２／５／０５（一）勞動補假悶悶悶…
本來今日有得去彭彭跑草，點知阿公病左，所以冇得去，唯有係屋企附近跑下啦…
唔知黎緊個星期天有冇得去彭彭玩呢？狗地好想去呀！！
Mousse：呵∼欠∼我地朝朝早都黎呢到屎尿散步架啦，好悶呀∼我都係想去彭彭呀！！


　３／５／０５（二）我條頸頸呀…
今日放工番黎，發覺ｍｏｕｓｓｅ條頸抓到損晒，仲有ｄ臭臭既水滲出黎，其實尋日都覺佢有少少抓到紅左，但就冇咁嚴重，唔知係咪星期日同佢剪毛時剷得佢唔舒服，痕所以抓到咁呢？一到夏天，佢地ｄ皮膚問就黎喇，唉…而家唯有同佢著隻襪仔，等佢抓既時後唔會再抓傷，等佢唔好再惡化，同隔開佢同朱古力沙律，唔好比佢地舔到ｍｏｕｓｓｅ個傷口啦∼
ＣＣ：
好唔開心呀…我只不過係朝早食早餐時，唔覺意痾左尿尿係個兜到之麻，點知Ｄ糧就浸到變晒粉咁發漲，成兜冇得食，媽媽又番左工，婆婆又出左街，結果要等到媽媽番黎，同我執籠時先發覺，同我洗番乾淨餵我食晚餐，仲要冇比多少少糧我添喎，嗚嗚嗚∼冇陰功呀！還我早餐一份呀∼咇∼


　４／５／０５（三）痛痛呀！
媽咪今日同我帶左ｍｏｕｓｓｅ去睇醫生喇，打左兩支針，要食兩個星期葯，因為有傷口，早晚要用１比５０黎開消毒葯水黎洗傷口，之後再搽葯膏，夜晚第一次同ｍｏｕｓｓｅ洗傷口，佢好抗拒呀！可能ｄ葯水“拿”啦，一掂佢就縮，之後仲好驚咁走去ｄ角落頭哩黎添，睇見都心痛，但冇洗子啦，唔洗傷口一陣感染到細菌仲大件事，同搽左葯膏快ｄ好麻∼所以都要隔硬捉住佢黎洗／搽，之後佢就好唔開心喇，撩佢玩同佢傾計都唔啋我，冇咩反應…ｍｏｕｓｓｅ乖啦，咁樣快ｄ好麻∼
不過今日見佢好似有ｄ地方都開始結蕉，希望快ｄ好番啦，之前整親腳仔岩岩先好番冇耐，而家又到條頸，成日都要困佢係房，冇得出廳玩，好慘架麻…


　５／５／０５（四）秘制鹵水兔糧
ＣＣ：
我今日叻左呀！差唔多食完晒ｄ糧先痾ｄ尿尿落去，其實我係想整秘制鹵水兔糧之麻，不過仲係鑽研中，我會繼續努力！然後請大家食既，見此段文字兔者有份！咇∼


　６／５／０５（五）好番Ｄ喇∼
洗左兩日傷口搽左兩日葯膏食左兩日葯，好似好ｄ喇，之前ｄ蕉都甩得七七八八，洗傷口時都冇先兩日掙扎得咁勁，不過搽葯膏時就都係掙扎得好厲害，不過都冇辦法喇，唔搽唔會好，所以強硬ｄ都要搽，所以搞到ｍｏｕｓｓｅ嬲我呀陰功，搽完葯膏之後唔啋我，我拱塊臉埋去，佢就拎去第二邊，我拱去個邊呢，佢又拎番去呢邊咁，搞到我要同佢傾左好耐計黎氹佢，佢先叫冇再拎“咩”面渣，嗚∼∼∼
   
ＣＣ：再接再厲，祕制鹵水汁，可浸糧食，或當醬汁點草點菜食，或淨飲都得！
   
矇豬：哇∼好驚呀！阿妹儍左呀！整乜鬼鹵水汁呀？打屎兔都唔會食架！一滴都唔呀！！


　８／５／０５（日）母親節
ＣＣ：
今日係母親節，為左孝順媽媽，今日冇整鹵水糧，等媽媽唔洗同我洗糧兜，幾乖！仲有婆婆為左整靚靚沙律，買左 blueberry ，媽媽拎左粒比我同家姐食呀，好味道！不過唔知點解家姐仲有士多啤梨食但我冇既？唔公平呀！媽媽偏心！咇∼　　（唔該你睇下你個屁屁先啦）


　１０／５／０５（二）打大雷落大雨∼
今朝起身番工，途經天橋底，哇∼水浸呀！ｄ車經過時都小心奕奕咁，驚住死火，不過呢幾日真係落得好大兩，每次一落大兩滴滴咑咑，就嚇到屋企三隻ｂ屎屎下，尤其是沙律，尋晚又雷又兩，嚇到佢不停咁喘氣，抱住佢同佢傾下計，好似都冇咩幫助，比餅餅佢都唔食添，雖然朱古力同ｍｏｕｓｓｅ都好驚，ｍｏｕｓｓｅ仲哩左係媽咪床下底，不過比餅餅佢都照食，冇沙律驚得咁緊要，緊係平時做得壞事多，驚雷公擘定啦，沙律可∼


　１１／５／０５（三）鹵水草
ＣＣ：
為左測試下我既袐制鹵水汁，今日痾完之後即刻放左條毛毛草落去醃試下，諗住浸佢８個鐘，點知…媽媽執籠時同我連埋ｄ鹵水汁掉左…嗚∼∼兔地想試下好唔好味呀！！咇∼


　１４／５／０５（六）食軟便∼
哇哇哇∼奇景呀！！呢兩日好懶冇同阿兔執籠，拜託左媽咪幫手，不過媽咪當然冇我清潔得咁徹底，又抹又擦咁，尤其是ＣＣ個籠，所以可能有少少污糟啦，咁今晚自己執番籠時，就見ＣＣ將個頭放係兩隻腳仔中間，跟住抬番起頭時就口郁郁喇，眼甘甘望實佢，又再黎一次，哇！佢食盲腸便便呀！！呢隻兔食盲腸便呀！！雖然食盲腸便對兔兔黎講係正常不過既事，不過發生係ＣＣ身上，真係令人感動呀！四年以黎，見到佢食盲腸便既之數，真係十隻手指都夠數呀！


　１５／５／０５（日）佛誕跑跑草
 
難得又等到三日假期，下一次就要等到７月１日…好漫長呀！！
三日假，不能少既活動，當然就係帶阿ｂ去跑草啦，地點彭福公園，係丫又係彭彭呀！貪佢夠大夠方便夠多汪汪一齊玩麻，跑呀跑∼


　１６／５／０５（一）食宵夜
沙律：點解兔兔有宵夜食，但係我同阿仔就得個望字架…好想食埋一份呀！


　１７／５／０５（二）食口血…
 
ＣＣ個鹵水屁屁又番黎喇，只係一個月到者，又搞成咁…捉左佢去濕洗，驚青Ｃ例牌好驚青，周圍搵窿偷走，又跳上我到想我抱抱，搞完一大輪，同佢吹番乾個屁屁，抱左佢出廳剪走污糟既毛毛，又係例牌咁爭扎，不過一走甩呢，又比我捉番住喇，係咁走甩捉番走甩捉番，最後抱住佢時發覺佢好乖咁冇再反抗，望下佢啦，嚇到我屎，成個咀仔都係血！！嚇到我即刻放番佢落地下，見佢跑左一個大圈，就跳番入籠喇，比野佢唔食，屎喇，好驚呀！最怕佢係傷到ｄ內臟，外表睇黎咀仔附近冇傷口，我諗可能係咬損脷仔／咀仔之類，嚇屎我喇！


　１８／５／０５（三）我諗…冇事掛…
今朝起身，見ＣＣ己經食晒Ｄ糧，不過尋日比佢既ＳＡＡ餅仔就冇食到，草草就食晒ｄ較軟同碎既，淨番ｄ粗框框草，其它似乎一齊正常，精神幾好，應該真係整損咀仔入面啦，陰功囉，實痛屎喇…不過見佢冇咩事都放心ｄ，嚇屎阿媽喇，搞到同佢洗屁屁有陰影添，怎搞呀？？


　２１／５／０５（六）懶洋洋
 
天口熱，最好就係訓下覺豬架喇∼ＺＺｚｚｚ……
訓醒覺就最好搞下妹舔舔眼睛，清清眼屎喇，阿妹黎啦黎啦，舔啦舔啦∼
一日食三種唔同菜菜就最健康喇，今日菜單有油墨菜、小棠菜同唐生菜，好味道！
我係識嘆既兔兔，扒係到，咬實個兜，拉埋黎，邊攤係到邊食菜，兔地一大樂事也∼


　２２／５／０５（日）屎雲石
夜晚同矇豬做阿四時，發覺個底盤好濕，望清楚Ｄ，哇∼搞乜鬼塊雲石咁黃唫唫架？放塊雲石比佢等佢扒係上面涼快Ｄ，佢就走去係上面尿尿，仲索鬼晒一浸味添，咦…咁都算啦，仲要拆左個廁所個網，搞到成個籠都係Ｄ墊料，污糟到屎，矇豬，想點先？


　２３／５／０５（一）懶洋洋
 
話左唔再敗家，不過買野比ｄ女同孫唔算敗家丫！所以，放工落左金魚街走一趟∼

沙律就黎生日，所以此行主要目的呢，就係買禮物比佢喇，第一站去左蠢物城，有目標地買左幾件玩具，同埋買左個小狗兜，比成日痾屎落個糧兜到既ＣＣ開飯用，之後就閒逛左幾間寵物店，買左ｄ狗零食，仲有買左個兜比ＣＣ裝草草，我冇偏心架，都同矇豬換左個同款既新糧同草兜，哇∼我係一個孝順媽呢∼
ＣＣ：哇哇哇，我有冇眼花呀？我有新糧兜同草兜呀！！開心屎兔地喇 ^o^ 咇∼


　２８／５／０５（六）預祝慶生辰
沙律：過多三日我就四歲生日ｌｕ，媽媽話提早同我慶祝喎，今朝我一早就起左身，望到個天陰陰又有陣陣雨，真係擔心屎狗呀，如果落雨既話就冇得出街街喇，本來諗住去大草地彭彭，媽媽話驚落雨改變主意話去西貢行下，有瓦遮頭咁話喎，跟住又話不如去ｄ狗狗ｃａｆｅ，不過最尾出門口時，因為見有ｄ太陽，所以都係去番彭彭，不過個到既草地好濕，我同ｂｂ都玩到四隻腳仔濕晒污污糟糟咁，不過我地算好乖喇，我見到有隻金毛汪汪，爬左係個大水氹到，跟住仲要滾地沙咁係上面碌添，搞到成身都係泥水，我諗佢緊係好熱要降下溫定喇∼

玩左兩個鐘到，開始有ｄ雨粉咁，老豆又趕時間，所以就番左屋企ｌｕ，不過好慘呀，因為媽媽話我地好污糟，所以未洗白白唔比入房，好彩我生日所以排第一洗白白，可以快快趣跳上床訓個靚覺，訓醒再開餐∼狗地真係好鐘意生日呀！


　３０／５／０５（一）快ｄ執啦
矇豬一向都係乖孩子黎，係籠內識得用廁所，出黎玩又會去公廁方便，好少痾到周圍係，不過今晚就做左曳曳豬喇∼等我執籠開飯時，可能等得唔耐煩，想叫我快ｄ，於是乎就係正籠中心尿尿，搞到我要第一時間放佢出黎，費事佢踩番落ｄ尿尿到整污糟隻腳仔，哎呀！比佢奸計得逞添∼哼∼

:: ｎｅｘｔ ::