。。。菜汁－０２／０８。。。
。   。
 
我：嘩！！菜汁呀，好多滴菜汁呀！！
 矇豬：唓，大驚小怪，第一次見咩∼　（係喎，真係第一次見兔地食菜有菜汁喎！好感動哦！！）
 
。   。



。。。發現新玩具－０３／０８。。。
。   。
 
朱古力：我係房發現左件黃白色波點玩具呀，好好咬架，媽媽家姐我地一齊玩丫∼
 
。   。



。。。玩到癲－０５／０８。。。
。   。
 
夜晚番到屋企睇到樓上兩位小朋友喊得好淒涼，上去望下啦，原來三樓冇人，兩位小朋友一狗一邊綁住左，所以我就放左佢地兩個玩啦，一放鍊兩位小朋友就好似發左癲咁，跑來跑去你咬我我咬你好似痴左線咁，雖然可樂係阿妹又仲係細細粒，但仲惡屎過啫喱，好“殘”雞呀！
 
。   。



。。。一執執－１４／０８。。。
。   。
 

冇左對焦快大光圈既３５０ｄ，都冇心機同ｄ小朋友影相添…３５０ｄ番來哦！！

都唔明點解，ＣＣ一年三百六十五日個身ｄ毛都係咁一執仔一執仔咁甩既？係咁易梳一梳都一餅毛！
 
。   。



。。。真兇係…？－１６／０８。。。
。   。
 
夜晚番黎發覺阿仔右邊耳背有血跡，但耳背冇傷口…左邊面頰同左腳均有血跡，但同樣冇傷口，再仔細搵下，就發覺左邊耳尖有一大舊結左焦既血，掂一掂佢都會縮，睇血跡同結焦既情況應該傷口都幾深…究竟點整到架呢？兩姊弟或兩母子打交，傷口位置唔會係耳尖咁騎尼喎…以朱古力既高度檢查過屋企，應該冇咁尖既利物可以整親佢，最後，真兇懷疑係……佢囉！！
矇豬：唔關我事架喎…就算真係我，我都係出於自衛保護自己，輕輕咬一口嚇下狗架渣喎…

除左佢，真係諗唔到有其它可能性喇…
 
。   。



。。。四歲喇！－１７／０８。。。
。   。
 
ｂｂ四歲喇，生日快樂呢，今晚晚餐好豐富，有南瓜雞肉哦，而阿仔雖然兜糧最大兜，但同時都係食得最快既∼　 朱古力：媽媽，今日我生日，食剩ｄ比我執口水尾得唔得呀？

 
。   。



。。。菜－２２／０８。。。
。   。
 
３５０Ｄ番來囉∼∼
ＣＣ：菜菜呀，我要食菜菜哦！ 矇豬：阿妹儍架，行去門口食丫麻∼
 
。   。



。。。車厘子＠好家姐－２３／０８。。。
。   。
 

矇豬：車厘子好好味呀！黎啦，放低成粒比我食啦∼
我係一個好家姐，左舔舔右舔舔，幫阿妹清潔眼睛∼
 
。   。



。。。影完未呀？－２４／０８。。。
。   。
 
矇豬：影完未呀？又唔係未見過兔地食菜…
 
。   。



。。。矇豬唔舒服哦－２７／０８。。。
。   。
 
零晨時份，餵菜菜時發覺矇豬唔多妥，唔肯食菜，之前ｄ糧都唔餵，放佢出黎時一個波波咁縮左係角落頭，摸摸個胃好似比平日漲左少少，餵 Infacol 再搓肚仔，雖然其間都有伸直腳咁扒過係地下一陣間，但比較長時間都係一個波波咁，雖然個胃摸落去冇再漲，亦冇好似上一次咁實同漲，不過一直到朝早都係唔肯食野，所以等大圍一開門就打去約，１０點鐘就去到睇，側田緊生放假，今日睇 Dr. Morgan ，醫生話摸到個胃漲好似Sponge 咁，唔算太實亦摸唔到有異物，估計應該係 Gas 既問題，因為矇豬有ｄ脫水情況，所以吊左一陣皮下鹽水，之後就要番去餵 Metaclop 同草粉，過兩三日再番去覆一次診，丫∼∼∼∼擔心屎喇，仲有今次上磅比上次重輕左添，上一次側田醫生己經話佢瘦，點知今次冇肥到仲瘦左添…番到屋企，餵左葯搓搓肚仔，餵左草粉，過左一陣開始肯自己食ｄ菜喇，都夜晚，都肯食ｄ糧同草，雖然量唔多，比菜菜都唔係第一時間食，不過肯食番野己經好好喇，希望快ｄ好番啦，擔心屎阿媽喇∼

仲有，今朝係大圍撞到靚阿仔，希望阿仔ｄ皮膚快ｄ快好番啦，生番ｄ毛毛唔好再坐尿尿喇∼
 
。   。



。。。唔食草粉呀！－２８／０８。。。
。   。
 
今朝番工時，見矇豬都幾精神，比佢既菜菜都有食晒ｄ葉，雖然對糧同草興趣仲係不大，不過都會耐唔耐食少少咁，都放心ｄ∼

夜晚番黎，見都仍然未完全回復正常，就開左ｄ草粉諗住餵佢啦，點知矇大小姐好抗拒，不停出拳打低我拎住針筒既手手，不過再試左幾次之後，大小姐突然間追住針筒黎食喎（？），當我開心都黎唔切時，就聽到幾下“卜卜”聲喇，再望下…支針筒咬爆左哦！！唔怪得之咁積極食啦，原來係有陰謀既…好啦咁換過之針筒餵啦，點知一係側邊放入口，大小姐就拎番正個頭起劫勢咁咬…結果６ｍｌ草粉都未餵到，就咬爆左兩支針筒喇　－＿＿－”

不過都好既，有精力去咬，亦係代表冇事啦？
 
。   。


。。。一地係＠讓下我啦－３０／０８。。。
。   。
 
正常黎講，見到兔廁所搞成咁，一地都係屎尿，應該會激鬼氣鬧“邊個咁曳呀下！”，不過呢一刻，竟然覺得好開心喎∼有氣力搞破壞，咁即係精神唔錯啦，即係好番啦係咪∼
沙律：比我啦比我啦，咪咪阿仔讓下我啦∼
 
。   。


:: ｎｅｘｔ ::