＊餓屎我地啦！！＊
今日又係放工番到黎，先執左兔仔籠先，費事搞到夜麻麻先黎執，又要夜麻麻先有得訓，不過今日比較失策，因為夜晚唔洗執籠，又托媽咪同我放兔，所以早早地就去左訓，我…竟然…唔記得左餵兔呀，到第二朝番左工先醒起，拿拿林打番屋企，叫媽咪朝左個餐重手ｄ，比多少少糧佢地，陰功囉，餓左成晚，都係阿媽我唔好啦…粗心大意…
（２／９日後補）
０１／０ ９／０４（三）

＊腸胃炎＊
先兩日先擔心完阿仔既皮膚，今日又到ｍｏｕｓｓｅ啦，其實前晚己經開始嘔，同冇乜點食野，尋日朝媽咪話佢都冇食飯，到夜晚我番黎，佢都唔食，要我用手餵先食，不過冇幾耐就嘔番晒出黎，到火夜５、６點又再嘔，之後我番左工之後都好似有繼續嘔，所以媽咪就帶左佢去睇醫生，醫生話係腸胃炎，打左三支針，開左兩隻葯，一隻胃葯一日食三次，另一隻消炎葯就一日兩次，夜晚放工番工屋企，見ｍｏｕｓｓｅ張床仔入面同前面都有嘔吐物…夜晚開專ｆｏｒ腸胃既罐頭比佢都唔肯食……擔心屎人喇…肚仔都ｌｉｐ晒啦陰功！餵佢食葯時，仲要一餵完一分鐘都唔洗就連埋ｄ黃色液體嘔埋出黎，睇見心到痛…希望佢快ｄ好番，唔好要我擔心啦∼
０２／０９／０４（四）

＊好番ｄ喇失暈兔媽＊
今日放工同埋糕公一齊番左屋企睇ｍｏｕｓｓｅ，雖然同平時比都係差少少，但精神都算唔錯啦，都叫有ｄ胃口食野，係憨居居左少少，成日走去訓覺，但冇嘔番ｄ葯出黎都好好喇∼

唔知係咪擔心個女所以有ｄ失暈（同自己搵藉口），今次夜晚執完兔仔籠之後，我竟然兩個兔籠都閂埋左，唔記得放佢地出黎呀∼∼難後第二日放假可以放佢地耐ｄ架麻，噢∼∼
０３／０ ９／０４（五）

＊龍蝦灣暢泳＊
好早之前己經同ｍｅｋｏ媽約一齊帶莎莎去游水，ｍｅｋｏ同ｍｏｕｓｓｅ都未游過，沙律就驚水既所以冇佢份，朱古力肯游但唔太鐘意，不過佢咁肥仔其實游水減肥對佢黎講比較好，ｄ關節冇咁受力，蛋糕呢，就肯自己走落水游既，所以本身諗住帶蛋糕同ｍｏｕｓｓｅ去玩，但點知呢兩日ｍｏｕｓｓｅ唔舒服，所以最終都係帶左阿仔去，好耐之前買既車車水泡終放開齋喇！

到埗後，三隻莎ｍｅｋｏ最叻，自己走落水，唔洗點教就識游喇，朱古力開頭都唔多識游，要托一托佢個屁屁先識，仲要一時時識，而蛋糕呢，雖然肯自己游，但就游到好鬼多水花，最衰個灘比較多石，唔係就可以同佢地跑下沙喇∼

希望呢個夏天可以去多一次，可以帶ｍｏｕｓｓｅ去，如果佢鐘意游，咁蛋糕就有個伴喇∼
０５／０９／０４（日）

＊識入唔識出…＊
今日同兔兔執籠，拎左個籠頂出黎時，ｍｏｕｓｓｅ就伸個頭入去執野食，之後仲行埋入去食兔糧添，真係比佢激屎，都唔睇下自己有幾大份先走入去既，結果入左去之後又唔係幾轉到身，走唔番出黎，冇啦啦困左自己係入面…睇見佢都想笑呀^O^
０６／０ ９／０４（一）

＊咬呀咬∼爽呀！＊
每朝起身，都係趕頭趕命咁預備出門口，仲要同阿兔掃一掃屎抹一抹尿，加番ｄ草同交換困籠放出黎玩，點知今朝一出廳，簡直打左個突，尋晚媽咪幫我執兔仔籠，跟住袋垃圾呢，就放左係矇豬個籠頂，而今朝，就見到個膠袋己經咬爛左，矇豬個二樓就有ｄ污糟木糠墊料咁…好啦，諗住同佢拎走袋垃圾先，點知一抽，屎喇…原來整個底都比矇豬咬爛左，一抽ｄ垃圾就跌晒入個籠到，兔屎，沾左兔尿既墊料，仲有…沾左狗尿既執紙碎、紙巾，通通都跌左入矇豬個籠到…真係比佢激屎，佢就咬得過癮喇，難委我係咁趕急既朝早做到隻食咁，ｌｅｉ咁ｈｅｉ呀！
０８／０９／０４（三）

＊搞到你賴尿∼呵！＊
今朝番左工之後，媽咪起身困阿兔拖地掃地時，阿仔起身要出廳屎尿，好啦放佢出黎，點知佢就周圍騰搞搞震唔肯痾，好喇，佢唔痾就放沙律出黎去廁所啦，點知呢個衰仔一見阿媽要去廁所，就即刻企上個廁所到尿尿，霸住晒，搞到沙律等唔切，係個廁所側邊賴左尿，你話邊有咁衰架，早早放佢出黎又唔去，係要等到阿媽急要去先同阿媽爭，搞到沙律痾完仲兩隻耳仔豎晒去後邊，驚會比我地鬧添，正一衰仔黎呀！
０９／０ ９／０４（四）

＊繼續神經質好好訓架呢∼＊
ＣＣ神經質，我都見慣架喇，行步路跨張ｄ都嚇親佢既，點知，原來佢都鐘意自己嚇自己既，夜晚同佢執籠時，佢係我身邊團團轉，周圍八掛一下，點知八八下自己跣腳，又踼到個狗廁所，自己嚇自己咁一支箭標番去個籠兜到，仲要一臉怒氣咁好似有人想捉佢咁，都唔知搞邊科∼

阿仔呢，越黎越識嘆喇，夜晚訓覺時，一擘大眼就見到佢訓左係我枕頭簡黎，再托左個頭係床頭既架到，再訓訓下呢，就ｆｅｅｌ到有野踩埋我塊面到喇，睇一睇，原來係阿仔唔知係伸懶腰定咩，伸直晒ｄ手腳，完全唔理我既感受就撐落我塊面同心口到，離晒大譜呀！
１１／０９／０４（六）

＊新飯飯呀！＊
朱古力：
婆婆話我皮膚唔好，轉左食梳甩高都冇咩大改善，先排又全身起晒一撻撻咁，所以又同我轉糧喇，本來想同我轉老豆食緊既ｃａｎｉｄａｅ既，點知去到舖頭到竟然斷左貨喎，所以就買左另一隻貴糧叻糟巴能屎既黃頂喇，一開始婆婆都想同我轉呢隻糧架，不過佢話好貴喎，車∼貴咩丫，計我話，食得我皮膚好咩都抵架啦，有事時去睇醫生咪仲貴，呵！隻新糧既味道係薯隻鴨黎，好香架，終於唔洗食ｄ淡到屎既薯仔魚減肥糧喇，好野！！汪∼
１２／０ ９／０４（日）

＊係咪唔岩我食呀…＊
尋晚開始同阿仔轉糧，撈左ｄ薯仔魚比佢食，唔知係咪唔岩佢食定咩呢，半夜時比佢嘈醒左，發覺佢係咁“ｒ”痕，“ｒ”到成張床都震晒，要攬住佢唔比佢抓先好ｄ，係咪隻糧唔岩佢食呢？嚇到我今日即刻唔敢比佢食，阿媽話人皮膚有事有傷口唔好食鴨，毒喎，但人地隻糧係轉ｆｏｒ皮膚敏感既狗狗，又聽好多網友講皮膚有事食左呢隻糧之後都好左好多，唔知呢？諗住過幾日睇下佢情況點先再試下同佢轉，仔呀仔，生性ｄ啦好冇？
１３／０９／０４（一）

＊抓呀抓好過癮呀！＊
尋晚阿仔半夜係到“ｒ”痕嘈鬼醒我，己經訓得唔係幾好喇，點知今晚就到衰矇豬，半夜唔知做乜發晒癲咁狂咬紙皮，係真係瘋狂咬個隻，不停抓不停撕ｄ紙皮，係好眼訓熟睡既情況下都比佢呢ｄ聲嘈得醒，可想而知係幾咁嘈，呢個情況都維持左…我諗有１５－２０分鐘，佢先肯收口，起身時，成地紙碎，要我掃餐慒先番得工，哼！
１４／０ ９／０４（二）

＊嚇屎媽媽∼哇哈哈！＊
今日帶左ｍｏｕｓｓｅ同沙律去寵物店到洗白白，同佢地出門口時，聽到阿仔係到嗚嗚聲喊，鬼咁淒涼，到晏ｄ去接番沙ｍｏｕ時，就帶埋阿仔去，佢都好乖全程肯自己行，不過去到寵物店門口就唔肯入去喇，接左ｍｏｕｓｓｅ同沙律之後，就放低左佢比寵物店沖涼剪毛，望住我接走家姐同媽媽，個樣好似好可憐咁，唔知會唔會以為我唔要佢地呢？

過左陣，就去接阿仔喇，寵物店哥哥話三隻裡面阿仔最乖呀！不過沙律同ｍｏｕｓｓｅ都乖，同佢地拔耳毛都冇出過聲，真好喇，好少可有得比人讚架，仲有，係寵物店到買左隻葯用沖涼液，希望對阿仔既皮膚有幫助啦∼

丫∼仲有ｄ阿仔衰野要寫低，今朝媽咪起身放佢地出去廳屎尿時，阿仔幾衰呀，又襯沙律係廁所尿尿緊時走上去，“ｂｅｌｌ”走沙律，搞到佢痾痾下嚇到即刻停左，之後就係到震添，衰仔黎呀！成日都係咁，咁鬼鐘意同媽媽爭廁所既∼
１６／０９／０４（四）

＊我ｄ毛毛呀！！＊
今日同左沙律剪毛，因為之前ｄ毛毛成日打結，去沖涼時比哥哥剷走左ｄ毛毛，所以手手腳腳ｄ毛毛唔多齊整，所以今次索性同佢全身連手手腳腳都剷短晒，等佢再生過ｄ靚毛毛，不過佢就唔多合作，一剷到手手腳腳呢ｄ位就係咁縮，想反轉佢剷心口呀，鬼祟位時又係咁掙扎，曳到屎，結果剷完之後佢好似有ｄ唔開心，扁晒咀咁呀∼
１８／０ ９／０４（六）
　
＊又試轉糧喇∼＊
抖左幾日，尋晚個餐又試下比阿仔轉食叻糟巴能屎，今日見佢都冇話有咩問題，特別抓得犀利左，又或者出多左粒粒，所以今日都繼續兩溝比佢黎轉，希望轉糧成功，仲有可以改善到佢皮膚既問題啦∼
１９／０９／０４（日）

＊踩屎…＊
呢幾日同ＣＣ執籠時，發覺有ｄ唔對路，個屁屁有一股特別氣味，再望望，發覺佢左腳內側近住屁屁既位置痴住一餅屎…嘗試同佢整走去，但又唔成功，我都未掂到舊屎餅，ＣＣ己經一支箭咁走左去喇，一路跑舊屎餅一路“ｆｉｎｇｆｉｎｇ”下，後尾見佢烏個頭埋去腳仔到，以為佢會同自己清潔一下啦，點知…睇黎都係要等我出馬架喇∼
２１／０ ９／０４（二）

＊嚇屎我喇！＊
朱古力每朝早都要出廳屎尿既，今朝出去時呢，咁岩矇豬走左入個紙皮盒到發緊癲，佢一抓，連兔帶盒都係到郁，嚇到路過既阿仔屎，即係“ｄｕｐ”晒尾走都走唔切，之後又驚驚青青咁走埋去紙皮盒到望，點知矇豬一抓，佢又嚇到佢即刻哩埋，後尾矇豬走左出黎，佢都好似仲有ｄ驚矇豬咁添，我家呢隻兔真厲害哦！
２２／０９／０４（三）

＊其實我好細膽架…＊
今日ｍｉｋｏ又黎左玩呀，照例ｍｏｕｓｓｅ係最激動既一個，不過玩左一陣，ｍｏｕｓｓｅ都好以冇乜野ｌｕ，而ｍｉｋｏ呢，開始都唔驚喇，會周圍跑下八掛呀，仲會撩沙律佢地玩添，不過我地三隻佢一隻，好似有ｄ唔公平，所以我就困起左沙律同朱古力，得番ｍｏｕｓｓｅ同佢玩，點知…ｍｏｕｓｓｅ竟然驚呀，ｍｉｋｏ追住佢玩，佢竟然走喎，估唔到冇左媽媽同細佬係到，佢會咁驚青呀，平時佢最驚大夾惡架麻，之後放番媽媽細佬出黎，佢都冇再好似之前咁係威係勢喇，冇鬼用呢∼
２４／０ ９／０４（五）

＊打針針＊
沙律：
每年過左生日冇耐，就要去見獸醫叔叔喇，打咩防疫針喎，今日媽媽同婆婆就帶左我去打，行到一半路我都知咩事啦，又見婆婆推住架車車，所以我死都唔肯，等婆婆推車車載我，去到獸醫到，我以為去過咁多次應該唔驚架啦，點知都係忍唔住震震震…仲有，叔叔話我用左２磅，摸唔到肋骨，要減肥，仲叫媽媽減我零食添呀…慘…汪∼
２５／０９／０４（六）

＊你幫我整啦…＊
ＣＣ腳到舊屎餅，過左幾日，仲係原封不動咁吊住係隻腳隻到…好似冇咩意識想整甩佢咁，乜跑步時唔會覺得有野吊住唔自在架咩？點解可以有兔仔咁污糟架？？唉…結果，都係要我出馬，同佢剪左舊屎餅，不過就仲未同佢個屁屁沖水，咦∼好臭臭呀！！
２６／０ ９／０４（日）

＊打攪晒呀∼＊
因為糕公聽日起程去旅行，所以今日就帶左蛋糕黎，諗住係到住幾日，雖然只係多左一隻汪汪，但屋企好似都突然間好熱鬧咁，仲有，糕公同左蛋糕剪毛毛，不過一路剪又話落唔到手，因為我地打算將佢ｄ毛毛剃晒，好似沙律咁，所以最後都係要我出手，同佢剃手手腳腳ｄ毛，剪完成個清爽晒，等遲ｄ生番晒ｄ毛毛就好靚架啦∼
２９／０９／０４（三）

＊掛住屋企呀∼＊
尋晚成晚都冇覺好訓，因為蛋糕唔知係咪掛住屋企，同未習慣係呢到訓，所以成日係到喊，鶯鶯叫，行黎行去，好似好鬼陰功咁，搞到我都訓唔到，比佢鶯晒，鶯到個心都實晒，朝早一起身番工，佢就跟到實一實，希望今晚佢唔會再係咁，訓得安心ｄ啦，唔係我就慘囉．．．
３０／０ ９／０４（四）

:: ｎｅｘｔ ::