●●
●●
餅餅好好味呀！　 ●　●　●　●　●
１２０２
(四)
上個禮拜，朋友仔拎左包ｓａａ既兔兔餅餅黎，ＣＣ一聞到就發晒癲咁，係咁搶黎食，矇豬都鍾意食，不過冇ＣＣ咁瘋狂，我自己試過，塊餅餅就硬到咬都咬唔到，不過佢地就食到卜卜聲，ＣＣ仲唔洗５分鐘，卜卜聲咁食完添，好厲害呀，不愧為食物焚化爐呀！


●●
●●
船灣淡水湖　●　●　●　●　●
１２０４
(六)

沙律：
雖然我由細到大都係住係大埔，ｂｂ仲係大埔出世架添，不過我地從來都未去過大尾督，講起上黎都認真失禮呀！所以我地今日呢，一家三口就入左大尾督玩喇，本來諗住行家樂徑既，不過後尾就改左行呢個水霸，沿住船灣淡水湖行∼

星期六大尾督好多人同車，所以我地冇得放繩自由行，只可以拖住慢吞吞既媽媽同老豆行，沿途都好大風，吹到我ｄ毛毛亂晒，因為多車，所以我地行行就跳上去石壆行，遇到有人坐左係到就跳番落地，雖然只係大直路一條，不過咁樣跳黎跳去，都好費力架，所以行行我就扭抱喇，扭要抖一下食幾啖麵包咁喇，呵呵∼

行完之後，我地就去左食泰國菜，不過我地冇份，只可以望住媽媽食，所以我咪發皮四吠囉，雖然分唔到ｄ金針粉、蝦餅，不過都有ｄ麵包食下，好過冇啦∼


●●
●●
我比狗圍呀！　 ●　●　●　●　●
１２０５
(日)
矇豬：
星期日，媽媽係屋企呢，我地就可以自由ｄ周圍走，入媽媽房啦，入琴房啦，都冇人鬧，廚房仲我係小天地黎添，最鍾意入去玩架喇，機關重重咁，今次我選擇左走入去玩紙皮箱，玩下垃圾剷咁，點知比ｄ汪汪發現左，望到我實一實添，比狗望住，玩都玩得冇咁痛快呀，周身唔自在∼咇∼


●●
●●
幫我開個廁所蓋丫唔該∼　●　●　●　●　●
１２０６
(一)

夜晚執屎時，無啦啦聽到ｄ框框聲，望一望，原來ｍｏｕｓｓｅ係到歧途打開矇豬公廁個鐵蓋，因為我用夾夾實左，所以佢只可以咬開到少少，跟住就“啪”番埋，呢隻為食豬想打開個蓋食入面ｄ兔仔屎，真係激屎，見打唔開，就用隻手仔係上面掘，又用個頭係廁所底到頂，但係ｄ屎屎都係一粒都冇跌出黎，笑屎XD


●●
●●
我搵到你喇！　 ●　●　●　●　●
１２０７
(二)
一到夜晚例牌執籠時間，就即係三隻狗巡視有冇兔仔屎執黎食既時間，當三隻汪汪周圍巡既時候，當ｍｏｕｓｓｅ一望見ＣＣ個籠吉左，入面冇兔兔，但又唔係搬左出黎搞清潔，即係好似愕左一愕咁，然後就四周維搵佢，房、廚房、廁所，最後係茶機底搵到，跟住就乖乖地扒係前面“目及”實佢喇，之後又再望望我擺晒尾咁，好似話我知佢發現ＣＣ偷走左出黎，又己經好叻咁搵到佢哩埋左係到咁，唔∼好叻叻喎！


●●
●●
我同自己清潔呀∼　新咕咕　●　●　●　●　●
１２０８
(三)
ＣＣ一向都係污糟兔黎，唔會自己清潔，不過今晚同佢執籠時，竟然見到有排污糟毛係個籠到，應該係佢自己清潔時咬落黎既，哇∼個一刻真係好感動呀，佢終於肯自己做清潔喇，真係乖乖兔呀，抵鍚 *v*
今日經過萬寧，認唔住買左呢隻狗狗ｃｕｓｈｉｏｎ，好軟林林好舒服架，比汪汪當枕頭仔訓覺就最岩喇，而佢地都似乎好鍾意呢個咕咕，一見到就搶，咬住咁起勢ｆｉｎｇ∼

狗狗們玩咕咕　－＞　ｃｌｉｃｋ


●●
●●
我又想要衫衫呀…　 ●　●　●　●　●
１２０９
(四)
今日去左銅鑼灣既“狗一生”，上次經過己經想買ｄ衫仔，不過時間緊迫，又唔知沙律佢地應該著咩ｓｉｚｅ，所以冇買到，今次就度晒佢地尺寸去買，實冇屎，就咁睇ｄ尺寸，朱古力應該要著３Ｌ，不過２Ｌ只要＄１４０，但３Ｌ就要＄２１０喇，最幣係呢個尺寸去到最大金毛都岩既尺寸都係＄２１０，搞到好似好唔抵咁，所以就買左２Ｌ搏一搏，就算唔岩都有沙律執手尾丫，結果番到屋企穿上身，頸同胸都剛剛好，不過就唔夠長，短左ｄ…所以都係比沙律喇，不過就有少少鬆，而叻一件就買左條Ｌ既蘚格蘭裙仔，ｍｏｕｓｓｅ岩岩好，好ｆｉｔ，沙律就有少少窄，咁即係媽媽同家姐都冇，不過朱古力就冇份喇…
唔…點算好呢？師奶仔既我始終覺得好唔抵麻，岩最貴價錢入面最細既ｓｉｚｅ，同價錢最大既可以做得兩件喇，仔呀仔，好冇買比你呀？你咁肥仔真係好難買衫呀∼
丫∼仲有，今日仲買左條新狗帶添喎∼


●●
●●
我係陪訓狗　●　●　●　●　●
１２１０~
１１
(五~
六)
 尋晚隔硬係床仔拉左沙律上黎陪我訓，唔知由幾時開始，沙律大個女唔鍾意同我一齊訓，要自己訓床仔，唔知係咪有個女陪住訓，訓得特別好呢，尋日訓到過晒鐘，完全聽唔到鬧鐘響，８點要出門口，訓到７點９先突然扎醒…

今晚呢，又捉左個女上黎陪我訓，結果我由夜晚９點唔夠開始訓，昏迷１８小時，訓到第二日２點先起身，呼∼攬住沙律真係好好訓呀∼


●●
●●
點解Ｄ糧放晒係地下既？　 ●　●　●　●　●
１２１１
(六)
同ＣＣ執籠，一見到裝兔糧個密實盒就會發晒癲，己經有幾次比係餵糧途中比佢推／掉／咬／頂跌個盒倒瀉晒ｄ糧既紀錄，所以我都變得醒目，唔會將個盒放係地，跟住再“不”ｄ糧比佢食，不過今晚就比較失策喇，放左係個籠頂，跟住我又拎起個龍黎抹個底，結果…倒瀉晒…我又冇理由執番黎放係個盒到，掉左佢又好似好浪費咁，結果師奶仔由佢係地下，等為食Ｃ去執黎食，還掂都要餵佢架啦，放係地下一樣者，可∼


●●
●●
洗呀洗刷呀刷∼　●　●　●　●　●
１２
１２
(日)
 星期日唔去街街，就係做狗奴兔奴既日子喇，今日又黎個大清洗，雖然每日執ＣＣ個籠都有同佢抹塊格仔板，但因為呢隻衰豬比較污糟，所以即使每日抹，一二個星期後都漬晒Ｄ尿漬係到，要用剷刮先搞得掂，今次又要動用到個督雞翼督督黎刮Ｄ隙既尿漬，先叫乾淨Ｄ，唉…有咩方洗可以容易Ｄ清潔Ｄ鬼祟隙尿漬呢？


●●
●●
層層疊屎屎　 ●　●　●　●　●
１２１３
(一)
尋日同ＣＣ洗格仔板時，本來想同佢洗埋屁屁，因為真係好臭臭，不過時間關係所以冇同佢洗到，留番今日先，放到番到屋企食完飯，拎齊晒濕毛巾、梳、較剪就捉佢上餐檯搞清潔，一望佢個屁屁，當堂呆左，雖然聞都佢屁屁臭，但冇諗過可以污漕成咁，成個屁屁都係黑色既層層疊乾透軟便＠﹏＠，想成舊同佢剪左又唔到，因為貼住左Ｄ毛毛同肉，一大舊咁睇唔清楚驚整到佢，用濕布抹又抹唔甩，結果要徒手一層層“搣”開佢，“搣”最最底個層就少少咁剪左佢，跟住再去用水沖屁屁…

入到廁所開水，污漕Ｃ就係咁出飛腿踢水花，搞到我都未同佢沖就成身濕晒喇，之後一路沖唔知搞乜鬼就一路放屎彈，又學矇豬扮貓咁向上跳，以為一條幼幼既水管就可以比佢企上去，儍儍地既∼不過後尾佢都醒目喇，望一望我肥美既大脾，就豪不客氣咁跳左上黎，抓到實一實，屎都唔落番地喇，見到叫沖乾淨左Ｄ，所以算啦，快快手同佢吹乾屁屁手仔腳仔Ｄ毛，我一路吹佢就一路周身舔，搞完一大輪，雖然乾淨左好多，但同家姐個雪白屁屁想比，就好似……唉…


●●
●●
睇下我幾乾淨　　●　●　●　●　●
１２
１４
(二)
矇豬：
都唔明點解阿妹個屁屁咁污漕既，一Ｄ都唔似我呢個家姐，睇下我腳仔同屁屁幾乾淨，從來都唔洗阿媽操心呀，幾叻∼咇∼


●●
●●
乾淨晒∼　　 ●　●　●　●　●
１２１６
(四)
之前係籠物店買左套票，３百蚊一個月內黎個小美容四次，洗白白、剪甲、拔耳毛、剪腳底毛咁，今日媽咪同我帶左沙律同ｍｏｕｓｓｅ去，又比哥哥話喇…

“哇∼你隻狗耳仔毛好長呀，平時有冇同佢拔架，要成日拔先得架，好污糟呀，仲有呀，ｄ指甲好長呀，要同佢地剪密ｄ呀，咁長唔得架，仲有呀………”

次次去親都比哥哥話佢地耳毛長指甲長咁，嘿，我自己搞到得到就唔洗比錢你同佢整啦，嫌錢多咩，都係沙律啦，唔肯比我拔耳仔毛同指甲，搞到次次出去寵物店都比人話，真係丫，好彩媽咪帶佢地去啫 =P


●●
●●
我好有性格架！　　●　●　●　●　●
１２
１７
(五)
 今日ｍｉｋｏ又黎左玩，其實都差唔多個個星期都見咁濟，但三隻ｂ見到朋友仔黎到都仲係好激動，尤其是ｍｏｕｓｓｅ，不過次次同ｍｉｋｏ係到玩雞扒功（扒低前半身抬高屁屁撲撲撲，成隻雞扒仔咁∼）架呢，又都係佢喎，今晚都唔例外啦，不過呢佢就好有性格，玩到咁上下累要訓就訓，啋你都儍，或者見到唔對路，處於下風唔多夠雞扒功黎，都會走去訓覺豬，就算ｍｉｋｏ去撩佢都唔理，好有性格呀！


●●
●●
又有紙皮箱玩喇！　　 ●　●　●　●　●
１２１８
(六)
呢排好忙，都冇咩時間理矇豬，夜晚番到黎洗菜抹籠，餵佢地放出黎玩，跟住我都要去訓覺喇，見今日唔洗番工朝早比較閒，所以整左個紙皮盒比佢地玩，期實都只係將兩個５磅既草紙箱拼埋一齊，不過都未拼好，矇豬己經第一時間走入去搞破壞喇，因為怕佢地會食ｄ膠紙，所以只係咁易貼住四邊等佢唔好分開，個底都冇貼實，只係四邊紙皮一塊疊一塊咁封住左，點知破壞力特強既矇豬，都唔洗十分鐘，就己經頂開左喇…兔仔細細，都唔知點解咁大力既？


●●
●●
彭彭我地黎啦∼　　●　●　●　●　●
１２
１９
(日)
沙律：
數數手指，原來我地有成個月冇去過彭彭跑草喇，唔知彭彭掛唔掛住狗地呢？狗地就好掛喇，因為上次走既時候見到好多狗地朋友仔都係入口附近玩，所以今次我地冇行到好入，係入口附近搵左個地方落腳，哇∼真係有好多朋友仔呀，我諗最少都有三四十隻，金毛啦、富貴狗啦、八哥啦、芝娃娃啦…我地仲好叻添呀，夾埋黎吠ｄ大狗，雖然我地細細粒唔打得，但都叫嚇得下狗，幾有氣勢架，不過唔知點解我地一吠，媽媽就ｎｏ我地，話我地冇禮貌喎…狗地都係大聲左ｄ講野之麻，唔通咁都唔岩咩，都唔明ｄ大人諗乜既∼


●●
●●
咪阻住兔地去路丫！　　 ●　●　●　●　●
１２２１
(二)
朱古力：你企係狗地廁所上面做咩呀？
矇豬：尿尿囉，你咪阻住晒條路啦∼ 		沙律：兔仔矮矮企到咁高做乜呀？
矇豬：兔地地位高，自然要企高ｄ架啦，咪阻住晒啦∼


●●
●●
做冬哇∼　　●　●　●　●　●
１２
２２
(三)
 今日冬至叫做放早左少少，番到黎時就上左百佳買菜菜比兔兔做冬，仲有狗罐頭比ｂｂ同貓罐頭比花花添，大人做冬食得咁豐富，冇理由ｄ小朋友冇得加料加麻，不過我番到屋企時，ｂｂ己經開左飯喇－＿＿－”，唯有夜ｄ當宵夜啦，而阿兔就豐富喇，除左有我買既５蚊兩包菜芯同小棠菜外，仲有樓上拎落黎既唐生菜添，雖然話一日最好食三種唔同菜菜，但對於我呢ｄ屋企唔煮飯上樓上大夥人一齊食既家庭，買兩種菜菜分食２日食都未必會食得晒，所以都唔會買三種咁多，今晚阿兔好健康咁食到三種菜菜，真係好難得呢∼


ＣＣ：
媽媽話做冬要一家人一齊食飯，所以叫我同家姐一齊食菜菜喎，不過我真係好驚家姐呀，所 以要分開兩個兜兜裝住ｄ菜菜，仲要隔開遠ｄ，不過媽媽好奸架，慢慢將兔地兜菜推埋去家姐個邊，想嚇屎兔地咩，不過為左菜菜，我…我……一於睇你唔到，睇你唔到…
丫∼仲有呀，我見媽媽種既小麥草開始長高啦，唔知幾時有得食呢？咇∼


●●
●●
假冒兔地？　ｍｉｋｏ又黎玩喇∼　 ●　●　●　●　●
１２２３
(四)
ＣＣ：因為尋日做冬有好多菜菜食唔晒，所以要分幾餐食，我地今日又有三種菜菜食喇，不過點解係我身邊多左兩隻兔既？仲同我有ｄ似樣添喎，唔通…佢想扮兔地？
唔理喇，等我快快趣食晒ｄ菜菜佢先，唔係一陣比呢兩隻假扮兔地既東東食晒我既就屎喇，努力食食食呀食食食∼∼∼

今日ｍｉｋｏ又黎左玩喇，剪完毛毛特別輕盈呢∼


●●
●●
聖誕快樂丫∼　　●　●　●　●　●
１２
２５
(六)
今日聖誕節，去街街前都不忘買定兩罐火雞梳甩高比狗狗開聖誕大餐，唔係又好似做冬個日咁，買到番黎原來己經開餐完畢，出到去，又去左同佢地入貨喇，雖然屋企仲有好多零食未食完，不過聖誕麻，就當係聖誕禮物啦，而兔兔呢，就係咁易買左包小棠菜比佢地，仲有岩岩柯打左既兩箱草今日亦都送到，好似好豐富咁，雖然係唔係聖誕都會叫，但鬼叫佢地冇咩零食可以食咩∼

夜晚番到黎，上左樓上同花花玩，送左份小小既聖誕禮物比佢，佢好應節呢，著左聖誕老人衫同帽，好靚丫∼


●●
●●
小麥草好味道∼　 ●　●　●　●　●
１２２６
(日)
小麥草有收成喇，今日收割左半盆仔比兩兔分，佢地都好比面一見到就即刻唔停口咁食，不過ＣＣ就食得驚青ｄ，係都要哩係個紙皮箱入面，然後伸個頭仔出黎，每次擔幾條入去食，係咪咁樣食會安全ｄ呢？


●●
●●
冇得打針喇…　　●　●　●　●　●
１２
２７
(一)
 今日本來諗住帶ｂｂ去打一年一度預防針既，蛋糕仲特登入埋黎添，點知打去約時先知今日己經ｆｕｌｌ　ｂｏｏｋｉｎｇ，攝個位打支針都唔冇，哇∼洗唔洗咁旺場咁好生意呀？都唔知應該開心定唔開心喇…結果呢，就約左今個星期六去打，算啦，都係遲幾日者，應該唔會有問題既∼


●●
●●
唔好搶我餅餅呀！∼　 ●　●　●　●　●
１２２８
(二)
夜晚執籠時比左塊ｓａａ餅仔矇豬同ＣＣ食，不嬲矇豬既反應都冇ＣＣ咁熱烈既，鍾意就咬兩啖，唔鍾意就話知你咁，唔似得ＣＣ咁不停係咁咬，直至食晒為止，不過唔知係咪因為天氣凍，我又未餵糧比佢食，所以好肚餓呢？一口咬住餅餅係個籠兜跳左出黎，之後就放係地下到咬喇，見佢企既地方有ｄ草草，諗住同佢拎走去啦，點知佢以為想搶佢舊餅，竟然胡我呀！！仲要邊胡邊兩隻手向前挖咁出拳喎，真係作屎佢呀，我諗左三次佢都係咁，惡到屎呀，唔怪得嚇到個妹咁驚佢啦∼


●●
●●
我覺得開胸型ｄ喎　　●　●　●　●　●
１２
２９
(三)
 天氣開始凍，今朝出門口番工時特登拎左三件衫仔出黎，一狗一件，唔係晨早媽媽帶佢地去屎尿時凍屎呀，朱古力同沙律個件仲係新衫仔黎添喎∼不過夜晚番到屋企，見阿仔好型咁打大晒個心口，唉…ｄ鈕比佢全部咬甩晒喇…正一衰仔黎呀，


●●
●●
比番ｄ位黎訓好喎∼　　 ●　●　●　●　●
１２３０
(四)
好∼凍∼呀！尤其是一到夜晚冇乜太陽就更加凍，ｍｏｕｓｓｅ就最醒目，見差唔多訓覺時間，就跳定上床霸番個好位，跟住就到朱古力喇，因為我張床有兩個大咕臣，又多公仔，所以未拎走時訓左兩隻狗上去都冇咩位淨喇，所以包尾既沙律想訓覺時見到呢個情形，就好唔高興喇，係咁吠朱古力同ｍｏｕｓｓｅ，好似鬧佢地霸晒ｄ位咁，想搵個位攝上床，兩姊弟見到就即刻ｅ起棚牙，好似想噬埋去咁，發番沙律脾四，望住佢地，真係笑屎呀XD

:: ｎｅｘｔ ::