死丫，係屋企一定係餓死，係你屋企死都死得舒服ｄ，都好既…”，哈∼咁都得？

５條小魚放左係餐檯，沙律眼甘甘望住，魚魚既ｓｉｚｅ同佢平時食既魚乾仔一模一樣，而佢平時都好鍾意食魚架喎，唔知…佢個心諗緊乜野呢？會唔會好想食左佢落肚呢？

夜晚同沙律洗左白白剪左毛毛，點解…剪完毛都仲咁肥既，成個身圓碌碌咁，仲要好似望到個身ｄ肉一節節，狗仔細細，個胸有成２０吋！！
０５／０８／０４（四）

＊好野∼新籠入伙！！粒粒呀…＊
呢兩日突然興起，好想買個新兔籠，於是乎今日就去買喇，本身係銅鑼灣見到一個都幾鍾意既，雖然唔係好大，但夠高，個空間感好大，之後落到旺角，睇左一輸，見到ｄ好大既籠，但略嫌矮左ｄ，到見到ｄ夠高既，但又唔夠大，最理想係可以買到２尺半到濶，有兩層既籠，其實仔妹個貴籠就好ｐｅｒｆｅｃｔ喇，但同其他籠相比下又實在太貴，一個等放２個，甚至３個，但皇天不負有心人，竟然比我見到有舖頭清貨做緊半價，拿拿林同姐姐講“我要呢個，仲有冇新？”，美中不足係紫色得番ｄｉｓｐｌａｙ個一個，全新就只有灰黑色，不過見佢有膠袋包住，又好新淨，所以都唔理喇，照要！

夜晚番到屋企即刻砌左個籠，其實本身想買籠比ＣＣ既，因為佢個籠得一層，加左塊豬仔板之後好矮，不過個新籠同佢舊籠ｓｉｚｅ唔同，豬仔板唔岩用，唔想訂過塊，咁平時我又成日會用膠板欄住間少少位比佢出黎扒下，所以就決定新籠比家姐住，家姐個籠比佢住喇，不過砌好左之後，我比ＣＣ入去兜左個圈先，之後先比矇豬住，唔知矇豬鍾唔鍾意呢？

仲有，阿仔個大脾ｄ粒粒本身退左好多架喇，呢兩日同佢除左罩，點知又起番喇，唉…正衰仔黎，成日走去舔，搞到好下唔好下咁，媽媽下命令，１５號前唔好番，冇得去生日會呀，慘∼
過兩日去買海澡粉黎試，加落糧到比佢地食，睇下有冇幫助先∼
０７／０８／０４（六）

＊星期天阿四天＊
星期日，又係做阿四既日子，拎左拆散左既矇豬舊籠去洗，然後拼番好等ＣＣ入住，跟住就拆ＣＣ既豬仔板去洗喇，塊豬仔板底既罅既尿蹟，好∼難∼洗∼呀！係咁刷係咁刮都搞佢唔掂，嘿∼算喇，個面乾淨就又佢，眼不見為乾淨，之後拆兜拆架拎個盤去洗，因為ＣＣ唔識去廁所，平日又懶，所以以個底盤尿蹟洗都我一隻野咁，搞掂晒之後，我就將兩個籠門口拍門口咁一齊放，矮籠砌少左門口個一塊架，
高籠開住對門，咁兩個籠就可以打通喇，就算平時我唔係屋企，都可以ｋｅｅｐ住比佢咁走出黎，多ｄ活動空間，希望ＣＣ鍾意我既新安排啦∼
０８／０８／０４（日）

＊保持乾淨＊
矇豬新屋入伙都兩日喇，唔知係咪唔捨得整污糟間屋呢，佢竟然忍屎忍尿，直到我夜晚放佢出黎為止，平時個廁所ｄ墊料有２／３都濕晒既，面頭都舖滿晒屎，但呢兩日，屎唔過１０粒，ｄ墊料呢，都要係濕左少少，不過一放出黎呢，佢就一支箭咁標去個公廁到踎喇，可以踎成１０分鐘唔郁既，真係服左佢呀！

仲有，佢個衰豬好曳皮呀，跳上餐檯櫈到，推左裝糧既兜落地，倒到成地都係，好似唔洗錢買咁喎，激屎！

仲有仲有，裝住新籠個紙皮箱比左佢地玩，矇豬同ＣＣ都玩得好開心，博晒命咁咬，ＣＣ仲索性扒係入面休息添∼
０９／０８／０４（一）

＊海藻粉＊
因為阿仔既皮膚實在太差喇，成日生粒粒，呢到生個到生，又周圍“Ｒ”，ｍｏｕｓｓｅ都係，條頸既住置又係成日有粒粒，所以去左買海藻粉比佢地食，希望會有ｄ幫助有改善啦，今日第一次比佢地食，唔…就咁比佢地聞，好似唔多感興趣，只係聞聞下咁，舔都冇舔，將ｄ粉溝左少少水撈左落ｄ糧到，等ｄ粉濕濕地痴住ｄ糧佢地會食落肚，不過都有ｄ粉沉左係個兜底到，所以我就好核突咁用手指將ｄ粉“ｈｉｇｈ”落佢地條舔到，唔好“晒”丫麻∼
１０／０８／０４（二）

＊咇咇玩具好玩呀！出唔番黎添…＊

今日去左聯達買禮物比ｂｂ，因為一個星期後就係ｂｂ生日喇，例牌買左好多餅仔，仲有一ｄ小食同兩舊玩具，番到去即刻比舊玩具ｂｂ玩，朱古力表現得最踴躍，佢最鍾意就係玩有ｂｅｂｅ聲既玩具喇，會不停咁咬都佢係咁響，好似玩樂器咁∼
今晚矇豬曳曳，比媽咪投訴，因為佢跳左入梳化到呀，己經欄晒膠板架，佢都跳得到入去既，不過係有入冇出，因為佢搵唔到就腳位跳番出黎，係個圍晒膠板既梳化入面四圍騰搵出口，應該話佢醒丫，定蠢好呢？
１１／０８／０４（三）

＊到我喇…＊
阿仔既大脾粒粒，之前退咁ｄ但又再起過，今日再睇呢，咦∼散得八八九九喇，只係有ｄ印咁係到，但點知呢，就到ｍｏｕｓｓｅ喇…見佢成個大脾都好似阿仔咁起晒粒粒，心口都有少少，天呀！！搞乜鬼ｄ皮膚咁差架，係咪因為天氣太熱呢？因為佢成日都會舔，所以迫於無耐又同佢戴住個罩喇，星期日就要去彭彭開生日會喇，希望快ｄ好番啦！
１２／０８／０４（四）

＊聽日開生日會呀＊
今日好忙碌，因為聽日同ｂｂ去彭彭公園開生日會，所以今日要教琴啦，同ｍｏｕｓｓｅ、朱古力兩姐弟剪毛毛，不過因為時間關係，所以都冇修到手筒腳筒咁，跟住呢就去左吉豬島食晚飯，買士多啤利整狗蛋糕，又買左薄荷葉比兩兔食，不過佢地完全唔比面…夜晚番到黎，就到糕公同蛋糕剪毛，咁我就開始焗蛋糕喇，今次試下先打起個蛋白，之後先打蛋黃，原來係唔得既，個蛋白出晒水，結果救其咁將ｄ野撈野就算，拿拿臨放入焗爐焗，諗住個蛋糕實焗唔成，咁水，丫∼點知都ｏｋ喎，都夠鬆同幾香，沙律都成日企係櫈到望到實，睇下有冇得食，而蛋糕點佈置呢，都諗好啦，唔…都幾靚架^^
１４／０８／０４（六）

＊ｂｂ兩歲彭彭生日會＊
今日番完琴行，又去左買禮物比ｂｂ喇，買野比佢地，似乎我仲興奮過佢地咁，買左個毛毛欖球玩具，內藏一隻可以錄音既蛋蛋，按個制講完一大輪“ｂｂ乖呀ｂｂ呀唷唷唷乖乖呀ｂｂ……”咁當個波波有碰撞時，就會播番段ｍｅｓｓａｇｅ出黎，ｂｂ好似好鍾意玩咁，阿仔成日咬住周圍走，好好玩呀！
等到糕公黎到，就出發去彭彭公園喇，朝早都見個天陰陰地，點知出門口時就鬼咁好太陽，熱屎狗呀！去到彭彭，ｃｒｅａｍｃｒｅａｍ都到左喇，不過一到步就落左陣過雲雨，不過好彩都係落左１０分鐘到，停左雨就拿拿林行入彭彭搵個地方落腳同佢地跑草喇，跑呀跑，雖然都幾熱，但ｂｂ佢地都好肯跑，不過佢地衰衰呀，４隻夾埋蝦阿ｃｒｅａｍｃｒｅａｍ一個，正衰豬，嚇到狗地心肝仔卜卜跳！

開頭以為係激動派ｍｏｕｓｓｅ帶頭啦，點知後尾發覺原來蛋糕都唔弱，今日都好激動下，唔知係咪因為平日比家姐蝦得多呢？所以要發圍？後尾玩玩下，有隻狼狗路過，佢地四隻野竟然唔怕屎去撩事鬥非，走去吠大隻過佢地好多既狼狗，狗多勢眾，隻狼狗都比佢地吠到有少少退後咁，見佢地玩得咁開心，我都好開心∼

到６點到，實嬌哥哥就開始清場喇，原來６點３就鎖閘清場既，好似有ｄ唔夠喉咁添，不過唔緊要啦，下次再玩過！

雖然今日唔係玩左好耐，不過都有ｄ散晒既感覺，佢地番到屋企都即刻訓覺豬，連我地食ｐ沙佢地都唔走埋黎，難得可以安安靜靜地食一餐呢∼
１５／０８／０４（日）

＊夏威夷ｔ裇＊
開始番左一個星期工，忙到嘔屎…夜晚番到屋企都己經成９點幾１０點喇，都冇咩時間同阿狗阿兔玩，番到黎食完飯ｈｅｉ一ｈｅｉ，就執屎執籠沖涼訓覺，菜都唔得閒去買，搞到阿兔都冇幾日冇菜食喇…唯有拜託媽咪幫手照顧佢地，加草加糧買菜掃地執屎咁，所以而家開始可能日記唔會寫得咁密，因為我都唔知佢地發生咩事…本來想裝個ｗｅｂｃａｍ等可以係公司都見到佢地，點知公司冇得上網，真係老土…唉！慘呀！唯有貼晒佢地ｄ相係ｐａｒｔｉｔｉｏｎ到以解相思之苦啦∼ｂｂ∼要乖呀！

今日夜晚要教琴，即係教ｍｉｋｏ個主人，佢買左三件衫仔黎送比ｂｂ做生日禮物，連做媽媽既沙律都有份，好鬼靚好鬼型仔呀，著去沙灘玩就岩晒，超搶鏡！多謝晒靚靚ｍｉｋｏ媽呀！
１９／０８／０４（四）

＊型仔超＊
小表妹去完日本旅行番黎，除左我同媽咪有手信之外，ｂｂ都有份呀，除左相入面見到既，仲有包小餅餅添，而相入面既大陽眼鏡，係專比狗狗戴架，１００％防ｕｖ，勁哩！成２百蚊港紙，我諗我自己都唔捨得買呀，多謝小表妹^^，遲ｄ街街同ｂｂ戴左再影相上黎比大家睇∼

今晚好夜先放工，番到黎超累，兔籠都冇執就撻落床訓覺豬，好彩媽咪幫我手搞掂，不過大頭蝦既我，岩岩先發矇Ｃ開始斷草喇，第一剪己經清晒我都唔知，淨番ｄ第二剪添密肥，同小小ｏａｔｈａｙ，死喇死喇，要快ｄ　呵打番ｄ草草先得！
２０／０８／０４（五）

＊我忍呀！＊
今日由一大清早開始就落大雨，一直落一直落，雖然間中都有停過下雨，不過因為地下濕滑，所以都冇拖ｍｏｕｓｓｅ出街街尿尿，點知佢就一直忍，由ｙｔｄ晚痾完之後一直忍到今日５點都唔去，結果都係由媽咪快快手襯雨停時拖佢出去方便方便，然後拿拿林番黎抹手抹腳，唔係既話都唔知佢會忍到幾時∼
２１／０８／０４（六）

＊費事啋你呀！＊
夜晚放矇Ｃ時，唔知係咪因為呢個星期都冇乜點同佢地玩，放左佢地執屎加糧加草就算，所以唔開心呢？開左矇豬個籠，但佢一舊飯咁係個籠入面唔出黎，好啦，去放ＣＣ先啦，點知佢都係唔理我，扒係籠入面唔出黎，嗚∼∼佢地唔啋我呀！

仲有，聽日都係要去買草啦，因為連ｄ　ｏａｔｈａｙ呀２ｎｄ　ｃｕｔ呀之類都差唔多清晒，呵打左既草又未送到黎，會唔會係因為冇靚草食，所以佢地唔啋我呢？
２２／０８／０４（日）

＊驚驚呀！＊
今日叫做比較早放工，９點未夠就番到屋企喇，晏晝託媽咪幫我買左包添密肥，番到黎即刻同兩兔加番ｄ兔兔，摸摸頭傾兩句計，雖然都係唔多啋我…

聽番媽咪講，原來今日晏晝行雷呀，嚇到ｂｂ佢地哩晒去床下底呀陰功，如果我係屋企就可以攬實佢地，等佢地唔洗咁驚喇，好彩唔係行好左耐渣，不過之後媽咪話佢地做左跟尾狗，跟出跟入貼到實，驚死賣甩佢地咁款∼
２３／０８／０４（一）

＊奧運選手＊
夜晚同兔兔執籠，呢排執籠時電視到做緊奧運，唔知係咪兔地成日睇，都想表演一下身手呢？拎走左矇豬個籠頂之後，佢就係企係個底盤到，一跳，就好輕盈咁跳左上個狗籠頂到，不過因為我執緊籠，所以開左個籠頂黎拎ｄ墊料咁，所以矇豬就跌左入去喇…本來諗住抱佢出黎救佢既，點知佢係凹凸不平既籠入面，一跳都跳到番出黎喎，真係叻叻呢∼
２４／０８／０４（二）

＊驚驚呀！＊
今日放工，糕公帶埋蛋糕豬黎接我一齊番屋企玩，之後ｍｉｋｏ媽媽黎學琴，又帶埋黎ｍｉｋｏ黎玩，屋企一時間有５隻狗狗好熱鬧哦，咁岩ｍｉｋｏ入屋企ｍｏｕｓｓｅ訓緊覺豬，唔知係咪訓醒時ｍｉｋｏ而經係到，所以佢今次冇好激動咁吠狗撲狗，好乖哦！而蛋糕同ｍｉｋｏ都係客人，所以好似特別岩玩，成晚撲黎撲去咁，不過佢地玩得好斯文，一糕聲都唔出，唔似得沙律佢地成日玩到ｗｅｌｉｗｕｌｕ粗粗佬佬咁，見到呢兩位小朋友玩得咁開心，我地呢ｄ大朋友都好開心呢∼
仲有，原來媽咪今日帶左朱古力去睇醫生呀，佢話阿仔尋晚半夜開始係咁周身“ｒ”，成晚冇訓過，佢叫過我，但我又訓到不醒人士咁…唔怪得我今朝見阿仔戴住個罩啦，媽咪話阿仔“ｒ”到成身一撻撻腫晒，見佢好辛苦，又唔係幾肯食野，只係不停咁“ｒ”，所以就帶左佢去睇，醫生話係急性皮膚敏感，懷疑係食錯野（？），不過好似冇比過咩特別野阿仔食喎…都唔知搞邊科，不過夜晚我番到黎，都退左好多喇，都冇乜見佢再成日“ｒ”喇∼
２７／０８／０４（五）

＊咩天氣來架… ＊
今日既天氣仲係好差，成日落雨落個不停，教完琴之後，就去左訓晏訓，就係我訓到不醒人士既時候，個天又行雷喇，聽媽咪訓，沙律同ｍｏｕｓｓｅ嚇到即係走上床，一隻訓左係我左邊，一隻訓左係我右邊，阿仔霸唔到個好位呢，就哩左係餐檯櫈底，呆呆下震震下咁，大隻雷雷咁鬼細膽既∼仲有，食左一日葯，阿仔ｄ皮膚好番ｄ喇，見佢都冇咁係咁“ｒ”，唔知係咪隻梳甩高羊飯唔係咁適合佢呢？好似開始左溝呢隻糧比佢，ｄ皮膚就ｋｅｅｐ住有問題咁…
２９／０８／０４（日）

＊執籠籠嘔…＊

平時多數都係夜晚１１點零１２點到就去放阿兔，同佢地抹籠執屎執尿，但呢排要番工，咁樣搞一搞執一執出一出汗再洗個白白，晚晚搞到成點幾兩點先訓，第二朝起身番工眼訓到屎…

所以今晚決定改變策略，番屋企食完飯，就執左兔仔籠先，因為ＣＣ間屋係兩個籠拍住既，所以佢係Ａ籠時，我就執Ｂ籠，跟住趕佢入去Ｂ籠呢，就執Ａ籠喇，雖然夜晚我太攰，媽咪都會幫我手搞掂佢地個籠，但就唔會走去抹ｄ屎尿漬，所以都係自己執乾淨ｄ，不過執籠途中，兩隻兔就以為夠鐘出黎玩，係咁咬籠要出黎，麻麻煩煩咁…

搞掂ＣＣ個籠，就到矇豬啦，拎起佢個籠頂，然後引佢出個底盤，再用個籠頂困番住佢，之後就可以輕輕鬆鬆咁執個底盤喇，係換廁所ｄ墊料時麻煩ｄ，因為要打開個籠頂，咁呢隻奀皮矇就會周圍搵位想跳出黎玩．阿狗見到又會唔高興走去吠佢…

雖然咁樣執法比平時用多左時間，但起碼早ｄ搞掂沖個涼可以早ｄ休息，都好既∼

夜晚，ｍｏｕｓｓｅ唔肯食糧，撈左紅蘿蔔都唔食，原來係唔舒服呀，嘔左少少黃黃地色既液體同泡出黎，好彩都好精神冇咩大礙∼
３１／０８／０４（二）

:: ｎｅｘｔ ::